Vieng Chanh News

ແຂວງວຽງຈັນອອນລາຍ

ກອງປະຊຸມເຜີຍແຜ່-ແນະນໍາການຫັນເຂົ້າສູ່ລະບົບອາກອນມູນຄ່າເພີ່ມ ແລະ ສິດໜ້າທີ່ຂອງຜູ້ຢູ່ໃນລະບົບອາກອນມູນຄ່າເພີ່ມໃຫ້ຫົວໜ່ວຍທຸລະກິດຢູ່ເມືອງກາສີ

1 min read

ກອງປະຊຸມເຜີຍແຜ່-ແນະນໍາການຫັນເຂົ້າສູ່ລະບົບອາກອນມູນຄ່າເພີ່ມ ແລະ ສິດໜ້າທີ່ຂອງຜູ້ຢູ່ໃນລະບົບອາກອນມູນຄ່າເພີ່ມໃຫ້ຫົວໜ່ວຍທຸລະກິດຢູ່ເມືອງກາສີ
ກອງປະຊຸມດັ່ງກ່າວໄດ້ເປີດຂຶ້ນຢ່າງເປັນທາງການ ວັນທີ່ 6 ກໍລະກົດ 2022 ນີ້, ຢູ່ທີ່ສະໂມສອນເມືອງກາສີ ແຂວງວຽງຈັນ.

ໂດຍການເປັນປະທານຂອງທ່ານ ສີທົນ ແສງພະຈັນ ກໍາມະການພັກແຂວງ ເລຂາພັກເມືອງ ເຈົ້າເມືອງໆກາສີ, ມີທ່ານ ບຸນຈັນ ວໍລະເວດ ຮອງຫົວໜ້າກົມສ່ວຍສາອາກອນ ກະຊວງການເງີນ, ມີທ່ານ ທອງແດງ ສຸດທິວົງ ຮ.ກ ຫົວໜ້າພະແນກຄຸ້ມຄອງບັນຊີ, ມີຄະນະຮັບຜິດຊອບການເຜີຍແຜ່ຈາກກົມສ່ວຍສາອາກອນ ກະຊວງການເງີນ, ຈາກພະແນກການເງີນແຂວງວຽງຈັນ ແລະ ຈາກຫ້ອງການ-ການເງີນເມືອງກາສີພ້ອມດ້ວຍບັນດາຫົວໜ່ວຍທຸລະກິດພາຍໃນເມືອງເຂົ້າຮ່ວມທັງໝົດ 52 ທ່ານ. ຍິງ 10 ທ່ານ.

ໃນກອງປະຊຸມທ່ານ ສີເມືອງ ພົມມະຈັນ ໄດ້ໃຫ້ກຽດຂຶ້ນຜ່ານຂໍ້ຕົກລົງຂອງທ່ານເຈົ້າເມືອງໆກາສີ ສະບັບເລກທີ 197/ຈມ.ກສ. ລົງວັນທີ 5 ກໍລະກົດ 2022 ວ່າດ້ວຍການແຕ່ງຕັ້ງຄະນະວິຊາການລົງເຜີຍແຜ່-ແນະນໍາໃຫ້ວິສາຫະກິດເປົ້າໝາຍເຂົ້າລະບົບອາກອນມູນຄ່າເພີ່ມທົ່ວເມືອງກາສີປະຈໍາປີ 2022, ຫຼັງຈາກນັ້ນທ່ານ ສີທົນ ແສງພະຈັນ ເຈົ້າເມືອງໆກາສີກໍ່ໄດ້ໃຫ້ກຽດຂຶ້ນກ່າວເປີດກອງປະຊຸມ ເຊີ່ງທ່ານໄດ້ກ່າວວ່າ: ກອງປະຊຸມ ເຜີຍແຜ່ແນະນຳ ກ່ຽວກັບບັນດານິຕິກຳ ແລະ ການຈັດຕັ້ງປະຕິບັດກ່ຽວກັບ ຂະແໜງສ່ວຍ ສາອາກອນ ແລະ ຂະແໜງຄຸ້ມຄອງການບັນຊີຈະມີ 4 ຫົວຂໍ້ ຄື:

1. ເຜີຍແຜ່, ແນະນຳ ກ່ຽວກັບການຈັດຕັ້ງປະຕິບັດ ການຂະຫຍາຍຖານ ແລະ ຄຸ້ມຄອງອາກອນມູນຄ່າເພີ່ມ, 2. ເຜີຍແຜ່, ແນະນໍາ ກ່ຽວກັບຂັ້ນຕອນການ ຂື້ນທະບຽນ ແລະ ຂໍອະນຸຍາດເຄື່ອງບັນທຶກການຂາຍ-ບໍລິການ, 3. ເຜີຍແຜ່, ແນະນຳ ກ່ຽວກັບ ນິຕິກຳ, ການຈັດຕັ້ງປະຕິບັດວຽກບັນຊີ ວິສາຫະກິດ, 4.ທາງຕ່າງໜ້າບໍລິສັດ ກໍ່ຈະໄດ້ມານຳສະເໜີ ກ່ຽວກັບ ການເນທຶກການຂາຍ(ໃບກັບເງິນ) ແລະ ເປັນໂປຣ ແກມ ທີ່ສາມາດລິ້ງກັບລະບົບລາຍງານການບັນຊີ ແລະ ເຊື່ອມຕໍ່ຈາກລະບົບ(ແທ໋ກລິດ TaxRIS ).

ເພື່ອສ້າງຄວາມເປັນເອກະພາບໃນການຈັດຕັ້ງປະຕິບັດວຽກງານໃຫ້ໄປລວງດຽວກັນ,ຮັບປະກັນ ວຽກງານໃຫ້ບັນດາຫົວໜ່ວຍເປົ້າໝາຍທີ່ຈະເຂົ້າໃນລະບົບອາກອນມູນຄ່າເພີ່ມ ສາມາດນຳໄປຈັດຕັ້ງປະຕິບັດຢ່າງເອກະພາບໃນຂອບເຂດທົ່ວປະເທດ, ເວົ້າລວມ, ເວົ້າສະເພາະກໍ່ຄືແຂວງວຽງຈັນ ແລະ ຮັບປະກັນວຽກງານໃຫ້ມີປະສິດທິພາບ ແລະ ມີປະສິດທິຜົນສູງ, ສຳລັບຫົວໜ່ວຍທຸລະກິດ ທີ່ເຊີນມາໃນມື້ນີ້ ເປັນຫົວໜ່ວຍວິສາຫະກິດທີ່ຢູ່ໃນກຸ່ມເປົ້າໝາຍມີລາຍຮັບ ເກີນຮ້ອຍລ້ານກີບ ແລະ ຈະຕ້ອງໄດ້ເຂົ້າລະບົບອາກອນມູນຄ່າເພີ່ມ ແບບອັດຕະໂນມັດ.

ພ້ອມນີ້ທ່ານກໍ່ໄດ້ຮຽກຮ້ອງໃຫ້ບັນດາທ່ານທ່ເຂົ້າຮ່ວມ ກໍຄືຜູ້ປະກອບການຫົວໜ່ວຍທຸລະກິດ ຈົ່ງເອົາໃຈໃສ່ຮັບຟັງ, ຖອດຖອນບົດຮຽນ ແລະ ໄປຈັດຕັ້ງປະຕິບັດ ໃຫ້ເກີດດອກອອກຜົນ. ຈາກນັ້ນທ່ານ ດາວອນ ສອນດາລາ ຫົວໜ້າໜ່ວຍງານສ່ວຍສາອາກອນເມືອງກາສີ ກໍ່ໄດ້ຂຶ້ນຜ່ານບົດລາຍງານໂດຍຫຍໍ້ຂອງການຈັດຕັ້ງປະຕິບັດວຽກງານອາກອນມູນຄ່າເພີ່ມ, ຕໍ່ມາທ່ານ ບຸນຈັນ ວໍລະເວດ ຫົວໜ້າກົມພະແນກອາກອນມູນຄ່າເພີ່ມ ກະຊວງການເງີນ ໄດ້ຂຶ້ນເຜີຍແຜ່ແນະນໍາກ່ຽວກັບວຽກງານຂະຫຍາຍອາກອນມູນຄ່າເພີ່ມ(ອມພ) ກົດໝາຍສະບັບເລກທີ 01/ສພຊ, ລົງວັນທີ 07 ສິງຫາ 2021.

ຈາກນັ້ນ ທ່ານ ທອງແດງ ສຸດທິວົງ ຮອງກົມຫົວໜ້າພະແນກຄຸ້ມຄອງບັນຊີ ກະຊວງການເງີນ ໄດ້ຂຶ້ນເຜີຍແຜ່ກ່ຽວກັບວຽກງານການນໍາໃຊ້ລະບົບບັນຊີການອອກໃບເກັບເງີນ ອມພ ຜ່ານໂປຼແກມຂອງບໍລິສັດ TSD ຈໍາກັດ. ໃນກອງປະຊຸມໄດ້ມີການປະກອບຄໍາຄິດຄໍາເຫັນເພື່ອເປັນການແລກປ່ຽນບົດຮຽນຢ່າງກົງໄປກົງມາ ເພື່ອເຮັດໃຫ້ວຽກງານຂະຫຍາຍຖານອາກອນມູນຄ່າເພີ່ມຖືກຈັດຕັ້ງປະຕິບັດຕາມລະບຽບກົດຫມາຍທີ່ຂັ້ນເທີງກຳນົດໃວ້ ແລະ ມີປະສິດທີຜົນຢ່າງສູງ.

ໃນໂອກາດດັ່ງກ່າວນີ້ທາງພະແນກການເງີນແຂວງວຽງຈັນກໍ່ໄດ້ນໍາເອົາເງີນສົດຈໍານວນ 10 ລ້ານກີບມາມອບໃຫ້ແກ່ເມືອງກາສີເພື່ອປະກອບສ່ວນກໍ່ສ້າງປະຕູໂຂງເຂົ້າເມືອງ ເຊີ່ງໃຫ້ກຽດຕາງໜ້າກ່າວມອບໂດຍທ່ານ ພູເຂົາທອງ ຮອງຫົວໜ້າສ່ວຍສາອາກອນປະຈຳ ແຂວງວຽງຈັນ ແລະ ກ່າວຮັບໂດຍແມ່ນ ທ່ານ ສີທົນ ແສງພະຈັນ ເຈົ້າເມືອງໆກາສີ ພ້ອມນີ້ທ່ານເຈົ້າເມືອງກໍ່ໄດ້ມອບໃບກຽດຕິຄຸນໃຫ້ແກ່ພະແນກການເງີນເພື່ອເປັນທີ່ລະນຶກບຸນຄຸນ ແລະ ຄຸນງາມຄວາມດີອີກດ້ວຍ.

ໃນຕອນທ້າຍກອງປະຊຸມ ທ່ານ ສີທົນ ແສງພະຈັນ ເຈົ້າເມືອງໆກາສີກໍ່ໄດ້ໃຫ້ກຽດຂຶ້ນມີຄໍາເຫັນໂອ້ລົມ ເຊີ່ງທ່ານໄດ້ເໜັ້ນໜັກໃຫ້ສ່ວຍສາອາກອນປະຈໍາເມືອງຈົ່ງສືບຕໍ່ຄົ້ນຄ້ວາກຳນົດເປົ້າໝາຍຫົວໜ່ວຍທຸລະກິດທີ່ຈະນໍາເຂົ້າສູ່ລະບົບອາກກອນມູນຄ່າເພີ່ມໃຫ້ຊັດເຈນ, ເຊີນຊວນບັນດາເປົ້າໝາຍເຂົ້າຝຶກອົບຮົມເພື່ອສ້າງຄວາມເຂົ້າໃຈໃນການປະຕິບັດວຽກງານອາກອນມູນຄ່າເພີ່ມ, ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງຂອງແຂວງກໍ່ຄືກະຊວງໃຫ້ສືບຕໍ່ຝຶກອົບຮົມເພື່ອຍົກລະດັບຄວາມຮູ້ຄວາມສາມາດໃຫ້ພະນັກງານວິຊາການຂອງເມືອງກາສີຕື່ມອີກ.

ມອບໃຫ້ບັນດາຂະແໜງການທີ່ກ່ຽວຂ້ອງໂດຍສະເພາະກໍ່ຄືຜູ້ຮັບຜິດຊອບວຽກສ່ວຍສາອາກອນຈົ່ງເອົາໃຈໃສ່ເຜີຍແຜ່ບັນດານິຕິກຳຕ່າງທີ່ກ່ຽວຂ້ອງໃຫ້ແກ່ສັງຄົມ ຫົວໜ່ວຍທຸລະກິດເພື່ອສ້າງຄວາມເຂົ້າໃຈລະອຽດຕື່ມ, ໃຫ້ຜູ້ປະກອບການຈົ່ງເອົາໃຈໃສ່ໃຫ້ຄວາມຮ່ວມມືມີຕື່ນຕົວປະກອບສ່ວນໃນວຽກງານສ່ວຍສາອາກອນໃຫ້ຫຼາຍຂຶ້ນກ່ວາເກົ່າ.

ຂ່າວ: ເມືອງກາສີ ດາລັກ

Leave a Reply

Your email address will not be published.

You may have missed

ສະຫງວນລິຂະສິດ