Vieng Chanh News

ແຂວງວຽງຈັນອອນລາຍ

ສະພາປະຊາຊົນແຂວງວຽງຈັນ ລົງທາບທາມຮ່າງກົດໝາຍ ຢູ່ເມືອງວຽງຄໍາ

1 min read

ໃນຕອນເຊົ້າຂອງວັນທີ 15 ຕຸລາ 2021 ນີ້ ສະພາປະຊາຊົນແຂວງວຽງຈັນໄດ້ລົງມາທາບທາມຮ່າງກົດໝາຍ ຢູ່ທີ່ຫ້ອງປະຊຸມຊັ້ນ 4 ຂອງຫ້ອງວ່າການເມືອງວຽງຄຳ.

ເຊິ່ງນໍາພາໂດຍທ່ານ ນາງມະໄລສີ ທໍາມະໂຄດ ກໍາມະການພັກແຂວງ ປະທານສະຫະພັນແມ່ຍິງແຂວງວຽງຈັນ ທັງເປັນສະມາຊິກສະພາແຫ່ງຊາດ ຊຸດທີ 9 ປະຈໍາເຂດເລືອກຕັ້ງທີ 10 ແຂວງວຽງຈັນ ພ້ອມດ້ວຍຄະນະຮັບຜິດຊອບ, ໃຫ້ກຽດເຂົ້າຮ່ວມໃນຄັ້ງນີ້ໂດຍທ່ານ ສວຍ ວົງສາລາດ ຮອງເລຂາພັກເມືອງ, ປະທານກວດກາພັກເມືອງວຽງຄໍາ ທັງເປັນສະມາຊິກສະພາປະຊາຊົນແຂວງວຽງຈັນ ຊຸດທີ 2 ປະຈໍາເຂດເລືອກຕັ້ງເມືອງວຽງຄໍາ, ມີທ່ານ ນາງຂັນຄໍາ ສຸດສະນະຫົງ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງວຽງຄໍາ ທັງເປັນສະມາຊິກສະພາປະຊາຊົນແຂວງວຽງຈັນ ຊຸດທີ 2 ປະຈໍາເຂດເລືອກຕັ້ງເມືອງວຽງຄໍາ, ມີບັນດາຫ້ອງການທີ່ກ່ຽວຂ້ອງຂັ້ນເມືອງເຂົ້າຮ່ວມ.


ທ່ານ ນາງ ມະໄລສີທໍາມະໂຄດ ໄດ້ກ່າວວ່າ: ຈຸດປະສົງທີ່ລົງມາທາບທາມຮ່າງກົດໝາຍໃນຄັ້ງນີ້ກໍ່ເພື່ອຈະໄດ້ນໍາເອົາຄໍາຄິດຄໍາເຫັນຂອງບັນດາຫ້ອງການທີ່ກ່ຽວຂ້ອງຂັ້ນເມືອງນໍາໄປຄົ້ນຄ້ວາເພື່ອແນໃສ່ການສ້າງ ແລະ ປັບປຸງກົດໝາຍໃຫ້ສອດຄ່ອງກັບຕົວຈິງຂອງຮາກຖານ, ສໍາລັບກົດໝາຍທີ່ນໍາມາທາບທາມໃນຄັ້ງນີ້.

ປະກອບມີ8 ກົດໝາຍ, ໃນນີ້ກົດໝາຍທີ່ປັບປຸງມີ 5 ກົດໝາຍຄື: 1.ກົດໝາຍວ່າດ້ວຍລັດຖະບານ, 2.ກົດໝາຍວ່າດ້ວຍການຄົມມະນາຄົມ, 3.ກົດໝາຍວ່າດ້ວຍມໍລະດົກແຫ່ງຊາດ, 4.ກົດໝາຍວ່າດ້ວຍການປັບປຸງບາງມາດຕາຂອງກົດໝາຍງົບປະມານແຫ່ງລັດ, 5.ກົດໝາຍວ່າດ້ວຍການຄວບຄຸມຢາສູບ ແລະ ກົດໝາຍທີ່ສ້າງໃໝ່ມີ 3 ກົດໝາຍຄື: 1.ກົດໝາຍວ່າດ້ວຍການສໍາຫຼວດວັດແທກ ແລະ ສ້າງແຜນທີ່, 2.ກົດໝາຍວ່າດ້ວຍຊາຍແດນແຫ່ງຊາດ, 3.ກົດໝາຍວ່າດ້ວຍເຕັກໂນໂລຊີລະດັບສູງ.

ພ້ອມດຽວກັນນີ້ຜູ້ເຂົ້າຮ່ວມກອງປະຊຸມກໍ່ໄດ້ມີການຄົ້ນຄ້ວາເນື້ອໃນຂອງແຕ່ລະກົດໝາຍດ້ວຍຄວາມຮັບຜິດຊອບສູງ ພ້ອມທັງຜັດປ່ຽນກັນຂຶ້ນປະກອບຄໍາເຫັນໃສ່ຮ່າງກົດໝາຍ ແລະ ໄດ້ສໍາເລັດຕາມລະດັບຄາດໝາຍທ່ີ່ກໍານົດໄວ້.


ຂ່າວ: ຫ້ອງການ ຖວທ ເມືອງວຽງຄຳ

Leave a Reply

Your email address will not be published. Required fields are marked *

You may have missed