Vieng Chanh News

ແຂວງວຽງຈັນອອນລາຍ

ກອງປະຊຸມ ຄະນະກຳມະການ ປຸກລະດົມຂົນຂວາຍບໍລິຈາກເລືອດ ແລະ ຄຸ້ມຄອງ ບໍລິຈາກເລືອດປອດໄພຂັ້ນແຂວງ

1 min read

ໃນຕອນເຊົ້າ ຂອງວັນທີ 1 ທັນວາ 2021 ຢູ່ທີ່ຫ້ອງປະຊຸມ ຂອງຫ້ອງວ່າການປົກຄອງເມືອງວັງວຽງ ແຂວງວຽງຈັນ. ໄດ້ເປີດ ກອງປະຊຸມ ຄະນະກຳມະການ ປຸກລະດົມຂົນຂວາຍບໍລິຈາກເລືອດ ແລະຄຸ້ມຄອງ ບໍລິຈາກເລືອດປອດໄພຂັ້ນແຂວງ.

ໂດຍການເປັນກຽດເຂົ້າຮ່ວມ ຂອງທ່ານ ພູວົງ ບຸນຊູ ຮອງເຈົ້າແຂວງໆວຽງຈັນ ປະທານຄະນະກຳມະການ ປຸກລະດົມຂົນຂວາຍບໍລິຈາກເລືອດ ແລະຄຸ້ມຄອງບໍລິການເລືອດປອດໄພ ຂັ້ນແຂວງ, ມີບັນດາທ່ານເຈົ້າເມືອງ-ຮອງເຈົ້າເມືອງ, ຫົວຫນ້າກາແດງທັງ 4 ເມືອງຄື: ເມືອງວັງວຽງ, ເມືອງຫີນເຫີບ,ເມືອງກາສີ,ເມືອງແມດ. ຄະນະກຳມະການປຸກລະດົມຂົນຂວາຍບໍລິຈາກເລືອດຂັ້ນເມືອງ ຫ້ອງການສາທາລະນະສຸກເມືອງ ແລະ ໜ່ວຍກູ້ໄຟ 1623 ສາຂາວັງວຽງເຂົ້າຮ່ວມຢ່າງພ້ອມພຽງ.


ໃນວາລະດຳເນີນກອງປະຊຸມ ໄດ້ຜ່ານຂໍ້ຕົກລົງ ຂອງທ່ານ ເຈົ້າແຂວງໆວຽກຈັນ ສະບັບເລກທີ 915/ຈຂ.ວຈ ລົງວັນທີ 1 ກັນຍາ 2021 ວ່າດ້ວຍ: ການອະນຸມັດໃຫ້ ອົງການກາແດງແຂວງວຽງຈັນ ເປີດກອງປະຊຸມ ຄະນະກຳມະການ ປຸກລະດົມຂົນຂວາຍການບໍລິຈາກເລືອດ ແລະຜ່ານຂໍ້ຕົກລົງເລກທີ 421/ ຈຂ.ວຈ ລົງວັນທີ 7 ພຶດສະພາ 2021 ວ່າດ້ວຍ: ການແຕ່ງຕັ້ງຄະນະກຳມະການປຸກລະດົມຂົນຂວາຍບໍລິຈາກເລືອດ ແລະຄຸ້ມ ຄອງບໍລິການເລືອດປອດໄພຂັ້ນແຂວງ ໃນກອງປະຊຸມຍັງໄດ້ກຳນົດຕົວເລກຄາດໝາຍ ສູ້ຊົນຜູ້ບໍລິຈາກເລືອດ ໃຫ້ບັນດາອົງການປົກຄອງເມືອງ, ກອງບັນຊາການ ປກສ – ປກຊ ເມືອງ, ໂຮງຮຽນ, ໂຮງໝໍ, ບໍລິສັດ, ລັດວິສາຫະກິດ ໃນປີ 2021-2025. ພ້ອມທັງຜ່ານບົດສະຫລຸບວຽກງານເລືອດໄລຍະ 5 ປີ (2016-2020)ແລະ ແຜນການປະຈຳປີ
2021.

ຈຸດປະສົງ ຂອງກອງປະຊຸມ.ເພື່ອປຶກສາຫາລື ການຈັດຕັ້ງປະຕິບັດ ແຜນພັດທະນາວຽກງານປຸກລະດົມ ຂົນຂວາຍບໍລິຈາກເລືອດ ແລະຄຸ້ມຄອງບໍລິການເລືອດປອດໄພ ອົງການກາແດງ ແຂວງວຽງຈັນ ໃຫ້ບັນລຸຕາມແຜນການທີ່ກຳນົດໄວ້ ພ້ອມທັງຮັບປະກັນຂອດການຈັດຕັ້ງປະຕິບັດ ແລະເຂົ້າເຖິງເປົ້າໝາຍຜູ້ບໍລິຈາກເລືອດໃຫ້ນັບມື້ນັບກ້ວາງຂວາງ.


ຕອນທ້າຍ ທ່ານ ພູວົງ ບຸນຊູ ຮອງເຈົ້າແຂວງ ແຂວງວຽງຈັນ ໄດ້ຊີ້ໃຫ້ເຫັນ ເຖິງຄວາມໝາຍຄວາມສຳຄັນ ຕໍ່ກັບວຽກງານອົງການກາແດງ ແລະການປຸກລະດົມຂົນຂວາຍບໍລິຈາກເລືອດ ພ້ອມທັງຮຽກຮ້ອງມາຍັງຜູ້ແທນທີ່ເຂົ້າຮ່ວມກອງປະຊຸມ ຈົ່ງພ້ອມກັນອອກແຮງປຸກລະດົມຂົນຂວາຍຜູ້ບໍລິຈາກເລືອດແບບສະໝັກໃຈ ບໍຮຽກຮ້ອງສິ່ງຕອບແທນ ເພື່ອບັນລຸກຄາດໝາຍທີ່ວາງໄວ້.

ຂ່າວ: ທັນວາ

Leave a Reply

Your email address will not be published. Required fields are marked *

You may have missed