Vieng Chanh News

ແຂວງວຽງຈັນອອນລາຍ

ສະຫະພັນກຳມະບານເມືອງກາສີ ມອບເງີນທານຸເຄາະ ໃຫ້ຄອບຄົວສະມາຊິກກອງທຶນເສຍຊີວິດ

1 min read

ໃນວັນທີ 12 ພຶດສະພາ 2022ນີ້, ສະຫະພັນກໍາມະບານເມືອງກາສີ ໄດ້ນຳເອົາເງິນກອງທຶນທະນຸເຄາະ ຈຳນວນ 36.590.400 ກີບ (ສາມສິບຫົກລ້ານ ຫ້າຮ້ອຍເກົ້າສິບພັນ ສີ່ຮ້ອຍກີບ) ໄປມອບໃຫ້ຄອບຄົວສະມາຊິກກອງທືນທີ່ເສຍຊີວິດ ຄື: ທ້າວ ອານຸວົງ ສີສຸພອນ, ອາຊີບພະນັກງານບຳນານ ເປັນສະມາຊິກກອງທຶນປະເພດ 1 ສັງກັດຢູ່ໜ່ວຍກຳມະບານຮາກຖານຫ້ອງການສຶກສາທິການ ແລະ ກິລາເມືອງກາສີ ທີ່ຂື້ນກັບສະຫະພັນກຳມະບານເມືອງກາສີ.

ຜູ້ກ່ຽວໄດ້ເຂົ້າເປັນສະມາຊິກກອງທຶນມາແຕ່ວັນທີ່ 01 ເມສາ 2006, ປື້ມບັດເລກທີ 32, ເຊີ່ງໄດ້ເສຍຊີວິດໃນວັນທີ 07 ພຶດສະພາ 2022. ເປັນກຽດກ່າວມອບເງີນທານຸເຄາະໃນຄັ້ງນີ້ໂດຍແມ່ນ ທ່ານ ສຸກສະຫວາດ ຈັນວັນເພັງ ຄະນະບໍລິຫານງານສະຫະພັນກຳມະບານ ແຂວງວຽງຈັນ ປະທານສະຫະພັນກຳມະບານເມືອງກາສີ ທັງເປັນປະທານກອງທຶນ ແລະ ກ່າວຮັບໂດຍແມ່ນຄອບຄົວຂອງຜູ້ເສຍຊິວິດ ໂດຍການເປັນກຽດເຂົ້າຮ່ວມເປັນສັກຂີພິຍານຂອງ ທ່ານ ບຸນມີ ບົວລິວັນ ຄະນະປະຈຳພັກເມືອງ ປະທານແນວລາວສ້າງຊາດເມືອງກາສີ ຜູ້ຊີ້ນຳອົງການຈັດຕັ້ງມະຫາຊົນ, ມີບັນດາພະນັກງານທີ່ກ່ຽວຂ້ອງ ພ້ອມດ້ວຍຄອບຄົວ ແລະ ຍາດຕິພີ່ນ້ອງຂອງຜູ້ເສຍຊີວິດເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ທ່ານ ສຸກສະຫວາດ ຈັນວັນເພັງ ໄດ້ມີຄຳເຫັນອະທິບາຍຊີ້ແຈງກ່ຽວກັບກົດລະບຽບ ແລະ ນະໂຍບາຍຂອງກອງທຶນທານຸເຄາະ ທີ່ມີຕໍ່ສະມາຊິກກອງທຶນທີ່ເສຍຊີວິດ ເພື່ອເຮັດໃຫ້ຄອບຄົວກໍຄືຍາດຕິພີ່ນ້ອງຂອງສະມາຊິກທີ່ເສຍຊີວິດໄດ້ຮັບຮູ້ເຂົ້າຢ່າງເລິກເຊີ່ງ ແລະ ການມອບເງີນໃນຄັ້ງນີ້ ກໍປະຕິບັດຕາມກົດລະບຽບກອງທຶນ ກຊກ ຂອງສະຫະພັນກຳມະບານແຂວງວຽງຈັນ ສະບັບເລກທີ 925/ສກບ.ຂຈ ລົງວັນທີ 25 ທັນວາ 2019 ວ່າດ້ວຍ ການປະຕິບັດນະໂຍບາຍຕໍ່ຜູ້ເສຍຊີວິດ ແລະ ຂໍ້ຕົກລົງຂອງສະຫະພັນກຳມະບານແຂວງວຽງຈັນ ສະບັບເລກທີ 283 /ສບຂ.ວຈ ລົງວັນທີ 09 ພຶດສະພາ 2022 ວ່າດ້ວຍການມອບເງີນທະນຸເຄາະໃຫ້ສະມາຊິກກອງທຶນທີ່ເສຍຊີວິດ. ເຊີ່ງມາຮອດປະຈຸບັນ ທົ່ວແຂວງວຽງຈັນ ມີສະມາຊິກກອງທືນທັງໝົດ ຈຳນວນ 15.246 ສະຫາຍ.

ໃນໂອກາດດັ່ງກ່າວ ທ່ານ ບຸນມີ ບົວລິວັນ ຍັງໃຫ້ກຽດມີຄໍາເຫັນເຊີ່ງກ່ອນອື່ນທ່ານໄດ້ກ່າວສະແດງຄວາມເສຍອົກເສຍໃຈຕໍ່ຄອບຄົວສະມາຊິກກອງທືນທີ່ເສຍຊີວິດ ແລະ ກ່າວສະແດງຄວາມຍ້ອງຍໍຊົມເຊີມມາຍັງຄະນະພັກ ຄະນະຫ້ອງການກຳມະບານເມືອງ ກໍຄືຄະນະຮັບຜິດຊອບກອງທຶນຂັ້ນເມືອງ ທີ່ໄດ້ເອົາໃຈໃສ່ຄົ້ນຄວ້ານໍາສະເໜີຂັ້ນເທີງ ເພື່ອໃຫ້ໄດ້ເງີນຈຳນວນດັ່ງກ່າວມາມອບໃຫ້ຄອບຄົວ ຂອງຜູ້ເສຍຊີວິດໄດ້ທ່ວງທັນກັບໄລຍະເວລາ. ພ້ອມນັ້ນ ທ່ານຍັງໄດ້ເນັ້ນໜັກໃຫ້ຄອບຄົວຂອງຜູ້ເສຍຊີວິດ ຈົ່ງນຳໃຊ້ເງີນທີ່ໄດ້ຮັບໃນຄັ້ງນີ້ ໃຫ້ຖືກເປົ້າ ແລະ ເກີດຜົນປະໂຫຍດສູງສຸດ.

(ຂ່າວ: ເມືອງກາສີ)

Leave a Reply

Your email address will not be published.

ສະຫງວນລິຂະສິດ