Vieng Chanh News

ແຂວງວຽງຈັນອອນລາຍ

ປະທານສະພາປະຊາຊົນແຂວງວຽງຈັນລົງຢ້ຽມຢາມພົບປະໂອ້ລົມປະຊາຊົນ ບ້ານລ້ອງໝາກຄາຍ ເມືອງກາສີ.

1 min read

ໃນວັນທີ 28 ພຶດສະພາ  2022 ນີ້, ທ່ານ ບຸນສອນ ເພັດລາວັນ ຮອງເລຂາພັກແຂວງ ປະທານສະພາປະຊາຊົນແຂວງວຽງຈັນ ພ້ອມດ້ວຍທີມງານ ໄດ້ລົງເຄື່ອນໄຫວຢຽ້ມຢາມພໍ່ແມ່ປະຊາຊົນ ບ້ານ ລ້ອງໝາກຄາຍ ເມືອງກາສີ ແຂວງວຽງຈັນ.

 

ໂດຍການໃຫ້ກຽດຕ້ອນຮັບຂອງທ່ານ ສີທົນ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ ພ້ອມດ້ວຍການນຳຂອງເມືອງ ຕະຫຼອດຮອດອຳນາດການປົກຄອງບ້ານ ແລະ ພໍ່ແມ່ປະຊາຊົນຊາວບ້ານລ້ອງມາກຄາຍ. ໃນໂອກາດດັ່ງກ່າວ ທ່ານປະທານສະພາປະຊາຊົນແຂວງ ຍັງໄດ້ຮັບຟັງການລາຍງານໂດຍຫຍໍ້ກ່ຽວກັບ ສະພາບລວມ ແລະການປະຕິບັດວຽກງານກໍ່ສ້າງຮາກຖານ-ການເມືອງຕິດພັນກັບວຽກງານສາມສ້າງ ປະຈຳປີ 2022 ແລະ ທິດທາງແຜນການໃນຕໍ່ໜ້າຢູ່ບ້ານລ້ອງໝາກຄາຍ ຈາກທ່ານ ນາຍບ້ານໆລ້ອງໝາກ.

ຫຼັງຈາກນັ້ນ ທ່ານ ປອ ສີວຽງໄຊ ອໍລະບູນ ກຳມະການພັກແຂວງ ຫົວໜ້າຫ້ອງວ່າການແຂວງວຽງຈັນ ແລະ ທ່ານ ສີທົນ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໝກາສີ ກໍ່ໄດ້ຂື້ນມີຄຳເຫັນ ເຊີ່ງທັງສອງທ່ານກໍ່ໄດ້ຍົກໃຫ້ເຫັນເຖີງແນວທາງແຜນນະໂຍບາຍ, ທິດທາງຈຸດສຸມເປົ້າໝາຍລວມໃນການພັດທະນາເສດຖະກິດ-ສັງຄົມ ຂອງແຂວງວຽງຈັນ ໂດຍສະເພາະກໍແມ່ນຂອງເມືອງກາສີ ຕາມມະຕິກອງປະຊຸມໃຫຍ່ ຂອງອົງຄະນະພັກແຂວງ ຄັ້ງທີ VI ແລະ ມະຕິກອງປະຊຸມໃຫຍ່ອົງຄະນະພັກເມືອງກາສີ ຄັ້ງທີ VII, ພ້ອມທັງຮຽກຮ້ອງໃຫ້ພໍ່ແມ່ປະຊາຊົນຊາວບ້ານລ້ອງໝາກຄາຍຈົ່ງເພີ່ມທະວີເຕົ້າໂຮມຄວາມສາມັກຄີເປັນຈິດນຶ່ງໃຈດຽວກັນ ເຊື່ອໝັ້ນຕໍ່ການຊີ້ນຳໆພາຂອງພັກ-ລັດໃນແຕ່ລະໄລຍະ, ພ້ອມກັນສ້າງສາພັດທະນາເສດຖະກິດຄອບຄົວຂອງຕົນ ໃຫ້ນັບມືນັບເຂັ້ມແຂງຂື້ນເປັນກ້າວໆ.

ໃນໂອກາດດັ່ງກ່າວທ່ານປະທານສະພາປະຊາຊົນແຂວງ ຍັງໄດ້ໃຫ້ກຽດມີຄຳເຫັນໂອ້ລົມ ເຊີ່ງທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະພັກ ອຳນາດການປົກຄອງບ້ານ ແລະ ພໍ່ແມ່ປະຊາຊົນ ທີ່ໄດ້ຕັ້ງໜ້າຊີ້ນຳໆພາເຮັດໃຫ້ຍາດໄດ້ຜົນງານຫຼາຍດ້ານ ໃນໄລຍະຜ່ານມາ ພ້ອມນັ້ນທ່ານຍັງໄດ້ອະທິບາຍຊີ້ແຈງສອງບັນຫາທີ່ສຳຄັນ ເປັນຕົ້ນແມ່ນ: 1) ວຽກງານກໍ່ສ້າງຮາກຖານການເມືອງພັດທະນາຊົນນະບົດ ຕາມສີ່ເນື້ອໃນ ສີ່ຄາດໝາຍ ຕິດພັນກັບຂະບວນຮັກຊາດພັດທະນາ ແລະ ວຽກງານສາມສ້າງ ຕາມທິດທາງມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ. 2) ຍົກໃຫ້ເຫັນເຖີງຜົນສຳເລັດຂອງກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ແລະ ສະພາປະຊາຊົນແຂວງວຽງຈັນ.

ນອກນັ້ນທ່ານຍັງໄດ້ເນັ້ນໃຫ້ຄະນະພັກ ອຳນາດການປົກຄອງບ້ານພ້ອມດ້ວຍພໍ່ແມ່ປະຊາຊົນ ຈົ່ງເອົາໃຈໃສ່ສືບຕໍ່ປັບປຸງກຳລັງ ປກຊ-ປກສ ໃຫ້ໃຫ້ມີຄວາມໜັກແໜ້ນເຂັ້ມແຂງ, ພ້ອມກັນແກ້ໄຂບັນຫາປະກົດການຫຍໍ້ທໍ້ຕ່າງໆ ທີ່ເກີດຂື້ນຢູ່ພາຍໃນບ້ານໃຫ້ໝົດໄປຢ່າງຊີ້ນເຊີງ ພ້ອມນັ້ນກໍ່ຕ້ອງເອົາໃຈໃສ່ຕິດຕາມການເຂົ້າ-ອອກຂອງພົນລະເມືອງເພື່ອກຳໃຫ້ໄດ້ເປົ້າໝາຍບຸກຄົນ-ກຸ່ມຄົນທີ່ບໍ່ຫວັງດີ ໃນການສ້າງຄວາມບໍ່ສະຫງົບຢູ່ພາຍໃນ; ສຸມໃສ່ຊຸກຍູ້ດ້ານການຜະລິດກະສິກຳ ເປັນຕົ້ນການປູກ-ການລ້ຽງ ໃຫ້ນັບມື້ນັບແຂງແຮງ ຕາມເງື່ອນໄຂ ແລະ ທ່າແຮງທີ່ມີຢູ່ ໂດຍການນຳໃຊ້ຫຼັກການວິທະຍາສາດ ແລະ ເຕັກໂນໂລຊີເຂົ້າໃນການຜະລິດໃຫ້ນັບມື້ນັບທັນສະໄໝ ເພື່ອຜະລິດສີນຄ້າສົ່ງອອກນັບມື້ນັບຫຼາຍ.

ໃນໂອກາດດັ່ງກ່າວ ທ່ານ ບຸສອນ ເພັດລາວັນ ປະທານສະພາປະຊາຊົນແຂວງ ແລະ ທ່ານ ປອ ສີວຽງໄຊ ອໍລະບູນ ຫົວໜ້າຫ້ອງວ່າການແຂວງ ຍັງໄດ້ມອບເຄື່ອງອຸປະໂພກ-ບໍລິໂພກ ມູນຄ່າ 7 ລ້ານກວ່າກີບ ໃຫ້ພໍໍ່ແມ່ປະຊາຊົນຊາວບ້ານລ້ອງໝາກຄາຍ. ພ້ອມດຽວກັນນັ້ນ ທ່ານ ສີທົນ ແສງພະຈັນ ເຈົ້າເມືອງໆກາສີ ຍັງໄດ້ມອບໂທລະໂຄ່ງ ຈຳນວນ 1 ຊຸດ ມູນຄ່າ 6 ລ້ານກວ່າກີບມອບໃຫ້ບ້ານລ້ອງໝາກຄາຍອີກດ້ວຍ.

(ຂ່າວ: ເມືອງກາສີ)

Leave a Reply

Your email address will not be published.

ສະຫງວນລິຂະສິດ