Vieng Chanh News

ແຂວງວຽງຈັນອອນລາຍ

ປະກາດການຈັດຕັ້ງ ພາສີປະຈຳແຂວງ ວຽງຈັນ.

1 min read

ພິທີປະກາດການຈັດຕັ້ງ ຂອງພາສີ ແຂວງ ວຽງຈັນ ຈັດຂື້ນໃນຕອນເຊົ້າມື້ນີ້ ວັນທີ 13 ຕຸລາ 2021 ທີ່ຫ້ອງປະຊຸມ ພະແນກການເງິນ ແຂວງ ວຽງຈັນ.

ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ

ພາຍໃຕ້ການເປັນປະທານ ຂອງ ທ່ານ ຄຳພັນ ສິດທິດຳພາ  ກຳມະການສູນກາງພັກ,  ເລຂາພັກແຂວງ, ເຈົ້າແຂວງໆວຽງຈັນ,

ທ່ານ ດາວເຮືອງ ນັນທະວົງ ຄະນະປະຈຳພັກແຂວງ, ຮອງເຈົ້າແຂວງໆວຽງຈັນ ແລະ ທ່ານ ນາງ ຈັນທະບູນ ໂພສະລາດ ຄະນະປະຈຳພັກແຂວງ, ຫົວໜ້າຄະນະຈັັດຕັ້ງແຂວງ.
ເຂົ້າຮ່ວມ ມີທ່ານ ດາວເຮືອງ ນັນທະວົງ ຄະນະປະຈຳພັກແຂວງ, ຮອງເຈົ້າແຂວງໆວຽງຈັນ, ທ່ານ ນາງ ຈັນທະບູນ ໂພສະລາດ ຄະນະປະຈຳພັກແຂວງ, ຫົວໜ້າຄະນະຈັັດຕັ້ງແຂວງ,

ມີຕາງໜ້າຄະນະຈັດຕັ້ງແຂວງ, ພະແນກພາຍໃນແຂວງ, ຄະນະພັກ, ຄະນະນຳ, ຫົວໜ້າ ແລະ ຮອງຫົວໜ້າຂະແໜງຂອງ ຂະແໜງການເງິນ ເຂົ້າຮ່ວມ.

ທ່ານ ນາງ ຈັນທະບູນ ໂພສະລາດ ຄະນະປະຈຳພັກແຂວງ, ຫົວໜ້າຄະນະຈັັດຕັ້ງແຂວງ ວຽງຈັນ ໄດ້ຂື້ນຜ່ານຂໍ້ຕົກລົງ ຂອງກະຊວງການເງິນ ສະບັບເລກທີ 4171/ກງ, ລົງວັນທີ 03 ກັນຍາ 2021 ວ່າດ້ວຍການແຕ່ງຕັ້ງຫົວໜ້າ ແລະ ຮອງຫົວໜ້າ ພາສີປະຈຳແຂວງ ວຽງຈັນ,

ໂດຍແຕ່ງຕັ້ງ : ທ່ານ ທະວີໄຊ ທຳມະວົງ ຮອງຫົວໜ້າຄຸ້ມຄອງກອງພາສີ V, ຫົວໜ້າກອງກວດກາພາສີ ປະຈຳ ແຂວງ ວຽງຈັນ ເປັນຫົວໜ້າພາສີປະຈຳແຂວງ ວຽງຈັນ.                ແລະ ແຕ່ງຕັ້ງ ທ່ານ ບຸນທີ ອັກຄະວົງ ຮອງຫົວໜ້າດ່ານພາສີທ້ອງຖີ່ນ ບ້ານວັງ, ແຂວງ ວຽງຈັນ ເປັນຮອງຫົວໜ້າພາສີ ປະຈຳ ແຂວງ ວຽງຈັນ.

ໃນພິທີ ທ່ານ ຄຳເຫຼັກ ທອງສະຫວັນ ກຳມະການພັກແຂວງ ຫົວໜ້າພະແນກ ການເງິນ ແຂວງ ວຽງຈັນ ໄດ້ລາຍງານ ສະພາບລວມໂດຍຫຍໍ້ ​ໃນການຈັດຕັ້ງການ​ເຄື່ອນ​ໄຫວ​ ​ແລະ ການປະຕິບັດແຜນງົບປະມານແຫ່ງລັດຂອງ​ແຂວງ​ວຽງ​ຈັນ ​ໃນໄລຍະ 9 ເດືອນ ປີ 2021.

ປະຈຸບັນ ຄະນະພັກຮາກຖານພະແນກການເງິນ ປະກອບມີ 5 ສະຫາຍ, ປະກອບ​ມີ 6 ໜ່ວຍ​ພັກ​ຂື້ນ​ກັບ; ມີ​ສະມາຊິກ​ພັກ​ທັງ​ໝົດ 115 ສະຫາຍ, ຍິງ 45 ສະຫາຍ, ​

ພະນັກງານທົ່ວແຂວງ ລວມທັງ​ໝົດມີ: 39​1 ຄົນ, ​ເປັນ​ຍິງ 152 ຄົນ ( ການ​ເງິນ, ອາກອນ, ຄັງ​ເງິນ, ກອງ​ກວດກາ​ພາສີ ) ຜ່ານ​ການຈັດ​ຕັ້ງປະຕິບັດ​ລາຍຮັບງົບປະມານ​ ​ໃນ 9 ​ເດືອນ ປີ 2021 (ພູດ​ທ້ອງ​ຖິ່ນ) ປະຕິບັດ​ໄດ້​ທັງ​ໝົດ 104,33 ຕື້​ກີບ, ​ເທົ່າ​ກັບ 49,24% ຂອງ​ແຜນ​ປີ (ຕົວ​ເລກ​ແຜນ​ລາຍ​ຮັບ​ປະຈຳ​ປີ 2021 ​​ມີທັງ​ໝົດ 211,87  ລ້ານກີບ ).

ມາຮອດປະຈຸບັນສາມາດ ອະນຸມັດລາຍຈ່າຍໄດ້ທັງໝົດ 385,88 ຕື້ກີບ, ​ເທົ່າ​ກັບ 65,50% ຂອງ​ແຜນການ​ປີ (ແຜນການປີ 588,23 ຕື້ກີບ, ລວມທັງແຜນລາຍຈ່າຍເງິນລົງທຶນປົກກະຕິຂອງລັດ); ຮັບດຸ່ນດ່ຽງຈາກສູນກາງ: ແມ່ນປະຕິບັດໄດ້ຕາມແຜນການງວດ ຄືປະຕິບັດໄດ້ 262,37 ຕື້ກີບ, ເທົ່າກັບ 69,71% ຂອງແຜນປີ.

ໂອກາດສຳຄັນນີ້ ຍັງໄດ້ຮັບຟັງການໂອ້ລົມ ຈາກທ່ານເຈົ້າແຂວງໆ ວຽງຈັນ, ເຊິ່ງບາງຕອນທ່ານກ່າວວ່າ :

ຄືດັ່ງທີ່ຮູ້ນຳກັນແລ້ວວ່າ: ການ​ແຕ່ງຕັ້ງ, ຍົກຍ້າຍ ຫຼື ປັບປຸງການຈັດຕັ້ງ ແມ່ນໜ້າທີ່ ມັນ​ແມ່ນ​ກົດເກນແຫ່ງການຄົງຕົວ ແລະ ຂະຫຍາຍຕົວຂອງລະບົບການຈັດຕັ້ງນຳພາ​ຂອງ​ພັກ-ລັດ,​ ແຕ່ສູນກາງຮອດທ້ອງຖິ່ນທີ່ມີການເຄື່ອນເໜັງໄປຕາມການເວລາ, ຕາມ​ຄວາມ​ຮຽກຮ້ອງ​ຕ້ອງການ ​​ຂອງ​ໜ້າ​ທີ່​ການ​ເມືອງ​ໃນ​ໄລຍະ​ໃໝ່, ການແຕ່ງຕັ້ງມອບໝາຍໜ້າທີ່ໃໝ່ ແມ່ນມີກຽດສັກສີອັນສູງສົ່ງທີ່ສຸດສໍາລັບພວກສະຫາຍ, ເນື່ອງຈາກວ່າຜ່ານມາໄດ້ຮັບໜ້າທີ່ຂັ້ນນັ້ນ ມາດຽວນີ້ ກໍ່ຂື້ນຮັບ   ໜ້າທີ່ໃໝ່ສູງຂື້ນຕື່ມ ແລະ ເປັນການມອບໝາຍໜ້າທີ່ການເມືອງອັນໜັກໜ່ວງຂື້ນຕື່ມ.

ເອົາໃຈໃສ່ສືບຕໍ່ວຽກງານຂອງຕົນ ຕາມການມອບໝາຍ ແລະ ເຮັດສຳເລັດໜ້າທີ່ ທີ່ສຳຄັນ ການດຳລົງຊີວິດແບບໃໝ່ ຕິດພັນກັບສະພາບຕົວຈິງເຮັດໃຫ້ວຽກງານຂອງຕົນມີຄວາມກ້າວໜ້າຂື້ນໄປເລື້ອຍໆ.

ທ່ານ ທະວີໄຊ ທຳມະວົງ ຫົວໜ້າພາສີປະຈຳແຂວງ ວຽງຈັນ.

ຕອນທ້າຍພິທີ ທ່ານ ທະວີໄຊ ທຳມະວົງ ຫົວໜ້າພາສີປະຈຳແຂວງ ວຽງຈັນ ໄດ້ຕາງໜ້າໃຫ້ກັບພະແນກ ການເງິນ ຂື້ນຮັບຄຳໂອວາດຂອງທ່ານ ເຈົ້າແຂວງ ວຽງຈັນຕື່ມອີກ.

ພາບ ແລະ ຂ່າວ : ພ.ບົວທອງ

Leave a Reply

Your email address will not be published. Required fields are marked *