Vieng Chanh News

ແຂວງວຽງຈັນອອນລາຍ

ກອງບັນຊາການປກສເມືອງເຟືອງເຊື່ອມຊືມເອກະສານກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021-2023).

1 min read

ວັນທີ 3 ທັນວາ 2021 ນີ້ ຢູ່ກອງບັນຊາການ ປກສ ເມືອງເຟືອງ ແຂວງວຽງຈັນ ໄດ້ຈັດກອງປະຊຸມເຜີຍແຜ່ເອກະສານກ່ຽວກັບ ການຈັດຕັ້ງຜັນຂະຫຍາຍ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021-2023).

ເປັນກຽດຂື້້ນ ເຜີຍແຜ່ເອກະສານໂດຍ ທ່ານ ບຸນແພງ ແສງເພັດມະນີວົງ ຮອງເລຂາພັກ ປະທານກວດກາພັກເມືອງ, ເປັນກຽດເຂົ້າຮ່ວມຂອງ ທ່ານ ພັທ ຄຳສິງ ຮົ່ມດວງໄຊ ຮອງຫົວໜ້າກອງບັນຊາການ ປກສ ແຂວງວຽງຈັນ, ມີຫົວໜ້າ,ຄະນະ, ຫົວໜ້າພະແນກ, ຮອງຫົວໜ້າພະແນກ ແລະຫົວໜ້າ ປກສ ກຸ່ມ ພາຍໃນເມືອງເຟືອງໄດ້ພ້ອມກັນເຂົ້າຮ່ວມ.


ບັນດາຜູ້ເຂົ້າຮ່ວມ ໄດ້ຮັບການເຊື່ອມຊືມເອກະສານ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຄຳສັ່ງຂອງ ທ່ານເຈົ້າແຂວງໆວຽງຈັນ ສະບັບເລກທີ 019/ຈຂວຈ, ລົງວັນທີ 4 ພະຈິກ 2021 ວ່າດ້ວຍການແກ້ໄຂບັນຫາຢາເສບຕິດຢູ່ແຂວງວຽງຈັນ, ຂໍ້ຕົກລົງຂອງຫົວໜ້າກອງບັນຊາການ ປກສ ແຂວງວຽງຈັນ ສະບັບເລກທີ 693/ປສຂຈ ວ່າດ້ວຍການແຕ່ງຕັ້ງຄະນະຮັບຜິດຊອບ ຊີ້ນຳການຈັດຕັ້ງປະຕິບບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງແຂວງວຽງຈັນ ແລະແຜນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂ ບັນຫາຢາເສບຕິດຢູ່ແຂວງ ວຽງຈັນ (2021-2023) ຂອງ ຫົວໜ້າກອງບັນຊາການ ປກສ ແຂວງວຽງຈັນ ເລກທີ 11599/ປສຂຈ ລົງວັນທີ 4 ພະຈິກ 2021.


ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແມ່ນການສຸມທຸກກຳລັງແຮງ ສັງລວມເຂົ້າໃສ່ການແກ້ໄຂບັນຫາສຳຄັນ, ຈຳເປັນ ແລະຮີບດ່ວນຂອງຊາດ ທີ່ໄດ້ສະສົມມາຫຼາຍປີ ໃຫ້ຫຼຸດລົງຢ່າງຈະແຈ້ງ ໃນການກຳນົດເວລາທີ່ແນ່ນອນ ຖືເອົາການແກ້ໄຂບັນຫາດັ່ງກ່າວ ເປັນໜ້າທີ່ ພັນທະ ແລະຄວາມຮັບຜິດຊອບຂອງທຸກພາກສ່ວນໃນສັງຄົມ.

ຈຸດປະສົງໃນການຈັດຕັ້ງເຜີຍແຜ່ຄັ້ງນີ້ເພຶ່ອເປັນການ ຍົກສູງຄວາມຮູ້ ຄວາມເຂົ້າໃຈ ຄວາມເປັນເອກະພາບ ທາງດ້ານທັດສະນະ ແລະຄວາມຮັບຜິດຊອບ ໃນການຊີ້ນຳໆພາ ຂອງຄະນະພັກ-ຄະນະບັນຊາແຕ່ລະຂັ້ນ ຂອງກຳລັງປ້ອງກັນຄວາມສະຫງົບ ໃນການປະຕິບັດວຽກຕົວຈິງ ທັງກຳໄດ້ເນື້ອໃນທີ່ເປັນພື້ນຖານ ຮັບປະກັນແກ່ການແກ້ໄຂບັນຫາຢາເສບຕິດດຳເນີນເປັນລະບົບ ຕໍ່ເນຶ່ອງ, ເດັດຂາດ,ໂປ່ງໃສ, ເຂັ້ມງວດ ເປັນມືອາຊີບ ແລະທັນເວລາ ພ້ອມທັງແກ້ໄຂ ສາເຫດ ເງື່ອນໄຂທີ່ພາໃຫ້ເກີດບັນຫາຢາເສບຕິດ ໃຫ້ຖືກກັບສະພາບຈຸດພິເສດແຕ່ລະກົມກອງ ຂະແໜງການ ແລະທ້ອງຖິ່ນແຕ່ລະຂັ້ນ.

ຫຼັງຈາກສີ້ນສຸດການເຜີຍແຜ່ເອກະສານນີ້ແລ້ວ ປະທານກອງປະຊຸມຍັງໄດ້ຮຽກຮ້ອງໃຫ້ ຄະນະພັກ-ຄະນະບັນຊາຈົ່ງພ້ອມກັນລົງຈັດຕັ້ງເຜີຍແຜ່ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຢູ່ແຕ່ລະກຸ່ມບ້ານພາຍໃນເມືອງໃຫ້ກຳລັງປ້ອງກັນຄວາມສະຫງົບຢູ່ຂັ້ນຮາກຖານ ພ້ອມທັງເອົາໃຈໃສ່ໂຄສະນາຜົນຮ້າຍ, ຜົນກະທົບຂອງຢາເສບຕິດ ໃຫ້ສັງຄົມຮັບຮູ້ຢ່າງກວ້າງຂວາງ.

#ຂ່າວ: ຄຳລຸນ ສົມວົງໄຊ

Leave a Reply

Your email address will not be published.

You may have missed

ສະຫງວນລິຂະສິດ