Vieng Chanh News

ແຂວງວຽງຈັນອອນລາຍ

ກອງປະຊຸມໃຫຍ່ ຄັ້ງທີ IX ຂອງກຳມະບານຮາກຖານໂຮງຮຽນປະຖົມສົມບູນ ຫ້ວຍສະເຫງົ້າ

1 min read

ໃນວັນທີ 07 ມັງກອນ 2022 ນີ້, ກຳມະບານຮາກຖານໂຮງຮຽນປະຖົມສົມບູນ ຫ້ວຍສະເຫງົ້າ ເມືອງວັງວຽງ ແຂວງວຽງຈັນ ໄດ້ເປີດກອງປະຊຸມໃຫຍ່ ຄັ້ງທີ IX ຂື້ນຢ່າງປັນທາງການຢູ່ທີ່ພາຍໃນໂຮງຮຽນດັ່ງກ່າວ.

ໂດຍການເປັນປະທານຂອງທ່ານ ສີສະຫວັດ ສໍພາບມີໄຊ ປະທານກຳມະບານຮາກຖານໂຮງຮຽນປະຖົມສົມບູນ ຫ້ວຍສະເຫງົ້າ, ເປັນກຽດເຂົ້າຮ່ວມຂອງທ່ານ ພອນແກ້ວ ຂຸນພົມ ປະທານສະຫະພັນກຳມະບານເມືອງວັງວຽງ, ມີທ່ານ ນາງ ບ່ຽງຄໍາ ສີຄໍາເຮືອງ ເລຂາໜ່ວຍພັກໂຮງຮຽນປະຖົມສົມບູນຫ້ວຍສະເຫງົ້າ.

ມີຕາງໜ້າໜ່ວຍອົງການຈັດຕັ້ງມະຫາຊົນ, ສະມາຊິກກຳມະບານພາຍໃນໂຮງຮຽນ ແລະ ແຂກຮັບເຊີນຈາກຮາກຖານອ້ອມຂ້າງເຂົ້າຮ່ວມທັງໝົດຈໍານວນ 23 ສະຫາຍ, ຍິງ 19 ສະຫາຍ.

ໃນກອງປະຊຸມທ່ານ ສີສະຫວັດ ສໍພາບມີໄຊ ໄດ້ຜ່ານບົດລາຍງານການເມືອງທັງສອງພາກ ຊຶ່ງທ່ານໄດ້ຍົກໃຫ້ເຫັນຜົນງານການເຄື່ອນໄຫວດ້ານດີ, ດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າ.

ຈາກນັ້ນຜູ້ແທນກອງປະຊຸມໄດ້ພ້ອມກັນປະກອບຄໍາຄິດຄໍາເຫັນໃສ່ບົດລາຍງານການເມືອງດັ່ງກ່າວໃຫ້ສົມບູນແລ້ວພ້ອມກັນຕົບມືຮັບຮອງເອົາບົດລາຍງານການເມືອງດັ່ງກ່າວ. ກອງປະຊຸມຍັງໄດ້ປ່ອນບັດຄັດເລືອກເອົາຄະນະປະທານຊຸດໃໝ່, ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກເອົາ ສະຫາຍ ນາງ ໂສພາ ພົມະເທບ ເປັນປະທານກຳມະບານຮາກຖານ, ສະຫາຍ ນາງ ຂັ້ນທອງ ສອນມະນີ ເປັນຮອງປະທານພ້ອມທັງເປັນຜູ້ກວດກາ ແລະ ສະຫາຍ ນາງ ເຂັມພອນ ວັນນະທໍາ ເປັນຄະນະກໍາມະບານຮາກຖານຊຸດໃໝ່.


ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຂອງທ່ານ ພອນແກ້ວ ຂຸນພົມ ປະທານສະຫະພັນກຳມະບານເມືອງວັງວຽງ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງກຳມະບານຮາກຖານໂຮງຮຽນປະຖົມ ຫ້ວຍສະເຫງົ້າ ທີ່ຍາດມາໄດ້ໄລຍະ 5 ປີຜ່ານມາ ແລະ ທ່ານຍັງໄດ້ເນັ້ນຫຼາຍບັນຫາທີ່ສໍາຄັນກ່ຽວກັບວຽກງານກຳມະບານເປັນຕົ້ນແມ່ນສິດ, ໜ້າທີ່ແລະ ພາລະບົດບາດຂອງກໍາມະບານ, ວຽກງານກອງທຶນ ກສຸກ ແລະ ກອງທຶນທານຸເຄາະ ແລະ ຂໍ້ແຂ່ງຂັນ 5 ເປັນເຈົ້າ. ພ້ອມກັນນັ້ນທ່ານຍັງໄດ້ເນັ້ນໃຫ້ຄະນະປະທານກໍາມະບານຮາກຖານຊຸດໃໝ່ ຈົ່ງເພີ່ມທະວີຄວາມສາມະຄູໃຫ້ແໜ້ນແຟ້ນ ສຸມທຸກສະຕິບັນຍາເຂົ້າໃນວຽກງານວິຊາສະເພາະ, ມີນ້ໍາໃຈຮັກຊາດ, ຮັກລະບອບໃໝ່ ແລະ ສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານສະມາຊິກກໍາມະບານຢູ່ພາຍໃນໂຮງຮຽນໃຫ້ດີຂື້ນເລື້ອຍໆ.

ຂ່າວ: ບຸນຕາ ທໍາມະວົງ

Leave a Reply

Your email address will not be published.

ສະຫງວນລິຂະສິດ