Vieng Chanh News

ແຂວງວຽງຈັນອອນລາຍ

ເມືອງວຽງຄໍາ ເປີດການສອບເສັງຈົບຊັ້ນ ມ 4

1 min read

ໃນວັນທີ 6 ກໍລະກົດ 2022 ນີ້ ຢູ່ທີ່ໂຮງຮຽນ ມສ ປາກແຈ້ງ ເມືອງວຽງຄຳ ແຂວງວຽງຈັນ ໄດ້ເປີດການສອບເສັງຈົບຊັ້ນ ມ4 ຂຶ້ນ ຢ່າງເປັນທາງການ ພາຍໃຕ້ການເປັນປະທານຂອງທ່ານ ນາງ ບຸນລັບ ພົມມະຈັນ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງວຽງຄຳ.

 

ໂດຍການໃຫ້ກຽດເຂົ້າຮ່ວມຂອງທ່ານ ສົມໝາຍ ໄຊຍະວົງ ຮອງເລຂາພັກເມືອງວຽງຄໍາ ຜູ້ຊີ້ນໍາວຽກພັກ-ພະນັກງານ, ມີທ່ານ ພັນທະລີ ດວງດາລາ ຮອງຫົວໜ້າຂະແໜງກິລາມວນຊົນ ພະແນກສຶກສາທິການ ແລະ ກິລາ ແຂວງວຽງຈັນ ຜູ້ຊີ້ນໍາການສອບເສັງ ຊັ້ນມ 4 ປະຈໍາເມືອງວຽງຄໍາ, ມີຄະນະຮັບຜິດຊອບການສອບເສັງຈາກຫ້ອງການສຶກສາທິການ ແລະ ກິລາ ເມືອງວຽງຄໍາ, ມີຜູ້ອໍານວຍການໂຮງຮຽນ, ບັນດາຄູ-ອາຈານ ພ້ອມດ້ວຍນ້ອງນ້ອຍນັກຮຽນຊັ້ນ ມ 4 ເຂົ້າຮ່ວມຢ່າງພ້ອມພຽງ.


ໃນພິທີທ່ານ ໂສພາ ແກ້ວມະນີວົງ ຫົວໜ້າໜ່ວຍງານສຶກສາພາກບັງຄັບ ຫ້ອງການສຶກສາທິການ ແລະ ກິລາ ເມືອງວຽງຄຳ ໄດ້ລາຍງານໃຫ້ຮູ້ວ່າ: ສໍາລັບການສອບເສັງຈົບຊັ້ນ ມ4 ໃນປີນີ້ຈະໄດ້ດໍາເນີນການສອບເສັງເປັນເວລາ 3 ວັນຄື: ວັນທີ 6 ຫາ ວັນທີ 8 ກໍລະກົດ 2022, ສະເພາະຢູ່ເມືອງວຽງຄໍາມີ 01 ສູນສອບເສັງຄື: ສູນ ມສ ປາກແຈ້ງ, ມີນັກສອບເສັງຊັ້ນ ມ 4 ທັງໝົດ 313 ຄົນ, ຍິງ 170 ຄົນ, ສໍາລັບວິຊາສອບເສັງມີ 6 ວິຊາຄື: ວິຊາພາສາລາວ-ວັນນະຄະດີ, ຄະນິດສາດ, ສຶກສາພົນລະເມືອງ, ວິທະຍາສາດທໍາມະຊາດ, ວິທະຍາສາດສັງຄົມ ແລະ ວິຊາພາສາອັງກິດ.

ພ້ອມດຽວກັນນີ້ທ່ານຍັງໄດ້ຜ່ານກົດລະບຽບຂອງການສອບເສັງອີກດ້ວຍ. ໃນໂອກາດດັ່ງກ່າວທ່ານ ພັນທະລີ ດວງດາລາ ຮອງຫົວໜ້າຂະແໜງກິລາມວນຊົນ ພະແນກສຶກສາທິການ ແລະ ກິລາ ແຂວງວຽງຈັນ ຜູ້ຊີ້ນໍາການສອບເສັງ ມ4 ປະຈໍາເມືອງວຽງຄໍາໃຫ້ກຽດມອບຫົວບົດສອບເສັງໃຫ້ແກ່ເມືອງວຽງຄໍາເຊິ່ງກ່າວຮັບໂດຍທ່ານ ນາງ ບຸນລັບ ພົມມະຈັນ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງວຽງຄຳໂດຍຊ່ອງໜ້າກັບການນໍາຂອງເມືອງ, ຄູ-ອາຈານ ພ້ອມດ້ວຍນ້ອງນັກຮຽນເປັນສັກຂີພະຍານ.


ໃນຕອນທ້າຍພິທີ ທ່ານ ສົມໝາຍ ໄຊຍະວົງ ຮອງເລຂາພັກເມືອງວຽງຄໍາ ຜູ້ຊີ້ນໍາວຽກພັກ-ພະນັກງານ ໄດ້ມີຄໍາເຫັນໂອ້ລົມເຊິ່ງທ່ານໄດ້ເນັ້ນໜັກໃຫ້ຄະນະກໍາມະການຍາມຫ້ອງສອບເສັງ ແລະ ນັກສອບເສັງ ຈົ່ງພ້ອມກັນເອົາໃຈໃສ່ປະຕິບັດຕາມກົດລະບຽບຂອງການສອບເສັງຢ່າງເຂັ້ມງວດ, ຮັບປະກັນໃນສູນສອບເສັງໃຫ້ໄດ້500ເປີເຊັນຄື:1.ຮັບປະກັນຫົວບົດສອບເສັງບໍ່ໃຫ້ຮົ່ວ100ເປີເຊັນ; 2.ຮັບປະກັນຄວາມສະຫງົບປອດໄພ100ເປີເຊັນ; 3.ຮັບປະກັນການເກັບເຈ້ຍຕອບນັກສອບເສັງ ແລະ ຈັດລຽງຖືກຕ້ອງ100ເປີເຊັນ; 4.ຄະນະກໍາມະການຍາມຫ້ອງສອບເສັງ ແລະ ນັກສອບເສັງບໍ່ນໍາໃຊ້ໂທລະສັບ100ເປີເຊັນ; 5.

ໃນເວລາເຂົ້າມາສູນສອບເສັງຮັບປະກັນເອົາບົດຕອບຂອງນັກສອບເສັງປະຈໍາສູນຂອງຕົນຮັບຜິດຊອບເຂົ້າມາເຂົ້າມາສູນລວມຢ່າງຖືກຕ້ອງ100ເປີເຊັນ. ແລະ ພ້ອມກັນເອົາໃຈໃສ່ຈັດຕັ້ງປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ, ເພື່ອເຮັດໃຫ້ການສອບເສັງໃນຄັ້ງນີ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.

ຂ່າວ: ທອງເວີນ ທໍາມະວົງ

Leave a Reply

Your email address will not be published.

You may have missed

ສະຫງວນລິຂະສິດ