Vieng Chanh News

ແຂວງວຽງຈັນອອນລາຍ

ຄະນະສະເພາະກິດຂັ້ນເມືອງລົງໂຄສະນາ ການປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ຢູ່ເມືອງວຽງຄໍາ

1 min read

ໂດຍປະຕິບັດຕາມທິດຊີ້ນໍາຂອງທ່ານເຈົ້າເມືອງໆວຽງຄໍາ ໃນວັນທີ 12 ຕຸລາ 2021 ນີ້ ຄະນະສະເພາະກິດ ປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ19 ເມືອງວຽງຄໍາ ໄດ້ລົງໂຄສະນາເຜີຍແຜ່ວຽກງານປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ຢູ່ຕາມທ້ອງຕະຫຼາດ, ສະຖານທີ່ຊຸມຊົນ ແລະ ແຕ່ລະບ້ານທີ່ມີຜູ້ຕິດເຊື້ອພະຍາດໂຄວິດ19 ຢູ່ພາຍໃນເມືອງວຽງຄໍາ.

ເຊິ່ງນໍາພາໂດຍທ່ານ ແກ້ວໃຈ ພົມມີ ຮອງເຈົ້າເມືອງໆວຽງຄໍາ ຫົວໜ້າຄະນະສະເພາະກິດຂັ້ນເມືອງ, ມີຫ້ອງການຖະແຫຼງຂ່າວ-ວັດທະນະທໍາ ແລະ ທ່ອງທ່ອງເມືອງ, ຫ້ອງການອຸດສາຫະກໍາ ແລະ ການຄ້າເມືອງເຂົ້າຮ່ວມ, ຈຸດປະສົງຂອງການລົງໂຄສະນາໃນຄັ້ງນີ້ກໍ່ເພື່ອແນໃສ່ໃຫ້ພໍ່ແມ່ປະຊາຊົນ, ນັກທຸລະກິດ, ພໍ່ຄ້າຊາວຂາຍຢູ່ພາຍໃນເມືອງວຽງຄໍາ ພ້ອມກັນເພີ່ມທະວີການປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ19 ເຊິ່ງກໍາລັງແຜ່ລະບາດຢູ່ພາຍໃນເມືອງວຽງຄໍາ.

ມາຮອດວັນທີ 12 ຕຸລາ 2021 ເມືອງວຽງຄໍາມີຜູ້ຕິດເຊື້ອສະສົມທັງໝົດ 49 ຄົນ ເຊິ່ງໄດ້ກວມເອົາ 8 ບ້ານເຊັ່ນ: ບ້ານໂພນຊອງ, ບ້ານໂພນໝີເໜືອ,ບ້ານໂພນໝີໃຕ້, ບ້ານໂນນສະຫວ່າງ, ບ້ານນານິນ, ບ້ານເວີນສານ, ບ້ານນາເຄືອ ແລະ ບ້ານດອນກວດ, ໃນຈໍານວນ 8 ບ້ານນີ້ໄດ້ກໍານົດເປັນບ້ານແດງຈໍານວນ 4 ບ້ານຄື: ບ້ານໂພນໝີເໜືອ, ບ້ານໂພນໝີໃຕ້, ບ້ານໂນນສະຫວ່າງ ແລະ ບ້ານດອນກວດ, ສະນັ້ນ ຄະນະສະເພາະກິດເມືອງວຽງຄໍາຈິ່ງໄດ້ອອກແຈ້ງການໃຫ້ສືບຕໍ່ຈັດຕັ້ງປະຕິບັດຕາມຄໍາສັ່ງຂອງທ່ານເຈົ້າເມືອງໆວຽງຄໍາ ເລກທີ 51/ຈມວຄ, ໃຫ້ສືບຕໍ່ອອກໄປອີກຮອດວັນທີ 15 ຕຸລາ 2021.

ພ້ອມກັນນັ້ນກໍ່ເຫັນໄດ້ວ່າພໍ່ແມ່ປະຊາຊົນ, ນັກທຸລະກິດດ ພໍ່ຄ້າຊາວຂາຍ ໄດ້ພ້ອມກັນເອົາໃຈໃສ່ໃນການປ້ອງການການແຜ່ລະບາດຂອງພະຍາດດັ່ງກ່າວໄດ້ດີພໍສົມຄວນເປັນຕົ້ນ: ໃສ່ຜ້າປິດປາກ-ດັງ, ການຮັກສາໄລຍະຫ່າງ, ການຈໍາກັດໂຕເອງຢູ່ເຮືອນ, ບໍ່ມີການຊຸມແຊວຫຼືບໍລິການເຫຼົ້າ-ເບຍ, ປະຊາຊົນທຸກຄົນມີຄວາມຕື່ນຕົວສູງໃນການສະກັດກັ້ນການແຜ່ລະບາດຂອງພະຍາດດັ່ງກ່າວ.

ຂ່າວ: ຫ້ອງການ ຖວມ ເມືອງວຽງຄໍາ

Leave a Reply

Your email address will not be published. Required fields are marked *