Vieng Chanh News

ແຂວງວຽງຈັນອອນລາຍ

ການນຳແຂວງວຽງຈັນລົງຊຸກຍູ້ຊີ້ນຳວຽກງານຕ້ານ ແລະ ສະກັດກັ້ນການແຜ່ລະບາດຂອງ ພະຍາດ ໂຄວິດ – 19 ຢູ່ເມືອງແກ້ວອຸດົມ.

1 min read

ວັນທີ 14 ຕຸລາ 2021 ຜ່ານມານີ້ ທ່ານ ເທບພະໄທ ແກ້ວເຂັມເພັດ ຄະນະປະຈຳພັກແຂວງ ປະທານແນວລາວສ້າງຊາດ ແຂວງວຽງຈັນ ໄດ້ລົງຊຸກຍູ້ຊີ້ນຳການຈັດຕັ້ງປະຕິບັດວຽກງານຕ້ານ-ສະກັດກັ້ນການແຜ່ລະບາດຂອງພະຍາດ ໂຄວິດ – 19 ຂື້ນຢູ່ທີ່ສະໂມສອນໃຫຍ່ເມືອງແກ້ວອູດົມ ໂດຍໃຫ້ກຽດຕ້ອນຮັບຂອງ ທ່ານ ສີງຄຳ ມະນີວັນ ກໍາມະການພັກເມືອງ ຮອງເຈົ້າເມືອງ ທັງເປັນຫົວໜ້າຄະນະສະເພາະກິດຕ້ານ-ສະກັດກັ້ນພະຍາດໂຄວິດ-19 ເມືອງແກ້ວອຸດົມ,ມີບັນດາຄະນະສະເພາະກິດຕ້ານ-ສະກັດກັ້ນການແຜ່ລະບາດຂອງພະຍາດ ໂຄວິດ – 19 ເມືອງເຂົ້າຮ່ວມຕ້ອນຮັບ.

ໃນໂອກາດດັ່ງກ່າວ ທ່ານ ສີງຄຳ ມະນີວັນ ກໍາມະການພັກເມືອງ ຮອງເຈົ້າເມືອງ ທັງເປັນຫົວໜ້າຄະນະສະເພາະກິດຕ້ານ-ສະກັດກັ້ນການແຜ່ລະບາດຂອງພະຍາດ ໂຄວິດ – 19 ເມືອງແກ້ວອຸດົມ ໄດ້ໃຫ້ກຽດຂື້ນລາຍງານການຈັດຕັ້ງປະຕິບັດວຽກງານຕ້ານ-ສະກັດກັ້ນການແຜ່ລະບາດຂອງພະຍາດ ໂຄວິດ – 19 ພາຍໃນເມືອງແກ້ວອູດົມ ໃນໄລຍະຜ່ານມາໂດຍໄດ້ຈັດຕັ້ງປະຕິບັດຜັນຂະຫຍາຍບັນດາຄໍາສັ່ງ,ແຈ້ງການຂອງຂັ້ນເທິງແຕ່ລະສະບັບມາເປັນແຈ້ງການຂອງຄະນະສະເພາະກິດເມືອງ ຈາກນັ້ນລົງເຜີຍແຜ່ຢູ່ແຕ່ລະກຸ່ມບ້ານຢ່າງທົ່ວເຖິງ,ເຂັ້ມງວດຈຸດກວດກາ ກັ່ນກອງຄົນເຂົ້າ – ອອກຕາມຊາຍແດນເມືອງຕໍ່ເມືອງ,ບ້ານຕໍ່ບ້ານ,ໂຮງຈັກໂຮງງານ ແລະ ສໍານັກງານຫ້ອງການກໍ່ໄດ້ຈັດຕາຕະລາງມາປະຈໍາການ ແລະ ມອບໃຫ້ອຳນາດການປົກຄອງບ້ານໄດ້ຈັດຕັ້ງຈຸດກວດກາຄົນເຂົ້າ-ອອກໃນຂອບເຂດຄວາມຮັບຜິດຊອບຂອງຕົນຢ່າງເຂັ້ມງວດ.


ປະຈຸບັນເມືອງແກ້ວອຸດົມ ໄດ້ພົບຜູ້ຕິດເຊື້ອໃນຊຸມຊົນສະສົມທັງໝົດ 169 ຄົນ,ຍີງ 89 ຄົນ,ປີ່ນປົວຫາຍດີແລ້ວ 4 ຄົນ,ຍີງ 2 ຄົນ,ກຳລັງປິ່ນປົວ 165 ຄົນ,ຍີງ 87 ຄົນ,ໃນນັ້ນເຂົ້າປີ່ນປົວຢູ່ສູນເມືອງໂພງໂຮງ ຈຳນວນ 59 ຄົນ,ເຂົ້າປີ່ນປົວຢູ່ໂຮງຮຽນພະຍາບານ 61 ຄົນ ແລະ ເຂົ້າປິ່ນປົວຢູ່ສູນເມືອງແກ້ວອຸດົມ ຈຳນວນ 34 ຄົນ,ຍີງ 12 ຄົນ ສ່ວນຕົວເລກສະສົມໃນການເກັບຕົວຢ່າງທັງໝົດ ຈຳນວນ 892 ຄົນ,ຍີງ 447 ຄົນ,ຕິດຕາມແຮງງານທີ່ມາຈາກເຂດສຽ່ງທັງພາຍໃນ ແລະ ຕ່າງປະເທດມີຕົວເລກສະສົມທັງໝົດ 788 ຄົນ,ຍີງ 429 ຄົນ,ຍັງຕິດຕາມອາການ ຈຳນວນ 587 ຄົນ,ຍີງ 318 ຄົນ.


ປະຈຸບັນຄະນະພັກ,ອົງການປົກຄອງ ກໍ່ຄືຄະນະສະເພາະກິດຂອງເມືອງໄດ້ສຸມໃສ່ບໍລິການສັກຢາວັກຊີນໃນເຂັມທີ 1 ຈຳນວນ 10.312 ຄົນ ແລະ ເຂັມທີ 2 ຈຳນວນ 3.301 ຄົນ,ໄດ້ກຳນົດເອົາໂຮງຮຽນອານຸບານໄຟຟ້າ ຢູ່ບ້ານແສງສະຫວ່າງ ເປັນສູນປີ່ນປົວຂອງເມືອງ,ໃນນັ້ນມີເຄື່ອງອຸປະກອນຮັບໄຊ້ຄົບຊຸດ ເພື່ອຮັກສາຄວາມເປັນລະບຽບຮຽບຮ້ອຍຢູ່ພາຍໃນສູນປີ່ນປົວດັ່ງກ່າວ,ປະຈຸບັນເມືອງແກ້ວອຸດົມແມ່ນໄດ້ກຳນົດເອົາ ຈຳນວນ 9 ບ້ານເປັນເຂດພື້ນທີ່ສີແດງ,ມີ 3 ບ້ານເປັນເຂດພື້ນທີ່ສີເຫຼືອງ ແລະ ສູນກັກກັນເພີ້ມເຕີມຈຳນວນ 5 ສູນເຊີ່ງປະກອບມີ: ສູນໂຮງຮຽນພູເຂົາຄຳ,ສູນໂຮງຮຽນທ່າລາດ,ສູນໂຮງຮຽນໂພນສະຫວັນ ແລະ ສູນບ້ານແສງສະຫວ່າງ ແລະ ມີ 1 ສູນກັກກັນຂອງເມືອງຕື່ມອີກ.ໃນໂອກາດດັ່ງກ່າວຄະນະຜູ້ແທນກອງປະຊຸມກໍ່ໄດ້ຜັດປຽ່ນກັນຂື້ນປະກອບຄຳເຫັນຢ່າງກົງໄປກົງມາ ເພື່ອຈະນຳເອົາເນື້ອໃນຈິດໃຈເຂົ້າໃນວຽກງານໃຫ້ມີຜົນສະເລັດຢ່າງຈົບງາມ.


ຈາກນັ້ນ ທ່ານ ເທບພະໄທ ແກ້ວເຂັມເພັດ ຄະນະປະຈຳພັກແຂວງ ປະທານແນວລາວສ້າງຊາດແຂວງວຽງຈັນ ໄດ້ມີຄໍາເຫັນຊີ້ນໍາ ກ່ອນອື່ນທ່ານ ໄດ້ກ່າວຍ້ອງຍໍຊົມເຊີຍຕໍ່ຄະນະສະເພາະກິດເມືອງທີ່ໄດ້ພ້ອມກັນເອົາໃຈໃສ່ ແລະ ເຮັດໃຫ້ວຽກງານຕ້ານ-ສະກັດກັ້ນພະຍາດໂຄວິດ – 19,ໃນປະຈຸບັນ ສາມາດປ້ອງກັນ ເຮັດໃຫ້ບໍ່ມີຜູ້ຕິດເຊື້ອເພີ່ມຂື້ນຢູ່ພາຍເມືອງແກ້ວອຸດົມ, ແຕ່ເຖິງຢ່າງໃດກໍ່ຕາມບັນດາເມືອງອ້ອມຂ້າງຍັງມີກໍລະນີຜູ້ຕິດເຊື້ອເພີ່ມຂຶ້ນໃນແຕ່ລະວັນ,ສະນັ້ນຈຶ່ງໄດ້ແນະນໍາໃຫ້ຄະນະສະເພາະກິດເມືອງຈົ່ງສືບຕໍ່ຍົກລະດັບປ້ອງກັນ,ເຝົ້າລະວັງຂຶ້ນຕື່ມ,ມອບຄວາມຮັບຜິດຊອບໃຫ້ ປກຊ – ປກສ ແຕ່ລະບ້ານເຝົ້າລະວັງຕິດຕາມຄົນເຂົ້າ – ອອກຢ່າງເຂັ້ມງວດ,ມອບໃຫ້ຄະນະຮັບຜິດຊອບຈໍາກັດການເດີນທາງເຂົ້າ – ອອກເມືອງຂອງປະຊາຊົນທີ່ບໍ່ມີຄວາມຈໍາເປັນ, ການຊຸມແຊວ ແລະ ງານປະເພນີຕ່າງໆໃຫ້ປະຕິບັດມາດຕະການຂອງຄະນະສະເພາະກິດວາງອອກຢ່າງເຂັ້ມງວດ.

ຂ່າວ: ດາວເພັດ ແກ້ວປະເສິດ

Leave a Reply

Your email address will not be published. Required fields are marked *