Vieng Chanh News

ແຂວງວຽງຈັນອອນລາຍ

ກອງປະຊຸມເຜີຍແຜ່ກົດໝາຍວ່າດ້ວຍ ເອກະສານ ຢູ່ເມືອງວຽງຄໍາ

1 min read

ໃນວັນທີ 26 ພຶດສະພາ 2022 ນີ້ ຢູ່ທີ່ຫ້ອງປະຊຸມຊັ້ນ4ຂອງຫ້ອງວ່າການເມືອງວຽງຄໍາ ແຂວງວຽງຈັນໄດ້ຈັດກອງປະຊຸມເຜີຍແຜ່ກົດໝາຍ ແລະ ຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍເອກະສານ.

ໂດຍການເປັນປະທານຂອງທ່ານ ສວຍ ວົງສາລາດ ຮອງເລຂາພັກເມືອງ ປະທານຄະນະກວດກາພັກ-ລັດ ເມືອງວຽງຄໍາ ແລະ ທ່ານ ສຸກສັນ ເຮືອງທອງດີ ຮອງຫົວໜ້າພະແນກພາຍໃນ ແຂວງວຽງຈັນ, ເຂົ້າຮ່ວມມີ ຄະນະຮັບ ຜິດຊອບຂັ້ນແຂວງ, ມີບັນດາທ່ານ ຫົວໜ້າຫ້ອງການ, ພະນັກງານ-ລັດຖະກອນ, ນາຍບ້ານ ພາຍໃນເມືອງວຽງຄໍາເຂົ້າຮ່ວມ.


ທ່ານ ສຸກສັນ ເຮືອງທອງດີ ຮອງຫົວໜ້າພະແນກພາຍໃນ ແຂວງວຽງຈັນ ໄດ້ຂຶ້ນຜ່ານກົດໝາຍ ສະບັບເລກທີ 69/ສພຊ, ລົງວັນທີ 20 ມີຖຸນາ 2019 ແລະ ຜ່ານຄໍາແນະນໍາກ່ຽວກັບ ການຈັດຕັ້ງປະຕິບັດກົດໝາຍວ່າດ້ວຍເອກະສານ, ພ້ອມກັນນັ້ນຄະນະຮັບຜິດຊອບຂັ້ນແຂວງກໍ່ໄດ້ອະທິບາຍ, ແນະນໍາທາງດ້ານເຕັກນິກໃນການແຕ່ງເອກະສານ, ການຄຸ້ມຄອງ ແລະ ການສໍາເນົາເອກະສານແນໃສ່ເພື່ອໃຫ້ພະນັກງານ-ລັດຖະກອນ, ຕະຫຼອດເຖິງຮາກຖານບ້ານໄດ້ມີຄວາມຮັບຮູ້, ເຂົ້າໃຈຢ່າງຖືກຕ້ອງ ແລະ ເປັນເອກະພາບກັນ ຕາມລະບຽບ, ກົດໝາຍໄດ້ກໍານົດໄວ້.


ໃນຕອນທ້າຍກອງປະຊຸມທ່ານ ສວຍ ວົງສາລາດ ຮອງເລຂາພັກເມືອງ ປະທານຄະນະກວດກາພັກ-ລັດ ເມືອງວຽງຄໍາ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຄະນະຮັບຜິດຊອບຂັ້ນແຂວງທີ່ໄດ້ນໍາເອົາບົດຮຽນທີ່ສໍາຄັນມາໃຫ້ແກ່ເມືອງວຽງຄໍາ.

ພ້ອມທັງຊີ້ທິດເຍືອງທາງໃຫ້ແຕ່ລະພາກສ່ວນຈົ່ງນໍາເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃຫ້ຖືກຕ້ອງຕາມລະບຽບກົດໝາຍ ແລະ ມີຜົນສໍາເລັດເປັນກ້າວໆ.

ຂ່າວ: ທອງເວີນ ທໍາມະວົງ.

Leave a Reply

Your email address will not be published.

ສະຫງວນລິຂະສິດ