Vieng Chanh News

ແຂວງວຽງຈັນອອນລາຍ

ຮອງເລຂາພັກແຂວງວຽງຈັນລົງຊຸກຍູ້ຊີ້ນຳວຽກງານຮາກຖານຢູ່ຈຸດສຸມພັດທະນາຜາເຈົ້າ ເມືອງກາສີ

1 min read

ວັນທີ 24 ພະຈິກ 2021 ນີ້, ທ່ານ ທອງສະຫວັນ ວົງສໍາພັນ ຮອງເລຂາພັກແຂວງວຽງຈັນ ພ້ອມດ້ວຍຄະນະ ໄດ້ລົງຊຸກຍູ້ຊີ້ນຳວຽກງານກໍ່ສ້າງຮາກຖານການເມືອງພັດທະນາຊົນນະບົດ ຕິດພັນກັບວຽກງານສາມສ້າງ ຢູ່ຈຸດສຸມພັດທະນາຜາເຈົ້າ ເມືອງກາສີ ແຂວງວຽງຈັນ.

ໂດຍການໃຫ້ກຽດຕ້ອນຮັບຂອງ ທ່ານ ສີທົນ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ, ບັນດາຄະນະນຳຂອງເມືອງ, ມີພະນັກງານຮາກຖານ ພ້ອມດ້ວຍອໍານາດການປົກຄອງບ້ານໃນກຸ່ມຜາເຈົ້າເຂົ້າຮ່ວມທັງໝົດ 40 ກວ່າທ່ານ. ໃນໂອກາດນີ້ທ່ານ ບຸນທ່ຽງ ວິລະພົນ ກຳມະການພັກເມືອງ ຫົວໜ້າກຸ່ມຈຸດສຸມພັດທະນາຜາເຈົ້າ ໄດ້ຂື້ນລາຍງານໂດຍຫຍໍ້ກ່ຽວກັບການເຄື່ອນໄຫວຈັດຕັ້ງປະຕິບັດວຽກງານການກໍ່ສ້າງຮາກຖານການເມືອງ ຕິດພັນກັບວຽກງານສາມສ້າງ ປະຈຳເດືອນ 7,8,9 ແລະ ທິດທາງແຜນການເດືອນ 11,12 ປີ 2021. ເຊີ່ງສະແດງອອກຄື: ເຂດຈຸດສຸມພັດທະນາຜາເຈົ້າປະກອບມີ 07 ບ້ານ, ມີ 1,007 ຫຼັງຄາເຮືອນ, ມີ 1,105 ຄອບຄົວ, ມີພົນລະເມືອງທັງໝົດ 5,999 ຄົນ, ຍິງ 2,885 ຄົນ. ປະກອບມີ 03 ເຜົ່າຄື: ເຜົ່າລາວມີ 401ຄົນ, ຍິງ 193 ຄົນ; ເຜົ່າກຶມມຸມີ 3,387 ຄົນ, ຍິງ 1,683 ແລະ ເຜົ່າມົ້ງມີ 2,211 ຄົນ, ບິງ 1,009 ຄົນ. ທົ່ວຈຸດສຸມຜາເຈົ້າມີໜ່ວຍພັກ 07 ໜ່ວຍ, ມີສະມາຊິກພັກທັງມົດ 84 ສະຫາຍ, ຍິງ 08 ສະຫາຍ, ສະມາຊິກພັກສໍາຮອງ 21 ສະຫາຍ, ຍິງ 02 ສະຫາຍ ແລະ ມີພະນັກງານກໍ່ສ້າງຮາກຖານການເມືອງທັງໝົດ 07 ສະຫາຍ ໃນນັ້ນຂັ້ນແຂວງ 02 ສະຫາຍ, ຂັ້ນເມືອງ 05 ສະຫາຍ.

ໃນໄລຍະຜ່ານມາ ຄະນະພັກກຸ່ມ ກໍຄືພະນັກງານຮາກຖານໄດ້ຈັດຕັ້ງເຊື່ອມຊືມບັນດາເອກະສານທີ່ສຳຄັນຂອງພັກ ຂອງລັດ ເຮັດໃຫ້ບັນດາພໍ່ແມ່ປະຊາຊົນໃຫ້ຮັບຮູ້ ແລະ ເຂົ້າໃຈຢ່າງເລິກເຊີ່ງ ເປັນຕົ້ນແມ່ນ ເອກະສານວາລະແຫ່ງຊາດ, ມະຕິກອງປະຊຸມໃຫຍ່ຂອງພັກແຕ່ລະຂັ້ນ, ໄດ້ຈັດກອງປະຊຸມຮ່ວມກັບອໍານາດການປົກຄອງ 07 ບ້ານ.

ເພື່ອຄົ້ນຄວ້າປຶກສາຫາລືວຽກງານບໍລິຫານບ້ານ ໂດຍສະເພາະການຂຽນໂຄງຮ່າງການຈັດຕັ້ງບ້ານ ບັນຈຸຊັບຊ້ອນບຸກຄະລາກອນໃສ່ 05 ໜ່ວຍງານຂອງບ້ານ, ໄດ້ຮ່ວມກັບການຈັດຕັ້ງບ້ານຜາເຈົ້າສະກັດກັ້ນ ແລະ ຈັບກຸມປະຊາຊົນຜູ້ທີ່ລັກລອບຄ້ຂາຍຢາເສບຕິດໄດ້ 01 ຄົນ ພ້ອມທັງນໍາສົ່ງ ປກສ ເມືອງລົງໂທດຕາມລະບຽບກົດໝາຍ, ໄດ້ສົມທົບກັບອຳນາການປົກຄອງບ້ານ ແລະ ພາກສ່ວນທີ່ກ່ຽວຂ້ອງຂັ້ນເມືອງ ຂັ້ນແຂວງ ລົງສ້ອມແປງໂທລະໂຄ່ງຂອງບ້ານທີ່ເປ່ເພສຳເລັດ.

ສໍາລັບທິດທາງແຜນການໃນຕໍ່ໜ້າຈະສືບຕໍ່ລົງຕິດຕາມຊຸກຍູ້ ແລະ ປະເມີນແຕ່ລະບ້ານຄືນ ກ່ຽວກັບບ້ານທີ່ໄດ້ຮັບນາມມະຍົດຕ່າງ, ກະກຽມແຕ້ມແບບແຜນຜັງຫ້ອງການຈຸດສຸມພັດທະນາຜາເຈົ້າຫຼັງໃໝ່ໃຫ້ສໍາເລັດ, ສ້າງແບບຟອມເກັບກຳຂໍ້ມູນຄວາມຕ້ອງການຂອງປະຊາຊົນພາຍໃນ 07 ບ້ານ ເພື່ອຊອກຫາວິທີຊຸກຍູ້ສົ່ງເສີມ, ຂື້ນແຜນລົງແກ້ໄຂຂໍ້ຂັດແຍ່ງທີ່ດິນຂອງປະຊາຊົນກັບບໍລິສັດ ຈຳນວນ 02 ກໍລະນີ ໃຫ້ສຳເລັດ.

ຫຼັງຈາກນັ້ນ ທ່ານ ໄຜ່ລ້ອມ ສິນນະວົງ ຮອງຫົວນ້າຫ້ອງວ່າການ ແຂວງວຽງຈັນ ໄດ້ຂື້ນຜ່ານບົດແນະນຳ ສະບບັບເລກທີ 017/ ຄປພ,ວຈ ລົງວັນທີ່ 15 ຕຸລາ 2021 ກ່ຽວກັບການຈັດຕັ້ງປະຕິບັດມະຕິຂອງຄະນະປະຈຳພັກແຂວງວຽງຈັນ ສະບັບເລກທີ່ 168/ ຄປພ,ວຈ ວ່າດ້ວຍ ວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕິດພັນກັບວຽກງານສາມສ້າງ ແຕ່ນີ້ຫາກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງວຽງຈັນ, ພ້ອມນັ້ນໃນກອງປະຊຸມຍັງໄດ້ມີການປະກອບຄຳຄິດ ຄຳເຫັນຢ່າງກົງໄປກົງມາ ເພື່ອເຮັດໃຫ້ການເຄື່ອນໄຫວປະຕິບັດວຽກງານກໍ່ສ້າງຮາກຖານການເມືອງຮອບດ້ານຢູ່ເມືອງກາສີ ເວົ້າລວມ ເວົ້າສະເພາະກໍແມ່ນຢູ່ຈຸດສຸມພັດທະນາຜາເຈົ້າ ໃຫ້ມີຄວາມໜັກແໜ້ນເຂັ້ມແຂງຂື້ນຕື່ມ.

ໃນໂອທ້າຍຍັງໄດ້ຮັບຟັງການໂອລົມ ທ່ານ ທອງສະຫວັນ ວົງສຳພັນ ຮອງເລຂາພັກແຂວງ ເຊີ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ, ພະນັກງານຮາກຖານຕະຫຼອດຮອດອຳນາດການປົກຄອງບ້ານພາຍໃນກຸ່ມຈຸດສຸມພັດທະນາຜາເຈົ້າ ທີ່ສາມາດຍາດໄດ້ຜົນງານຫຼາຍດ້ານໃນໄລຍະສາມເດືອນຜ່ານມາ ພ້ອມນັ້ນກໍ່ໄດ້ເໜັ້ນໜັກໃຫ້ສືບຕໍ່ເອົາໃຈໃສ່ປະຕິບັດບາງບັນຫາໃຫ້ເຂັ້ມງວດຂື້ນຕື່ມອີກ ໂດຍສະເພາະພະນັກງານຮາກຖານ ຕ້ອງກຳແໜ້ນຕາມ4ເນື້ອໃນ 4ຄາດໝາຍ ປະຕິບັດພາລະບົດບາດ, ສິດ ແລະ ໜ້າທີ່ຂອງພະນັກງານຮາກຖານຢ່າງເຂັ້ມງວດ.

ສືບຕໍ່ເອົາໃຈໃສ່ສຶກສາອົບຮົມ ດ້ານການເມືອງ-ແນວຄິດໃຫ້ແກ່ປະຊາຊົນ ໃຫ້ມີແນວຄິດອຸ່ນອຽນທຸ່ນທ່ຽງ ເຊື່ອໝັ້ນຕໍ່ການຊີ້ນຳ-ນຳພາ ຂອງພັກ-ລັດ ວາງອອກໃນແຕ່ລະໄລຍະ ເພື່ອສ້າງໃຫ້ອຳນາດການປົກຄອງແຕ່ບ້ານ ມີຄວາມໜັກແໜ້ນເຂັ້ມແຂງຢ່າງຮອບດ້ານ, ການປະຕິບັດວຽກງານຕ້ອງຖືເອົາລະບອບລວມສູນປະຊາທິປະໄຕເປັນໝູ່ຄະນະ, ເອົາໃຈໃສ່ເຕົ້າໂຮມຄວາມສາມັກຄີ ລະຫວ່າງພັກ-ລັດ ກັບປະຊາຊົນໃຫ້ເປັນປຶກແຜ່ນ, ສືບຕໍ່ເຮັດລະບອບປະສານງານໃຫ້ຈອດກັນ ລະຫວ່າງຂັ້ນລຸ່ມກັບຂັ້ນເທີງ, ຄຽງຄູ່ກັນນັ້ນ ກໍ່ໃຫ້ຕັ້ງໜ້າແກ້ໄຂບັນດາປະກົດການຫຍໍ້ທໍ້ຕ່າງໆ ໃຫ້ລຸດນ້ອຍຖອຍລົງ ແລະ ໝົດໄປເທື່ອລະກ້າວ. ເອົາໃຈໃສ່ລົງຊຸກຍູ້ ສົ່ງເສີມ ຊີ້ນຳໆພາພໍ່ແມ່ປະຊາຊົນໃຫ້ທຳການຜະລິດ ເພື່ອຂາຍກາຍເປັນສິນຄ້າ ໃຫ້ນັບມື້ນັບຫຼາຍຂື້ນເລື້ອຍໆ ບໍ່ວ່າຈະເປັນການປູກຝັງ-ລ້ຽງສັດ ຕາມທ່າແຮງແລະຄວາມອາດສາມາດຂອງແຕ່ລະຂົງເຂດແຕ່ລະບ້ານ.

ໂດຍນຳໃຊ້ເຄື່ອງມືວິທະຍາສາດເຕັກໂນໂລຊີທີ່ທັນສະໄໝເຂົ້າໃນການຜະລິດໃຫ້ນັບມື້ນັບຫຼາຍ, ເອົາໃຈໃສ່ຕິດຕາມ ກວດກາການເຂົ້າ ອອກຂອງປະຊາຊົນຢ່າງເຂັ້ມງວດ ພ້ອມກັນສະກັດກັ້ນການລະບາດຂອງພະຍາດໂຄວິດ-19 ໂດຍການລະດົມໃຫ້ພໍແມ່ປະຊາຊົນຜູ້ທີ່ມີເງື່ອນໄຂໄປຮັບວັກຊີນໃຫ້ຄົບໂດສ໌. ພ້ອມກັນແກ້ໄຂສຶກສາອົບຮົມ ຕິດຕາມເປົ້າໝາຍ ທີ່ກໍ່ໃຫ້ເກີດປະກົດການຫຍໍ້ທໍ້ຕ່າງໆຢູ່ພາຍໃນບ້ານ ເປັນຕົ້ນແມ່ນ: ກຸ່ມຄົນທີ່ບໍ່ຫວັງດີຂີ້ລັກງັດແງະ, ຄ້າຂາຍ-ເສບຢາເສບຕິດ, ຫຼີ້ນການພະນັນ ຂໍ້ຂັດແຍ່ງອື່ນໆ ໃຫ້ນັບມື້ນັບລຸດນ້ອຍຖອຍລົງ ແລະໝົດໄປເທື່ອລະກ້າວ.

(ຂ່າວ: ເມືອງກາສີ )

Leave a Reply

Your email address will not be published. Required fields are marked *

You may have missed