Vieng Chanh News

ແຂວງວຽງຈັນອອນລາຍ

ຟູດແພນດ່າ ( foodpanda ) ສາຂາເມືອງວັງວຽງ ມອບເຄື່ອງໃຫ້ຄະນະຕ້ານແລະສະກັດກັ້ນພະຍາດໂຄວິດ-19 ຂອງເມືອງ

1 min read

ໃນຕອນເຊົ້າ ວັນທີ 11 ຕຸລາ 2021 ນີ້, ຢູ່ທີ່ຫ້ອງວ່າການປົກຄອງເມືອງວັງວຽງແຂວງວຽງຈັນ. ໄດ້ຮັບເຄື່ອງຊ່ວຍເຫຼືອນຳ ບໍລິສັດ​ ເດລິເວີລີ ຣີໂຣລາວຈຳກັດ ( foodpanda)ໂດຍປະກອບສ່ວນ ນ້ຳດື່ມ 15 ແກ໋ດ, ໝີ່ໄວໆ 10 ແກ໋ດ, ຜ້າປິດປາກ 1 ແກ໋ດ,
ກາເຟ 10 ຖົງ, ສະເປສີດລ້າງມື 30 ອັນ, ຄັນຮົ່ມ 2 ອັນ, ປ໋ອງປາ 1 ແກ໋ດ, ລວມມູນຄ່າ 2,465,000ກີບ.

ໃຫ້ກຽດກ່າວມອບໂດຍທ່ານ ສົມພອນ​ ຫລວງວິໄລ ຜູ້ຈັດການ​ ສາຂາເມືອງວັງວຽງ ຂອງບໍລິສັດ​ ເດລິເວີລີ ຣີໂຣລາວຈຳກັດ ( foodpanda)​ພ້ອມດ້ວຍພະນັກງານ. ໃຫ້ກຽດກ່າວຮັບໂດຍ ທ່ານ ບຸນຈັນ ມາລາວົງ ເຈົ້າເມືອງໆວັງວຽງ. ມີບັນດາທ່ານຄະນະປະຈຳ, ຮອງຫົວຫນ້າຫ້ອງວ່າການແລະພະນັກງານເຂົ້າຮ່ວມ.


ທ່ານ ສົມພອນ​ ຫລວງວິໄລ ຜູ້ຈັດການ​ ສາຂາເມືອງວັງວຽງ ຂອງບໍລິສັດ​ ເດລິເວີລີ ຣີໂຣລາວຈຳກັດ ( foodpanda)​ຍັງໄດ້ກ່າວວ່າ: ປະຈຸບັນນີ້ foodpanda ຂອງພວກເຮົາແມ່ນໄດ້ເອົາໃຈໃສ່ ແລະ ພະຍາຍາມໃນການມອບຄວາມສະດວກສະບາຍໃຫ້ກັບຄົນລາວກໍ່ຄືປະຊາຊົນຊາວເມືອງວັງວຽງ ໃນການສັ່ງອາຫານ ຫຼື ສິນຄ້າຕ່າງໆທີ່ມີຢູ່ໃນທ້ອງຕະຫຼາດ ຮອດເຮືອນ ໂດຍບໍ່ໄດ້ເສຍຄ່າສົ່ງໃດໆ ຜ່ານ foodpanda app. ພ້ອມນີ້ຍັງແມ່ນຄວາມພູມໃຈ ແລະ ເພິ່ງພໍໃຈ ທີ່ໄດ້ເປັນສ່ວນໜຶ່ງໃນການຊ່ວຍເຫຼືອ ເພື່ອເປັນຂວັນກຳລັງໃຈໃຫ້ແກ່ຜູ້ທີ່ກຳລັງປະເຊີນກັບບັນຫາດັ່ງກ່າວ ໃຫ້ຜ່ານວິກິດນີ້ໄປດ້ວຍດີ.


ທ່ານ ເຈົ້າເມືອງໆວັງວຽງ ໄດ້ກ່າວສະແດງຄວາມຂອບໃຈຢ່າງສູງຕໍ່ການປະກອບສ່ວນຊຸກຍູ້ຂອງ ບໍລິສັດ​ ເດລິເວີລີ ຣີໂຣລາວຈຳກັດ ( foodpanda)​ ທີ່ມີຄວາມເປັນຫ່ວງເປັນໃຍຕໍ່ພີ່ນ້ອງຊາວເມືອງວັງວຽງ ຊຶ່ງຍັງມີບາງບ້ານພວມປະເຊີນ ແລະ ຕອບໂຕ້ ກັບເຊື້ອພະຍາດໂຄວິດ-19, ຄະນະສະເພາະກິດທຸກຂັ້ນ, ແພດໝໍ, ເຈົ້າໜ້າທີ່ ຮ່ວມກັບການຈັດຕັ້ງບ້ານໄດ້ສຸມໃສ່ເຝົ້າລະວັງ ແລະ ຄວບຄຸມເຊື້ອພະຍາດດັ່ງກ່າວຢ່າງເຂັ້ມງວດ, ເຄື່ອງຊ່ວຍເຫຼືອໃນເທື່ອນີ້ຈະຖືກນໍາໃຊ້ໃຫ້ເກີດຜົນປະໂຫຍດທີ່ສຸດ, ຈັດແຜນແຈກຢາຍໃຫ້ເຖິງບ້ານເປົ້າໝາຍ.


ຕອນທ້າຍທ່ານ ບຸນຈັນ ມາລາວົງ ເຈົ້າເມືອງໆວັງວຽງ ຍັງໄດ້ໃຫ້ກຽດມອບໃບສົມມະນາຄຸນໃຫ້ກັບທ່ານ ສົມພອນ​ ຫລວງວິໄລ ຜູ້ຈັດການ​ ເຂດເມືອງວັງວຽງ ຂອງບໍລິສັດ​ ເດລິເວີລີ ຣີໂຣລາວຈຳກັດ ( foodpanda)​.

ຂ່າວ: ທັນວາ

Leave a Reply

Your email address will not be published. Required fields are marked *