ໂຮງຮຽນການເມືອງ ແລະ ການປົກຄອງແຂວງວຽງຈັນ ລົງເຄື່ອນໄຫວເຮັດວຽກຢູ່ເມືອງຫີນເຫີບແຂວງວຽງຈັນ - Vieng Chanh News

Vieng Chanh News

ແຂວງວຽງຈັນອອນລາຍ

ໂຮງຮຽນການເມືອງ ແລະ ການປົກຄອງແຂວງວຽງຈັນ ລົງເຄື່ອນໄຫວເຮັດວຽກຢູ່ເມືອງຫີນເຫີບແຂວງວຽງຈັນ

1 min read

ວັນທີ 24 ສິງຫາ 2022 ຢູ່ທີ່ສະໂມສອນເມືອງຫີນເຫີບແຂວງວຽງຈັນໄດ້ຈັດກອງປະຊຸມເກັບກໍາຂໍ້ມູນ ແລະ ປະເມີນຜົນອາດີດນັກສຶກສາທີ່ໄດ້ຮຽນຈົບຈາກໂຮງຮຽນທິດສະດີການເມືອງ ແລະ ການປົກຄອງແຂວງວຽງຈັນ ຮຸ້ນທີ10 – 14 ແລະ ເລຂາພັກບ້ານ – ນາຍບ້ານພາຍໃນເມືອງຫີນເຫີບ.

ໂດຍການເປັນປະທານຂອງ ທ່ານ ໜູຮັກ ຫຼວງໂຄດ ຮອງເລຂາໜ່ວຍພັກ ຮອງຫົວໜ້າອໍານວຍການໂຮງຮຽນການເມືອງ ແລະ ການປົກຄອງແຂວງວຽງຈັນ ທັງເປັນຫົວໜ້າຄະນະປະເມີນ, ມີ ທ່ານ ກົງຈັນ ພັນທະມິດ ຮອງເລຂາພັກເມືອງ ຜູ້ຊີ້ນໍາວຽກງານການເມືອງ – ແນວຄິດ ວຽກງພັກ ພະນັກງານ, ບັນດາຄູ – ອາຈານຈາກໂຮງຮຽນການເມືອງ ແລະ ການປົກຄອງແຂວງ, ອາດີດນັກສຶກສາທິດສະດີການ ເມືອງ ແລະ ການປົກຄອງແຂວງວຽງຈັນ ຮຸ້ນທີ 10 – 14 ແລະ ເລຂາພັກບ້ານ – ນາຍບ້ານພາຍໃນເມືອງຫີນເຫີບເຂົ້າຮ່ວມທັງໝົດ 47 ທ່ານ, ຍິງ 8 ທ່ານ.


ທ່ານ ໜູຮັກ ຫຼວງໂຄດ ຮອງເລຂາໜ່ວຍພັກ ຮອງຫົວໜ້າອໍານວຍການໂຮງຮຽນການເມືອງ ແລະ ການປົກ ຄອງແຂວງວຽງຈັນໄດ້ກ່າວວ່າ ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງໆວຽງຈັນ ສະບັບເລກທີ 832 /ຈຂ.ວຈ ລົງວັນທີ 26 ກໍລະກົດ 2022 ເພື່ອປະຕິິບັດຕາມແຜນການລົງປະເມີນຂອງໂຮງຮຽນການເມືອງ ແລະ ການປົກຄອງແຂວງວຽງຈັນວາງອອກ ຈຸດປະສົ່ງຂອງການລົງເຄື່ອນໄຫວວຽກງານໃນຄັ້ງນີ້ກໍ່ເພື່ອປະເມີນ ແລະ ເກັບກໍາຂໍ້ມູນກ່ຽວກັບການຈັດຕັ້ງປະຕິບັດໂຄງການຫຼັກສູດທິດສະດີການເມືອງ ແລະ ການປົກຄອງທັງລະບົບກໍ່ສ້າງຊັ້ນກາງ ແລະ ຝຶກອົບຮົມເລຂາພັກບ້ານ – ນາຍບ້ານໄລຍະ 10 ວັນ.


ເພື່ອນໍາເອົາບັນດາຄໍາຄິດຄໍາເຫັນ, ການຕໍານິສົ່ງຂ່າວກ່ຽວກັບວຽກງານບໍລິຫານຮັບໃຊ້ຊຸດຮຽນ, ການຄຸ້ມຄອງການຮຽນ – ການສອນ, ຫຼັກສູດ, ການສິດສອນຂອງຄູ – ອາຈານ, ການຈັດຕັ້ງການຮຽນ – ການສອນ ແລະ ບັນຫາອື່ນໆທີ່ກ່ຽວຂ້ອງ ເພື່ອນໍາໄປປັບປຸງແກ້ໄຂໃຫ້ນັບມື້ນັບດີຂຶ້ນ ແລະ ມີຄຸນນະພາບສູງກວ່າເກົ່າ.

ພ້ອມດຽວກັນຄະນະຮັບຜິດຊອບກອງປະຊຸມຍັງໄດ້ຢາຍແບບຟອມການປະເມີນໃຫ້ຜູ້ເຂົ້າຮ່ວມ ແລະ ໄດ້ປະເມີນຜົນຕາມແບບຟອມທີ່ກໍານົດໃຫ້ ຜູ້ເຂົ້າຮ່ວມກອງປະຊຸມຍັງໄດ້ຜັດປ່ຽນກັນຂຶ້ນປະກອບຄໍາຄິດຄໍາເຫັນຢ່າງກົງໄປກົງມາແນໃສ່ເພື່ອພ້ອມກັນຊອກຫາວິທີແກ້ໄຂບັນຫາຈຸດອ່ອນ – ຂໍ້ຄົງຄ້າງໃນໄລຍະຜ່ານມາ ເພື່ອປັບປຸງແກ້ໄຂໃຫ້ດີຂຶ້ນກວ່າເກົ່າ.

ຂ່າວ: ເມືອງຫີນເຫີບ

Leave a Reply

Your email address will not be published.

You may have missed

ສະຫງວນລິຂະສິດ