Vieng Chanh News

ແຂວງວຽງຈັນອອນລາຍ

ຫົວໜ້າຄະນະສະເພາະກິດເມືອງໝື່ນ ຊຸກຍູ້ຊີ້ນຳຈຸດກວດກາຄົນເຂົ້າ-ອອກ ຂອງເມືອງ

1 min read

ຕອນເຊົ້າວັນທີ 12 ຕຸລາ 2021 ນີ້ ທ່ານ ຄຳຜູ ແກ້ວດວງສີ ຮອງເຈົ້າເມືອງ ຫົວໜ້າຄະນະສະເພາະກິດເພື່ອປ້ອງກັນ ແລະແກ້ໄຂການລະບາດຂອງພະຍາດໂຄວິດ 19 ຂອງເມືອງໝື່ນ ໄດ້ລົງ ຊຸກຍູ້ ຊີ້ນຳ ບັນດາຈຸດກວດກາໃນທົ່ວເມືອງ.

ພາຍຫຼັງໄດ້ຮັບຟັງການງາຍງານ ສະພາບການປະຕິບັດໜ້າທີ່ ກັ່ນກອງຄົນ ທີ່ເດີນທາງຜ່ານແຕ່ລະຈຸດກວດກາ ແລ້ວທ່ານ ຄຳຜູ ແກ້ວດວງສີ ໄດ້ກ່າວເນັ້ນໜັກໃຫ້ແຕ່ລະຈຸດກວດກາສືບຕໍ່ ກັ່ນກອງຄົນເຂົ້າ-ອອກບ້ານ, ເມືອງຢ່າງເຂັ້ມງວດ ໃນການກວດກາຄົນເຂົ້າ-ອອກເມືອງ ໂດຍຜູ້ທີ່ຈະອະນຸຍາດໃຫ້ເດີນທາງເຂົ້າ-ອອກ ຕ້ອງແມ່ນຍ້ອນເຫດຜົນຈຳເປັນ ເຊັ່ນໄປໂຮງໝໍ, ໄປທຳການຜະລິດ, ລົດຂົນສົ່ງສິນຄ້າ ແຕ່ຕ້ອງມີໃບຢັ້ງຢືນສັກຢາກັນພະຍາດໂຄວິດ 19 ຄົບໂດສ ແລະມີໜັງສືຢັ້ງຢືນການເດີນທາງ ຈາກຄະນະສະເພາະກິດ.

ທີ່ກ່ຽວຂ້ອງ ໂອກາດດຽວກັນ ທ່ານຍັງໄດ້ ຕາງໜ້າໃຫ້ຄະນະສະເພາະກິດເມືອງ ມອບນ້ຳດື່ມຈຳນວນໜຶ່ງ ແລະເງິນຈຳນວນ 500.000 (ຫ້າແສນກີບ)ໃຫ້ແຕ່ລະຈຸດກວດກາ ທັງ4 ຈຸຸດຄື ຈຸດກວດກາ ບ້ານນາປ່າໄຜ່, ຈຸດກວດກາ ບ້ານໂພນສີວິໄວ, ຈຸດກວດບ້ານໂນນຕ້ອງ ແລະຈຸດກວດກາບ້ານນ້ຳແພດ ລວມເປັນເງິນທັງໝົດ 2.000.000 (ສອງລ້ານກີບ) ເພື່ອຊຸກຍູ້ເຂົ້າໃນວຽກງານປ້ອງກັນ, ສະກັດກັ້ນ ແລະຕ້ານການລະບາດຂອງພະຍາດ ໂຄວິດ-19 ຢູ່ເມືອງໝື່ນ ໃຫ້ມີປະສິດທິພາບ.


ມາຮອດມື້ນີ້ເປັນເວລາ 13 ວັນຕິດຕໍ່ກັນແລ້ວ ທີ່ຢູ່ເມືອງໝື່ນບໍ່ມີຜູ້ຕິດເຊື້ອພະຍາດໂຄວິດ19 ໃໝ່ ພາຍຫຼັງມີການຕິດເຊື້ອຮອບທີ 2 ນັບແຕ່ວັນທີ 24 ກັນຍາເຖິງວັນທີ 29 ກັນຍາ ເຊິ່ງມີຜູ້ຕິດເຊື້້ອຈໍານວນ 14 ຄົນ ເຮັດໃຫ້ຕົວເລກສະສົມ ນັບແຕ່ເດືອນເມສາ 2021 ເປັນຕົ້ນມາ ທົ່ວເມືອງໝື່ນມີຜູ້ຕິດເຊື້ອໂຄວິດ19 ທັງໝົດ 20 ກໍລະນີ ໃນນັ້ນ ປິ່ນປົວຫາຍດີ ແລ້ວຈຳນວນ 17 ຄົນ ແລະກຳລັງປິ່ນປົວຢູ່ສຸນປິ່ນປົວຂອງແຂວງວຽງຈັນຈຳນວນ 3 ຄົນ.


ຕອນເຊົ້າ ວັນທີ 11 ຕຸລາ 2021 ນີ້ ບໍລິສັດເພັດທອງຄຳບໍ່ແຮ່ຈຳກັດ ຍັງໄດ້ນຳເອົານ້ຳດື່ມ ຈຳນວນ 20 ແພັກ ມູນຄ່າ 700.000 (ເຈັດແສນກີບ) ມາມອບໃຫ້ຄະນະສະເພາະກິດເມືອງໝື່ນ ເຊິ່ງຕາງໜ້າມອບໂດຍທ່ານ ກິດຕະການ ພູວະແສງ ແລະຕາງໜ້າຮັບ ໂດຍທ່ານ ພອນເທີດ ສຸຫວັດດີ ເຈົ້າເມືອງ-ເມືອງໝື່ນອີກດ້ວຍ.

ຂ່າວ: ແໜງໜໍ່ຄຳ

Leave a Reply

Your email address will not be published. Required fields are marked *