Vieng Chanh News

ແຂວງວຽງຈັນອອນລາຍ

ເມືອງກາສີ ເປີດກອງປະຊຸມອົງການປົກຄອງເມືອງ

1 min read

ໃນຕອນເຊົ້າຂອງວັນທີ 25 ພະຈິກ 2021ນີ້, ຢູ່ທີ່ສະໂມສອນຂອງເມືອງກາສີ ແຂວງວຽງຈັນ ໄດ້ເປີດກອງປະຊຸມອົງການປົກຄອງເມືອງຂື້ນຢ່າງເປັນທາງການ.

ໂດຍການເປັນປະທານຂອງ ທ່ານ ສີທົນ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ. ກອງປະຊຸມ ໄດ້ເປັນກຽດຕ້ອນຮັບການເຂົ້າຮ່ວມຂອງ ທ່ານ ດາວເຮືອງ ນັນທະວົງ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ, ເຂົ້າຮ່ວມມີບັນດາຄະນະປະຈຳ ກຳມະການພັກເມືອ, ຫົວໜ້າຫ້ອງການ, ພະນັກງານອາວຸໂສບຳນານ, ຕາງໜ້ານັກທຸລະກິດ ພ້ອມດ້ວຍເລຂາພັກບ້ານ-ນາຍບ້ານພາຍໃນເມືອງ.

ໃນໂອກາດດັ່ງກ່າວ ທ່ານ ສີທົນ ແສງພະຈັນ ເຈົ້າເມືອງໆກາສີ ໄດ້ໃຫ້ກຽດຂື້ນກ່າວໄຂກອງປະຊຸມ ພ້ອມທັງຜ່ານແຜນການກຳນົດກິດຈະກຳ ຂອງບັນດາຫ້ອງການພາຍໃນເມືອງ ທີ່ຈະຈັດຕັ້ງປະ ຕິບັດໃນຕໍ່ໜ້າ, ຫຼັງຈາກນັ້ນ ທ່ານ ພັທ ກິປັນ ເຮັງປະເສີດ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງໄດ້ຂື້ນຜ່ານ ແຜນຈັດຕັ້ງວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ.

ພ້ອມນັ້ນ ທ່ານ ຄຳອ້ວນ ສຸວັນທອງ ກຳມະການພັກເມືອງ ຮອງເຈົ້າເມືອງ ກໍ່ໄດ້ຂື້ນຜ່ານແຜນແຜນກິດຈະກຳສະເຫຼີມສະຫຼອງ 40 ປີ ວັນສ້າງຕັ້ງແຂວງວຽງຈັນ, ຕໍ່ຈາກນັ້ນ ທ່ານ ອຳໄພ ໂສລັດຕະນະວົງ ຮອງເລຂາພັກເມືອງ ຍັງໄດ້ ຂື້ນຜ່ານແຜນລົງເຄື່ອນໄຫວ ສືບຕໍ່ເຊື່ອມຊືມມະຕິ XI ຂອງພັກ, ມະຕິ VI ຂອງອົງຄະນະພັກແຂວງ, ມະຕິ VII ຂອງອົງຄະນະພັກເມືອງ ແລະ ເອກະສານສະເຫຼີມສະຫຼອງ 40 ປີ ວັນສ້າງຕັ້ງແຂວງວຽງຈັນ, ນອກນີ້ ທ່ານ ແພງຄຳ ຈັນທະມຸງຄຸນ ຮອງເລຂາພັກເມືອງ ປະທ່ານກວດກາພັກ-ລັດເມືອງ ຍັງໄດ້ຂື້ນຜ່ານຄຳແນະນຳຂອງຄະນະປະຈຳພັກແຂວງວຽງຈັນ ສະບັບເລກທີ 20/ຄປພ.ວຈ ລົງວັນທີ 9 ພະຈິກ 2021 ກ່ຽວກັບການນຳໃຊ້ເອກະສານສຶກສາອົບຮົມການເມືອງ-ແນວຄິດ.

ໃນກອງປະຊຸມ ຍັງໄດ້ມີການປະກອບຄຳຄິດເຫັນຢ່າງກົງໄປກົງມາ ໃສ່ແຕ່ລະໜ້າວຽກເປັນຕົ້ນແມ່ນ ວຽກປ້ອງກັນເວນຍາມທາງລົດໄຟລາວ-ຈີນ, ວຽກຊຸກຍູ້ສົ່ງເສີມການຜະລິດກະສິກຳເປັນສິນຄ້າ ເພື່ອຮອງຮັບການພັດທະນາເປີດແຂວງ ແລະ ເປີດເສັ້ນທາງລົດໄຟລາວ-ຈີນ, ວຽກງານພັດທະນາ ສິນຄ້າໂອດ໋ອບ ແລະ ຂະຫຍາຍຕະຫຼາດຈຳໜ່າຍສິນຄ້າ, ວຽກງານການພັດທະນາແລ່ງທ່ອງທ່ຽວ ຢູ່ພາຍໃນເມືອງ.

ໃນຕອນທ້າຍກອງປະຊຸມຍັງໄດ້ຮັບຟັງການໂອ້ລົມ ຂອງທ່ານ ດາວເຮືອງ ນັນທະວົງ ຮອງເຈົ້າແຂວງໆວຽງຈັນ ເຊີ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ຄະນະພັກ ອຳນາດການປົກຄອງເມືອງກາສີ ທີ່ຍາດໄດ້ຜົນງານຫຼາຍດ້ານໃນໄລຍະຜ່ານມາ ແລະ ສາມາດກຳນົດສ້າງແຜນກິດຈະກຳເປັນອັນລະອຽດ ທີ່ຈະຕ້ອງສືບຕໍ່ຈັດຕັ້ງປະຕິບັດໃນຕໍ່ໜ້າ. ພ້ອມນັ້ນທ່ານຮອງເຈົ້າແຂວງຍັງເນັ້ນໃຫ້ອຳນາດການປົກຄອງເມືອງຈົ່ງສືບຕໍ່ເອົາໃຈໃສ່ບາງດ້ານຕື່ມອີກເປັນຕົ້ນແມ່ນ 1) ສືບຕໍ່ເພີ່ມທະວີໃນການສຶກສາອົບຮົມດ້ານການເມືອງ-ແນວຄິດໃຫ້ສະມາຊິກພັກ ພະນັກງານ ຕະຫຼອດຮອດພໍ່ແມ່ປະຊາຊົນຢ່າງເນື່ອງນິດລຽນຕິດ ຖືເອົາວຽກງານການເມືອງ- ແນວຄິດສອດຫ້ອຍເຂົ້າໃນທຸກຂົງເຂດວຽກງານ ເຮັດໃຫ້ເຂົາເຈົ້າມີຄວາມຮັບຮູ້ເຂົ້າໃຈຢ່າງເລິກເຊີ່ງ.

ເຊື່ອໝັ້ນຕໍ່ການຊີ້ນຳໆພາຂອງພັກ-ລັດຂັ້ນເທີງ ພ້ອມກັນເປັນເຈົ້າການປະຕິບັດແນວທາງ ນະໂຍບາຍຂອງພັກ-ລັດ ວາງອອກໃນແຕ່ລະໄລຍະໃຫ້ໄດ້ຮັບປະສິດທິຜົນສູງຂື້ນເປັນກ້າວໆ. 2) ເອົໃຈໃສ່ຈັດຕັ້ງປະຕິບັດຜັນຂະຫຍາຍ 2 ວ່າລະແຫ່ງຊາດຂອງລັດຖະບານ ໃຫ້ນັບມື້ນັບໄດ້ຮັບ ປະສິດທິຜົນ, 3) ສືບຕໍ່ເອົາໃຈໃສ່ລົງຊຸກຍູ້ສົ່ງເສີມພໍ່ແມ່ປະຊາຊົນໃຫ້ ທຳການຜະລິດກະສິກຳ ຕາມທ່າແຮງທີ່ມີ ພ້ອມທັງນຳໃຊ້ເຄື່ອງມື້ວິທະຍາສາດ ເຕັກໂນໂລຊີທີ່ທັນສະໄໝ ເຂົ້າໃນການຜະລິດໃຫ້ນັບມື້ນັບຫຼາຍ ເພື່ອຂາຍການເປັນສິນຄ້າຈຳໜ່າຍຢູ່ພາຍໃນ ແລະ ສົ່ງອອກໄປຕ່າງປະເທດ, 4) ສືບຕໍ່ສ້າງຂະບວນການດ້ານຕ່າງໆ ເພື່ອຂຳນັບຮັບຕ້ອນວັນສຳຄັນຕ່າງໆ ຂອງພັກ ຂອງຊາດ ໂດຍສະເພາະແມ່ນ ການສະເຫຼີມສະຫຼອງ 40 ປີ ວັນສ້າງຕັ້ງແຂວງວຽງຈັນ ແລະ ວັນສະຖາປະນາ ສປປ ລາວ ຄົບຮອບ 46 ປີ, ການເປີດເສັ້ນທາງລົດໄຟລາວ-ຈີນ.

ໃຫ້ເປັນຂະບວນການຟົດຟື້ນ ຮັບປະກັນໃຫ້ໄດ້ທັງເນື້ອໃນ ແລະ ຮູບການ, 5) ສືບຕໍ່ເອົາໃຈໃສ່ປ້ອງກັຍເວນຍາມຕາມຖະໜົນຫົນທາງ ຂອບເຂດຄວາມຮັບຂອງຕົນ ເຮັດໃຫ້ບ້ານເມືອງມີຄວາມສະຫງົບ ເປັນລະບຽບຮຽບຮ້ອຍປອດໄພຮ້ອຍສ່ວນຮ້ອຍ. 6) ສືບຕໍ່ພ້ອມກັບສະກັດກັ້ນການລະບາດຂອງພະຍາດໂຄວິດ-19 ໃຫ້ລຸດນ້ອຍຖອຍລົງ ດ້ວຍການຈັດຕັ້ງປະຕິບັດມາດຕະການທີ່ຂັ້ນເທີງວາງອອກຢ່າງເຂັ້ມງວດ, ລົງໂຄສະນາປຸກລະດົມພໍ່ແມ່ປະຊາຊົນບັນດາເຜົ່າ ໃຫ້ຮັບຮູ້ເຂົ້າໃຈເຖີງຜົນຮ້າຍ ແລະ ວິທີປ້ອງກັນພະຍາດໂຄວິດ ປຸກລະດົມຊວນເຊື່ອພໍ່ແມ່ປະຊາຊົນຜູ້ທີ່ມີເງື່ອນໄຂ ໃຫ້ໄປຮັບວັກຊີ້ນປ້ອງກັນພະຍາດໂຄບິດ-19 ໃຫ້ຄົບໂດສ໌.

( ຂ່າວ ເມືອງກາສີ )

Leave a Reply

Your email address will not be published. Required fields are marked *

You may have missed