Vieng Chanh News

ແຂວງວຽງຈັນອອນລາຍ

ເມືອງວຽງຄໍາ ສໍາເລັດການ​ເຜີຍ​ແຜ່​ເຊື່ອມ​ຊື່​ມ​ເອກະສານ​ວາລະ​ແຫ່ງ​ຊາດ  ວ່າ​ດ້ວຍ​ການ​ແກ້​ໄຂ​ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ-ການ​ເງິນ, ສະກັດ​ກັ້ນ ​ແລະ ​ແກ້​ໄຂ​ບັນຫາ​ຢາເສບ​ຕິດ ໃຫ້ຂັ້ນໂຮງຮຽນ ແລະ ຂັ້ນບ້ານ.

1 min read

ເພື່ອ​ເຮັດ​ໃຫ້ພະນັກງານຄູ-ອາຈານ ແລະ ພໍ່ແມ່ປະຊາຊົນບັນດາເຜົ່າ ມີ​ຄວາມເຂົ້າໃຈ​ຢ່າງ​ເລີກ​ເຊິ່ງ​ຕໍ່​ແນວທາງ​ການ​ນໍາພາຂອງພັກ, ​ແຜນ​ພັດທະນາ​ເສດຖະກິດ​-ສັງຄົມຂອງລັດ​ໃນ​ການ​ແກ້​ໄຂ​ປະກົດ​ການ​ຫຍໍ້​ທໍ້ຕ່າງໆ​ໃນ​ສັງຄົມ​ໃຫ້​ດໍາ​ເນີນ​ໄປ​ຢ່າງ​ເປັນ​ລະບົບ, ​ເພື່ອ​ຜັນ​ຂະຫຍາຍ​ເຂົ້າ​ສູ່​ການຈັດ​ຕັ້ງ​ປະຕິບັດ​ ໃຫ້​ກາຍ​ເປັນ​ຂະ​ບວນກ້ວາງ​ຂວາງ ​ແລະ ມີ​ຜົນ​ສໍາ​ເລັດອັນ​ໃຫ່ຍຫຼວງ​ນັ້ນ ​ໃນ​ລະຫວ່າງວັນ​ທີ 6 ຫາ ວັນທີ 11 ມັງກອນ 2022 ຜ່ານມານີ້.

ຄະນະນໍາຂອງເມືອງວຽງຄໍາ ແຂວງວຽງຈັນ ໄດ້​ລົງ​ເຜີຍ​ແຜ່​ເຊື່ອມ​ຊື່​ມບັນດາເອກະສານ​ ​ວາລະ​ແຫ່ງ​ຊາດ ວ່າ​ດ້ວຍ​ການ​ແກ້​ໄຂຄວາມ​ຫຍຸ້ງຍາກ​ທາງ​ດ້ານ​ເສດຖະກິດ-ການ​ເງິນ, ສະກັດ​ກັ້ນ ​ແລະ ​ແກ້​ໄຂ​ບັນຫາຢາ​ເສບ​ຕິດ ໃຫ້ຂັ້ນໂຮງຮຽນ ແລະ ຂັ້ນບ້ານ ທີ່ຢູ່ພາຍໃນເມືອງວຽງຄໍາ, ເຊິ່ງນໍາພາໂດຍ ທ່ານ ພອນແກ້ວ ຂຸນພົນ ກໍາມະການປະຈໍາພັກແຂວງ ເລຂາພັກເມືອງ ເຈົ້າເມືອງວຽງຄໍາ ພ້ອມດ້ວຍບັນດາສະຫາຍຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ ເປັນຜູ້ລົງເຜີຍແຜ່ເຊື່ອມຊຶມ, ເຂົ້າຮ່ວມຮັບຟັງມີບັນດາຄູ-ອາຈານ, ນ້ອງນ້ອຍຊາວໝຸ່ມ-ເຍົາວະຊົນນັກຮຽນ, ມີເລຂາພັກບ້ານ-ນາຍບ້ານພ້ອມດ້ວຄະນະຕະຫຼອດຮອດປະຊາຊົນບັນດາເຜົ່າເຂົ້າຮ່ວມ.

ໃນການລົງເຜີຍແຜ່ເຊື່ອມຊຶມໃນຄັ້ງນີ້ແມ່ນໄດ້ນໍາໃຊ້ເອກະສານສຶກສາອົບຮົມຊາວໝຸ່ມ, ໃນຫົວຂໍ້: ຢ່າປ່ອຍໃຫ້ຊີວິດໃນໄວໝຸ່ມຜ່ານກາຍໄປໂດຍບໍ່ມີຄຸນຄ່າປະໂຫຍດອັນໃດໃຫ້ແກ່ຄອບຄົວ, ສັງຄົມ ແລະ ປະເທດຊາດ ແລະ ເອກະສານ ເພີ່ມທະວີສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆໃນສັງຄົມແມ່ນຄວາມຈໍາເປັນພາວະວິໄສ.

ຈຸດປະສົງກໍ່ເພື່ອແນໃສ່ໃຫ້ຊາວໝຸ່ມ-ເຍົາວະຊົນນັກຮຽນ ແລະ ພໍ່ແມ່ປະຊາຊົນບັນດາເຜົ່າ ໄດ້ຮັບຮູ້ເຖິງປະຫວັດຄວາມເປັນມາຂອງປະເທດລາວເຮົາກ່ອນຈະໄດ້ຮັບການປົດປ່ອຍ ແລະ ພາຍຫຼັງທີ່ໄດ້ຮັບການປົດປ່ອຍ, ພ້ອມທັງສຶກສາອົບຮົມຊາວໝຸ່ມ-ເຍົາວະຊົນ-ນັກຮຽນ ໃຫ້ມີຫຼັກໝັ້ນຊົນຊັ້ນ, ມີສະຕິລະວັງຕົວ, ຮູ້ພິຈາລະນາອັນຖືກ-ອັນຜິດ, ພະຍາຍາມສ້າງຕົນເອງໃຫ້ມີຄວາມຮູ້-ຄວາມສາມາດ, ຕ້ອງສ້າງໃຫ້ຕົນເອງມີຄວາມເຂັ້ມແຂງທາງດ້ານຮ່າງກາຍ ແລະ ຈິດໃຈ, ມີຄວາມຮັກ ແລະ ຄ່ານິຍົມໃຫ້ຖືກຕ້ອງ.

ເປັນຄົນທີ່ມີຄວາມສາມັກຄີເອື້ອເຟື້ອເຜືອແຜ່, ມີຄວາມກະຕັນຍູຕໍ່ພໍ່ແມ່ ແລະ ປະເທດຊາດ, ຈົ່ງພ້ອມ ພຽງກັນເປັນຈິດໜຶ່ງໃຈດຽວໃນການແກ້ໄຂປະກົດການຫຍໍ້ທໍ້ຕ່າງໃນສັງຄົມໃຫ້ໝົດໄປຢ່າງແທ້ຈິງເປັນຕົ້ນແມ່ນບັນຫາຂອງຢາເສບຕິດທີ່ເປັນສາເຫດກໍ່ໃຫ້ເກີດປະກົດການຫຍໍ້ທໍ້ຕ່າງໆເກີດຂຶ້ນ ແລະ ເກີດໃຫ້ມີຄວາມສູນເສຍທີ່ຕາມມາ, ແນໃສ່ສ້າງໃຫ້ໄດ້ຄອບຄົວປອດຢາເສບຕິດ ແລະ ບ້ານປອດຢາເສບຕິດ, ເຮັດໃຫ້ຊີວິດການເປັນຢູ່ຂອງປະຊາຊົນຂຶ້ນໄປເລື້ອຍໆ.

ຂ່າວ: ທອງເວີນ ທໍາມະວົງ

Leave a Reply

Your email address will not be published.

ສະຫງວນລິຂະສິດ