Vieng Chanh News

ແຂວງວຽງຈັນອອນລາຍ

ເມືອງກາສີເຜີຍແຜ່ເຊື່ອມຊືມນິຕິກຳກ່ຽວກັບການຄຸ້ມຄອງ ແລະ ນໍາໃຊ້ລົດບໍລິຫານຂອງລັດ.

1 min read

ໃນຕອນເຊົ້າວັນທີ 7 ກໍລະກົດ 2022 ນີ້, ເມືອງກາສີໄດ້ຈັດກອງປະຊຸມເຜີຍແຜ່ບັນດານິຕິກຳກ່ຽວກັບການຄຸ້ມຄອງແລະ ນໍາໃຊ້ລົດບໍລິຫານຂອງລັດ ຂຶ້ນຢູ່ທີ່ສະໂມສອນຂອງເມືອງກາສີ ແຂວງວຽງຈັນ.

ໂດຍການເປັນປະທານຂອງທ່ານ ສີທົນ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ, ມີຮອງເລຂາ, ມີຄະນະປະຈໍາ-ກໍາມະການພັກເມືອງ, ມີຫົວໜ້າຫ້ອງການອ້ອມຂ້າງເມືອງເຂົ້າຮ່ວມທັງໝົດ 33 ທ່ານ, ຍິງ 2 ທ່ານ.


ໃນກອງປະຊຸມທ່ານ ອຳພອນ ສາວະບຸດ ກຳມະການພັກເມືອງ ຫົວໜ້າຫ້ອງວ່າການເມືອງ ກໍ່ໄດ້ໃຫ້ກຽດຂຶ້ນເຜີຍແຜ່ດຳລັດວ່າດ້ວຍ: ລົດຂອງລັດ ສະບັບເລກທີ 599/ລບ ລົງວັນທີ 29 ກັນຍາ 2021, ຫຼັງຈາກນັ້ນ ທ່ານ ຄໍາອ້ວນ ສຸວັນທອງ ຮອງເຈົ້າເມືອງໆກາສີ ກໍ່ໄດ້ຂຶ້ນເຜີຍແຜ່ຄໍາແນະນຳຂອງຫ້ອງວ່າການສໍານັກງານນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດດຳລັດວ່າດ້ວຍລົດຂອງລັດ ເລກທີ 599/ລບ ສະເພາະລົດປະຈໍາຕໍາແໜ່ງການນໍາຂັ້ນສູງປະເພດ I ຫາ IV ສະບັບເລກທີ 02/ຫສຍນ. ລົງວັນທີ 30 ທັນວາ 2021.

ຈາກນັ້ນທ່ານ ສີເມືອງ ພົມມະຈັນ ກຳມະການພັກເມືອງ ຫົວໜ້າຫ້ອງການ-ການເງີນ ໄດ້ຂຶ້ນເຜີຍແຜ່ຄໍາແນະນໍາຂອງກະຊວງການເງີນ ກ່ຽວກັບການຄຸ້ມຄອງ ແລະ ນໍາໃຊ້ລົດບໍລິຫານຂອງລັດ ເລກທີ 0393/ກງ ລົງວັນທີ 4 ກຸມພາ 2022. ກອງປະຊຸມໄດ້ມີການປະກອບຄໍາຄິດຄໍາເຫັນຕໍ່ກັບວຽກງານດັ່ງກ່າວຢ່າງກົງໄປກົງມາເພື່ອເຮັດໃຫ້ການຄຸ້ມຄອງ ແລະ ນໍາໃຊ້ລົດບໍລິຫານຂອງລັດເປັນໄປຕາມບັນດານິຕິກຳທີ່ທາງຂັ້ນເທິງວາງອອກ.

ໃນຕອນທ້າຍທ່ານ ເຈົ້າເມືອງໆກາສີ ກໍ່ໄດ້ຂຶ້ນມີຄໍາເຫັນໂອ້ລົມ ເຊີ່ງທ່ານກໍ່ໄດ້ຮຽກຮ້ອງມາຍັງຄະນະຮັບຜິດຊອບວຽກງານດັ່ງກ່າວຈົ່ງສືບຕໍ່ປະສານສົມທົບກັບຂະແໜງການທີ່ກ່ຽວຂ້ອງໃຫ້ກວດກາຄືນພ້ອມທັງເກັບກຳຂໍ້ມູນໃຫ້ລະອຽດຊັດເຈນ ບໍ່ວ່າຈະເປັນລົດຈັກ, ລົດໃຫຍ່, ກວດຄືນດ້ານສະພາບເຕັກນິກ, ປຶກສາຫາລືດ້ານການຕິດສະຕິກເກີ່.

ເພື່ອໃຫ້ຖືກຕ້ອງຕາມລະບຽບຫຼັກການທີ່ຂັ້ນເທີງວາງອອກ, ພ້ອມກັນນັ້ນ ກໍຂຶ້ນແຜນຄວາມຕ້ອງການຂອງບັນດາຫ້ອງການແລ້ວນໍາສະເໜີຂັ້ນເທີງເພື່ອໃຫ້ມີຄວາມສະດວກສະບາຍໃນການນຳໃຊ້ເຂົ້າໃນການຈັດຕັ້ງປະຕິບັດວຽກງານຂອງຕົນ.

ຂ່າວ: ເມືອງກາສີ.

Leave a Reply

Your email address will not be published.

You may have missed

ສະຫງວນລິຂະສິດ