Vieng Chanh News

ແຂວງວຽງຈັນອອນລາຍ

ກອງປະຊຸມທາບທາມຮ່າງກົດໝາຍສະບັບປັບປຸງ ແລະ ສະບັບສ້າງໃໝ່ຂອງ 8 ຂະແໜງການ

1 min read

ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງວຽກງານໃນປະຈຸບັນ ກໍ່ຄືສະເພາະໜ້າ ແລະ ຍາວນານ, ໂດຍສະເພາະການສ້າງ ແລະ ປັບປຸງກົດໝາຍ ຕາມການຂະຫຍາຍຕົວຂອງເສດຖະກິດສັງຄົມ, ແນໃສ່ສ້າງໃຫ້ທຸກຂະແໜງການໄດ້ຈັດຕັ້ງ ແລະ ເຄື່ອນໄຫວພາຍໃຕ້ກົດໝາຍ ເຮັດໃຫ້ປະຊາຊົນບັນດາເຜົ່າຮັບຮູ້ເຂົ້າໃຈກົດໝາຍນັບມື້ກວ້າງ ຂວາງເປັນຈິນຕະນາການ.

 

ໃນວັນທີ 14 ຕຸລາ 2021 ນີ້ ສະມາຊິກສະພາປະຊາຊົນແຂວງວຽງຈັນ ປະຈໍາໜ່ວຍເລືອກຕັ້ງເມືອງທຸລະຄົມ ໄດ້ເປີດກອງປະຊຸມທາບທາມຮ່າງກົດໝາຍຂຶ້ນ ຢູ່ທີ່ສະໂມສອນເມືອງທຸລະຄົມ, ໂດຍການນໍາພາຂອງ ທ່ານ ນາງ ຈັນທະຄອນ ສີອໍາພອນ ກໍາມະການພັກແຂວງ, ຮອງປະທານສະພາປະຊາຊົນແຂວງ, ສະມາຊິກສະ ພາແຂວງ ປະຈໍາເມືອງທຸລະຄົມ, ມີເລຂາພັກເມືອງ, ປະທານຄະນະກວດກາພັກ-ລັດເມືອງ, ສະມາຊິກສະພາປະຊາຊົນແຂວງປະຈໍາເມືອງ, ຄະນະປະຈໍາພັກເມືອງ, ປະທານແນວລາວສ້າງຊາດເມືອງທຸລະຄົມ, ສະມາຊິກສະພາປະຊາຊົນແຂວງປະຈໍາເມືອງ ເຂົ້າຮ່ວມ.

ໃນນັ້ນ ມີຕົວແທນຂອງ 8 ຫ້ອງການພາຍໃນເມືອງເຂົ້າຮ່ວມຄົ້ນຄວ້າ, ຈຸດປະສົງຂອງກອງປະຊຸມຄັ້ງນີ້ກໍ່ເພື່ອຊ່ວຍປະ ກອບຄໍາຄິດຄໍາເຫັນ, ກວດກາຮຽບຮຽງ ທາງດ້ານເນື້ອໃນໃຫ້ຮັດກຸມກະທັດຮັດຂຶ້ນຕື່ມ, ນັບທັງປຽບທຽບດ້ານໂຄງສ້າງ, ພາກ, ໝວດ, ມາດຕາ ຂອງກົດໝາຍ ຍົກໃຫ້ເຫັນພຶດຕິກໍາການຈັດຕັ້ງປະຕິບັດຕົວຈິງຢູ່ຂັ້ນເມືອງໄລຍະຜ່ານມາ, ສັງລວມໃຫ້ໄດ້ແນວຄວາມຄິດທີ່ເປັນເອກະພາບລວມສູນ, ແຕ່ໂດຍລວມ ແລະ ພື້ນຖານສ່ວນໃຫຍ່ແລ້ວ ບັນດາຜູ້ເຂົ້າຮ່ວມຕ່າງກໍ່ເຫັນດີສະໜັບສະໜູນກົດໝາຍສ້າງໃໝ່ 3 ສະບັບ

ເປັນຕົ້ນກົດໝາຍວ່າດ້ວຍການສໍາຫລວດວັດແທກ ແລະ ສ້າງແຜນທີ່, ກົດໝາຍວ່າດ້ວຍຊາຍແດນແຫ່ງຊາດ, ກົດໝາຍວ່າດ້ວຍເຕັກໂນໂລຊີລະດັບສູງ ແລະ ກົດໝາຍສະບັບປັບປຸງ 5 ສະບັບ ຄື: ກົດໝາຍວ່າດ້ວຍລັດຖະບານ, ກົດໝາຍວ່າດ້ວຍໂທລະຄົມມະນາຄົມ, ກົດໝາຍວ່າດ້ວຍມໍຣະດົກແຫ່ງຊາດ, ກົດໝາຍວ່າດ້ວຍການຄວບຄຸມຢາສູບ, ກົດໝາຍວ່າດ້ວຍງົບປະມານແຫ່ງລັດ.

ກອງປະຊຸມດໍາເນີນໄປດ້ວຍບັນຍາກາດເຄັ່ງຮ້ອນ ແລະ ມີເນື້ອໃນເລິກເຊິ່ງ, ບັນດາຜູ້ເຂົ້າຮ່ວມໄດ້ເອົາໃຈໃສ່ຄົ້ນຄວ້າຄິດຫງໍາ, ສຸມສະຕິປັນຍາຄົ້ນຄວ້າປຶກສາຫາລືຮ່ວມກັນຢ່າງກົງໄປກົງມາ, ຜັດປ່ຽນກັນຂຶ້ນປະກອບຄໍາຄິດຄໍາເຫັນ, ຄະນະປະທານໄດ້ຕັ້ງຄໍາຖາມເຈາະຈີ້ມໃນຫລາຍໝວດ, ຫລາຍມາດຕາ ພ້ອມທັງສະເໜີໃຫ້ແຕ່ລະຫ້ອງການສັງ ລວມໃນຈຸດທີ່ຢາກໃຫ້ປັບປຸງເປັນລາຍລັກອັກສອນສົ່ງໃຫ້ກອງເລຂາສະມາຊິກສະພາປະຈໍາເມືອງໃຫ້ທັນເວລາ.

ຂ່າວ: ຫ້ອງການ ຖວທ ເມືອງທຸລະຄົມ.

Leave a Reply

Your email address will not be published. Required fields are marked *