Vieng Chanh News

ແຂວງວຽງຈັນອອນລາຍ

ກອງບັນຊາການທະຫານແຂວງວຽງຈັນ ປາຖະກະຖາປີສາມັກຄີມິດຕະພາບ ລາວ-ຫວຽດນາມ

1 min read

ໃນວັນທີ 6ກໍລະກົດ 2022 ນີ້, ກອງບັນຊາການທະຖານແຂວງວຽງຈັນ ໄດ້ຈັດພິທີປາຖະກະຖາປີສາມັກຄີມິດຕະພາບ ລາວ-ຫວຽດນາມ, ວັນເຊັນສົນທິສັນຍາ ມິດຕະພາບ-ການຮ່ວມມື ຄົບຮອບ 45 ປີ (18 ກໍລະກົດ 1977-18 ກໍລະກົດ 2022 ) ແລະ ວັນສ້າງ ຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5 ກັນຍາ 1962-5 ກັນຍາ 2022) ແລະ ປະຫວັດຄວາມເປັນມາຂອງກົກແຕ້ຈາລຶກແຫ່ງຄວາມແຄ້ນຂອງປະຊາຊົນຊາວເມືອງເຟືອງ.

ໂດຍການເປັນປະທານ ແລະ ປາຖະກະຖາຂອງ ສະຫາຍ ພັນເອກ ບຸນຜອງ ບຸດທະວົງ ກຳມະການພັກແຂວງ ຄະນະປະຈຳພັກກອງບັນຊາການຫົວໜ້າຫ້ອງພະລາທິການທະຫານແຂວງວຽງຈັນ, ມີຄະນະພັກ-ຄະນະບັນຊາ, ພະນັກງານຫຼັກແຫຼ່ງອົງການ 5 ຫ້ອງ, ກົມກອງອ້ອມຂ້າງ ແລະ ພະນັກງານ-ນັກຮົບ ເຂົ້າຮ່ວມຮັບຟັງຢ່າງພ້ອມພຽງ.


ສະຫາຍ ພັນເອກ ບຸນຜອງ ບຸດທະວົງ, ໄດ້ຍົກໃຫ້ເຫັນ ຄວາມໝາຍ, ຄວາມສໍາຄັນ, ປະ ຫວັດຄວາມເປັນມາ, ມູນເຊື້ອແຫ່ງຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ເຄີຍມີມາແຕ່ລະຍຸກແຕ່ລະສະ
ໄໝ ໂດຍສະເພາະແມ່ນນັບແຕ່ສະໄໝຮ່ວມຂຸມຄອງຕໍ່ສູ້ກູ້ຊາດຕ້ານ ການຮຸກຮານ ແລະ ຕີສັດຕູໂຕດຽວກັນ ຄືພວກລ່າເມືອງຂຶ້ນແບບເກົ່າ ແລະ ແບບໃໝ່ຈົນສາມາດຍາດໄດ້ໄຊຊະນະ, ປົດປ່ອຍປະເທດຊາດ.

ປົດປ່ອຍປະຊາຊົນອອກຈາກແອກປົກຄອງຂອງພວກຕ່າງດ້າວ, ມາຮອດໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ແລະ ເຖິງປັດຈຸບັນສອງຊາດ ລາວ-ຫວຽດນາມອ້າຍນ້ອງຍິ່ງເພີ່ມທະວີ ແລະ ຮັດແໜ້ນສາຍພົວພັນມິດຕະພາບໃຫ້ຂະຫຍາຍຕົວຢ່າງບໍ່ຢຸດຢັ້ງ.

ການ ຈັດຕັ້ງປາຖະກະຖາໃນຄັ້ງນີ້, ເພື່ອ ເປັນການລະນຶກເຖິງຄຸນງາມ ຄວາມດີຂອງພັກ, ລັດ, ກອງທັບ ແລະ ປະຊາຊົນຫວຽດນາມອ້າຍ ນ້ອງທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງ, ລໍ້າຄ່າໃນພາລະກິດປະຕິວັດປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເປັນການຫວນຄືນມູນເຊື້ອ ແຫ່ງຄວາມສາມັກຄີລະຫວ່າງ ສອງຊາດລາວ-ຫວຽດນາມ ແລະ ສະເຫຼີມສະຫຼອງວັນປະຫວັດສາດທີ່ສໍາຄັນດັ່ງກ່າວໃຫ້ເຕັມໄປດ້ວຍຄວາມໝາຍອັນເລິກເຊິ່ງ.

ແລະ ມີຂະບວນການຟົດຟື້ນ ທັງການໂຄສະນາ, ສຶກສາອົບຮົມພະນັກງານ-ສະມາຊິກພັກ-ນັກຮົບ, ໃຫ້ຮັບຮູ້ ແລະ ເຂົ້າໃຈຕື່ມກ່ຽວກັບມູນເຊື້ອແຫ່ງການພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ໃຫ້ເລິກເຊິ່ງ ແລະ ສືບຕໍ່ເສີມຂະຫຍາຍ ມູນເຊື້ອອັນດີງາມດັ່ງກາວໄວໃຫ້ໝັ້ນຄົງ ທັງເປັນເຈົ້າການທະນຸທະໜອມເພີ່ມພູນຄູນສ້າງມູນເຊື້ອດັ່ງກ່າວໃຫ້ຈະເລີນງອກງາມຍິ່ງໆຂຶ້ນ, ນອກຈາກນັ້ນຍັງໄດ້ຍົກໃຫ້ເຫັນປະຫວັດຄວາມເປັນມາຂອງກົກແຕ້ຈາລຶກຄວາມແຄ້ນຂອງປະຊາຊົນຊາວເມືອງເຟືອງ.


ກົກແຕ້ຈາລຶກຄວາມແຄ້ນ: ແມ່ນຍ້ອນພວກລ່າເມືອງຂື້ນແບບໃໝ່ ແລະ ລູກແຫຼ້ງຕີນມືຂອງພວກມັນໄດ້ຈັບເອົານັກປະຕິວັດຜູ້ອົງອາດກ້າຫານ, ວິລະຊົນ ແລະ ປະຊາຊົນບັນດາເຜົ່າຊາວເມືອງເຟືອງຜູ້ມີນ້ຳໃຈຮັກຊາດ ມາທຸບຕີທໍລະມານ ແລະ ຂ້າແຂວນຄໍຢູ່ກົກແຕ້ແຫ່ງນີ້ ເປັນຈຳນວນ 17 ສົບ, ເຊິ່ງລ້ວນແລ້ວແຕ່ແມ່ຜູ້ຕໍ່ສູ້ ເພື່ອບ້ານ ເພື່ອເມືອງ ໃຫ້ຢູ່ເຢັນເປັນສຸກ ໄລຍະຜ່ານມາຊາວເມືອງເຟືອງເອີ້ນວ່າ: ກົກແຕ້ວິລະຊົນ, ແຕ່ເຫັນວ່າບໍ່ສອດຄ່ອງ.

ທາງການນໍາຂັ້ນແຂວງ ເມືອງ ຈຶ່ງໄດ້ຄົ້ນຄ້ວາ ແລະ ເອກະພາບກັນໃສ່ຊື່ວ່າ: ກົກແຕ້ຈາລຶກຄວາມແຄ້ນຂອງປະຊາຊົນບັນດາເຜົ່າຂອງຊາວເມືອງເຟືອງ, ທັງນີ້ກໍ່ເພື່ອເປັນການອະນຸລັກ ແລະ ບຸລະນະກໍ່ສ້າງໃຫ້ເປັນບ່ອນສັກກະລະບູຊາ, ບ່ອນສຶກສາຮຽນຮູ້ ແລະ ເປັນບ່ອນທ່ອງທ່ຽວທາງປະຫວັດສາດ ເພື່ອໃຫ້ຄົນລຸ້ນໃໝ່ໄດ້ທ່ຽວຊົມ ຮັບຮູ້ຂໍ້ມູນທາງປະຫວັດສາດຄວາມເປັນມາຕໍ່ໆໄປ.

ໂດຍ: ຈັນທະຈອນ ສີສະເກດ

Leave a Reply

Your email address will not be published.

You may have missed

ສະຫງວນລິຂະສິດ