Vieng Chanh News

ແຂວງວຽງຈັນອອນລາຍ

ເມືອງໝື່ນປະກາດບ້ານວັງ, ບ້ານນໍ້າຮີ້, ບ້ານເມືອງໝື່ນ ແລະບ້ານນ້ໍາແພດເປັນບ້ານປ້ອງກັນຊາດເຂັ້ມແຂງ.

1 min read

ພິທີປະກາດຮັບຮອງບ້ານວັງ, ບ້ານນໍ້າຮີ້, ບ້ານເມືອງໝື່ນ ແລະບ້ານນໍ້າແພດເປັນບ້ານປ້ອງກັນຊາດເຂັ້ມແຂງບ້ານທີ4, ທີ5, ທີ6ແລະ ທີ7 ຂອງເມືອງ; ເປັນແຫ່ງທີ 11 ຂອງແຂວງວຽງຈັນ ໄດ້ຈັດຂຶ້ນໃນວັນທີ 25 ພະຈິກ 2021 ນີ້ ທີ່ຫ້ອງປະຊຸມເມືອງໝື່ນ.

ເປັນກຽດເຂົ້າຮ່ວມໂດຍທ່ານ ຄຳພັນ ສິດທິດຳພາ ກຳມະການສູນກາງພັກ, ປະທານປ້ອງກັນຊາດ-ປ້ອງກັນຄວາມສະຫງົບ, ເຈົ້າແຂວງ ແຂວງວຽງຈັນ, ທ່ານ ພົຈວ ຄຳເຄນ ອຸດຕະມາ ຫົວໜ້າການເມືອງ ກອງບັນຊາການທະຫານແຂວງວຽງຈັນ, ມີບັນດາທ່ານຄະນະປະຈຳພັກເມືອງ, ຫົວໜ້າຫ້ອງການ, ເລຂາພັກ-ນາຍບ້ານ ທົ່ວເມືອງເຂົ້າຮ່ວມຢ່າງພ້ອມພຽງ.


ໃນພິທີ ທ່ານ ພັທ ສົມພອນຈ້າງ ພະນາບັນລື ຄະນະປະຈຳພັກເມືອງຫົວໜ້າການເມືອງກອງບັນຊາການທະຫານເມືອງໝື່ນ ໄດ້ຂຶ້ນຜ່ານຂໍ້ຕົກລົງຂອງ ເຈົ້າເມືອງ-ເມືອງໝື່ນ ສະບັບເລກທີ 311/ຈມ,ມໝ ລົງວັນທີ 21 ກັນຍາ 2021 ວ່າດ້ວຍການອະນຸມັດ ຈັດພິທີ ປະກາດຮັບຮອງເອົາຄອບຄົວ ແລະບ້ານປ້ອງກັນຊາດເຂັ້ມແຂງ; ຂໍ້ຕົກລົງ ຂອງເຈົ້າເມືອງ-ເມືອງໝື່ນ ສະບັບເລກທີ 309/ຈມ,ມໝ ລົງວັນທີ 21 ກັນຍາ 2021 ວ່າດ້ວຍດ້ວຍການອະນຸມັດຮັບຮອງເອົາຄອບຄົວປ້ອງກັນຊາດເຂັ້ມແຂງ; ຂໍ້ຕົກລົງຂອງກອງບັນຊາການທະຫານແຂວງວຽງຈັນສະບັບເລກທີ 436/ກບຊ ຂຈ ລົງວັນທີ 16 ມີນາ 2021 ວ່າດ້ວຍການຮັບຮອງບ້ານປ້ອງກັນຊາດເຂັ້ມແຂງຢູ່ເມືອງໝື່ນ ແລະຂໍ້ຕົກລົງຂອງເຈົ້າແຂວງວຽງຈັນສະບັບເລກທີ 623 ລົງວັນທີ 1 ກໍລະກົດ 2021 ວ່າດ້ວຍການຢັ້ັ້ງຢືນ ແລະຮັບຮອງ 4 ບ້ານຂອງເມືອງໝື່ນແຂວງວຽງຈັນ ເປັນບ້ານປ້ອງກັນຊາດເຂັ້ມແຂງ

ຈາກນັ້ນ ທ່ານ ລັດຖະກອນ ວົງສອນ ນາຍບ້ານບ້ານນ້ຳແພດໄດ້ຕາງໜ້າໃຫ້ ທັງ 4 ບ້ານຂຶ້ນຜ່ານບົດສະຫຼຸບ ແລະທິດທາງແຜນການສ້າງຄອບຄົວ ແລະບ້ານປ້ອງກັນຊາດເຂັ້ມແຂງ ເຊິ່ງກຳລັງ ປ້ອງກັນຊາດ-ປ້ອງກັນຄວາມສະຫງົບ ໃນ 4 ບ້ານດັ່ງກ່າວ ແມ່ນເຄື່ອນໄຫວເຮັດໜ້າທີ່ຂອງຕົນເປັນປົກກະຕິ, ເຂົ້າຮ່ວມວຽກງານລວມຂອງບ້ານປະຕິບັດພັນທະປ້ອງກັນຊາດຢ່ງສະເໝີຕົ້ນ ສະເໝີປາຍ ບ້ານວັງ, ບ້ານນ້ຳຮີ້, ບ້ານເມືອງໝື່ນ ແລະບ້ານນ້ຳແພດ ມີຈຳນວນ 969 ຄອບຄົວ.

ຜ່ານການປະເມີນຕາມມາດຖານ ບ້ານປ້ອງກັນຊາດເຂັ້ມແຂງ ສາມາດຕີລາຄາໄດ້ ຄອບຄົວປ້ອງກັນຊາດເຂັ້ມແຂງປະເພດທີ1 ນັບແຕ່ 95% ຂຶ້ນໄປມີ 798 ຄອບຄົວ; ປະເພດ 2 ນັບແຕ່ 85% ຂຶ້ນໄປ ມີ 50 ຄອບຄົວ ຜ່ານການປະເມີນບັນດາບ້ານ ສາມາດຕີລາຄາໄດ້ 87,51% ຈັດເປັນບ້ານປ້ອງກັນຊາດເຂັ້ມແຂງອັນດັບ I. ພ້ອມນີ້ ຕາງໜ້າໜ່ວຍສາມັກຄີ ຂອງບ້ານ ແລະນາຍບ້ານຍັງໄດ້ຂຶ້ນຮັບໃບຢັ້ງຢືນ ຄອບຄົວປ້ອງກັນຊາດເຂັ້ມແຂງ ແລະໃບຢັ້ງຢືນບ້ານປ້ອງກັນຊາດເຂັ້ມແຂງ ໂດຍແມ່ນທ່ານ ພົຈວ ຄຳເຄນ ອຸດຕະມາ ແລະທ່ານ ຄຳພັນ ສິດທິດຳພາ ເປັນກຽດມອບຕາມລຳດັບ.


ພິທີຍັງໄດ້ຮັບຟັງການໂອ້ລົມ ຈາກທ່ານຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ປະທານຄະນະກຳມະການປ້ອງກັນຊາດປ້ອງກັນຄວາມສະຫງົບ ເຈົ້າແຂວງວຽງຈັນ ເຊິ່ງທຳອິດ ທ່ານໄດ້ໃຫ້ການຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ໃນເທື່ອນີ້ ທ່ານຍັງໄດ້ເນັ້ນໜັກໃຫ້ເມືອງ ກໍຄືບັນດາບ້ານທີ່ໄດ້ປະກາດຮັບຮອງໃນເທື່ອນີ້ ສືບຕໍ່ເພີ່ມທະວີ ການສຶກສາອົບຮົມພໍ່ແມ່ປະຊາຊົນພາຍໃນບ້ານຂອງຕົນໃຫ້ເຊື່ອມຊຶມຢ່າງເລິກເຊິ່ງ.

ເປັນເຈົ້າການເຂົ້າຮ່ວມປະຕິບັດແນວທາງປ້ອງກັນຊາດປ້ອງກັນຄວາມສະຫງົບທົ່ວປວງຊົນຮອບດ້ານ, ສືບຕໍ່ປັບປຸງກຳລັງປ້ອງກັນຊາດ-ປ້ອງກັນຄວາມສະຫງົບໃຫ້ມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ ແລະສືບຕໍ່ພັດທະນາເສດຖະກິດ ສຸມໃສ່ແກ້ໄຂ ຄວາມທຸກຍາກຂອງປະຊາຊົນ ດ້ວຍການຊຸກຍູ້ສົ່ງເສີມການຜະລິດເປັນສິນຄ້າໃຫ້ນັບມື້ຫຼາຍຂຶ້ນ ເຮັດໃຫ້ຄອບຄົວມີລາຍຮັບທີ່ແນ່ນອນ ຕອນທ້າຍຍັງໄດ້ເປີດປ້າຍບ້ານປ້ອງກັນຊາດເຂັ້ມແຂງ ແລະລັ່ນຄ້ອງ 9 ບາດເພື່ອຄວາມເປັນສິລິມຸງຄຸນອີກດ້ວຍ

#ພາບ,ຂ່າວ: ແໜງໜໍ່ຄຳ

Leave a Reply

Your email address will not be published. Required fields are marked *

You may have missed