ກອງບັນຊາການ ປກສ ເມືອງກາສີຈັດພິທີປະຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນແຂວງວຽງຈັນຄົບຮອບ 41 ປີ - Vieng Chanh News

Vieng Chanh News

ແຂວງວຽງຈັນອອນລາຍ

ກອງບັນຊາການ ປກສ ເມືອງກາສີຈັດພິທີປະຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນແຂວງວຽງຈັນຄົບຮອບ 41 ປີ

1 min read

ໃນວັນທີ 14 ກັນຍາ 2022 ນີ້, ກອງບັນຊາການ ປກສ ເມືອງກາສີຈັດພິທີປະຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນແຂວງວຽງຈັນຄົບຮອບ 41 ປີ (07/09/1981 – 07/09/2022) ຢູ່ທີ່ສະໂມສອນຂອງເມືອງກາສີ ແຂວງວຽງຈັນ.

ໂດຍການໃຫ້ກຽດເຂົ້າຮ່ວມປະທານຂອງທ່ານ ພັທ ກິປັນ ເຮັງປະເສີດ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງ, ທ່ານ ພັທ ຄໍາສະອີ ດີບົວລີ ຮອງຫົວໜ້າກອງບັນຊາການ ປກສ ເມືອງ ແລະ ທ່ານ ພັທ ບຸນທ່ຽງ ສຸລິຍັນ ຮອງຫົວໜ້າກອງບັນຊາການ ປກສ ເມືອງ, ມີບັນດາສະຫາຍຄະນະພັກ-ຄະນະບັນຊາ, ຫົວໜ້າພະແນກການຕຳຫຼວດ, ມີນາຍ ແລະ ພົນຕຳຫຼວດພ້ອມດ້ວຍອ້າຍນ້ອງໃນກຳລັງ ປກສ ທົ່ວເມືອງເຂົ້າຮ່ວມຢ່າງພ້ອມພຽງ.


ໃນພິທີທ່ານ ພັທ ກິປັນ ເຮັງປະເສີດ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງກາສີ ກໍ່ໄດ້ໃຫ້ກຽດຂຶ້ນເລົ່າຄືນມູນເຊື້ອວ່າວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນແຂວງວຽງຈັນຄົບຮອບ 41 ປີວ່າ: ພາຍຫຼັງແຂວງວຽງຈັນໄດ້ຮັບການສ້າງຕັ້ງຂື້ນໃນວັນທີ 13 ສິງຫາ 1981 ສະພາລັດຖະມົນຕີຈຶ່ງໄດ້ອອກຂໍ້ຕົກລົງ ສະບັບເລກທີ 251/ສພຕ, ລົງວັນທີ 7 ກັນຍາ 1981 ວ່າດ້ວຍການສ້າງຕັ້ງຫົວໜ້າ ແລະ ຮອງຫົວໜ້າກອງບັນຊາການປ້ອງກັນຄວາມສະຫງົບ ແຂວງວຽງຈັນ, ເຊິ່ງສຳນັກງານຕັ້ງຢູ່ບ້ານທ່າຊັນ ເມືອງແກ້ວອຸດົມ.

ດ້ານກົງຈັກການຈັດຕັ້ງໃນ ໄລຍະນັ້ນມີ 06 ພະແນກ ແລະ 09 ກອງເມືອງ ປະກອບກຳລັງພົນທັງໝົດ 300 ສະຫາຍ, ສະເພາະຢູ່ສຳນັກງານກອ ງບັນຊາການ ປກສ ແຂວງມີ 37 ສະຫາຍ, ມີໜ່ວຍພັກດຽວເອີ້ນວ່າ ໜ່ວຍພັກກອງບັນຊາການ ປກສ ແຂວງວຽງຈັນ, ມີສະມາຊິກພັກທັງໝົດ 30 ສະຫາຍ, ພາຍຫຼັງໄດ້ຮັບການສ້າງ ແລະ ມີສຳນັກງານເປັນຂອງຕົນເອງ ເປັນທີ່ຮຽບຮ້ອຍແລ້ວ ໂດຍໄດ້ຮັບການຊີ້ນຳຈາກ ຄະນະພັກ, ຄະນະກໍາມະການປົກຄອງແຂວງວຽງຈັນ, ກອງບັນຊາການປ້ອງກັນຄວາມສະຫງົບຂອງພວກເຮົາ ກໍ່ໄດ້ ເອົາໃຈໃສ່ພັດທະນາພື້ນຖານໂຄງລ່າງ ແລະ ກໍ່ສ້າງຂະຫຍາຍກຳລັງພົນ.

ຕາມຄວາມຮຽກຮ້ອງຕ້ອງການຂອງໜ້າທີ່ວຽກ ງານ ແຕ່ລະປີຢ່າງບໍ່ຢຸດຢັ້ງທັງຮັບປະກັນປະລິມານ ແລະ ຄຸນນະພາບເປັນຕົ້ນ : ປີ 1982 ໄດ້ກະກຽມກໍ່ສ້າງສຳນັກງານຢູ່ບ້ານເວີນສານ ເມືອງວຽງຄຳ ໃນປະຈຸບັນ ພ້ອມທັງຍົກຍ້າຍຈຳນວນໜຶ່ງມາຢູ່. ມາຮອດປີ 1993 ໄດ້ຮັບອະນຸມັດຈາກກະຊວງພາຍໃນ ໃຫ້ສ້າງຕັ້ງໂຮງຮຽນ ປກສ ຊັ້ນຕົ້ນຂຶ້ນໜຶ່ງແຫ່ງ ສາມາດສ້າງພະນັກງານສືບທອດໄດ້ທັງໝົດ 8 ຮຸ່ນ, ມີຈຳນວນພົນທັງໝົດ 1.926 ຄົນປະຈຸບັນນີ້ ພວກເຮົາມີກໍາລັງທັງໝົດຢູ່ພາຍໃນກອງບັນຊາການ ປກສ ແຂວງ 2.644 ສະຫາຍ ຍິງ 498 ສະຫາຍ; ມີ 11 ກອງບັນຊາການ ປກສ ເມືອງ ມີກໍາລັງຂຶ້ນກັບເມືອງທັງໝົດ 1.552 ສະຫາຍ.

ຄະນະພັກກອງບັນຊາການ ປກສ ແຂວງນັບແຕ່ມື້ສ້າງຕັ້ງມາຮອດປະຈຸບັນສາມາດເປີດກອງປະຊຸມໃຫຍ່ໄດ້ທັງໝົດ V ຄັ້ງ, ປະຈຸບັນປະກອບມີຄະນະພັກກອງບັນຊາການ 11 ສະຫາຍ, ມີ 3 ຮາກຖານພັກ, ມີ 6 ຄະນະພັກຮາກຖານ, ມີ 33 ໜ່ວຍພັກຂຶ້ນກັບຄະນະພັກຮາກຖານ, ມີຈໍານວນພົນທັງໝົດ 2.050 ສະຫາຍ, ຍິງ 384 ສະຫາຍ, ມີສະມາຊິກພັກທັງໝົດ 1.900 ສະຫາຍ, ຍິງ 314 ສະຫາຍ, ສະມາຊິກພັກສໍາຮອງ 150 ສະຫາຍ, ຍິງ 35 ສະຫາຍ. ນັບແຕ່ 1981 ຫາປະຈຸບັນພາຍຫຼັງກອງບັນຊາການ ປກສ ປະຊາຊົນ ແຂວງວຽງຈັນ ໄດ້ຮັບການສ້າງຕັ້ງຂຶ້ນກໍ່ໄດ້ປະເຊີນກັບສະພາບການ ອັນຫຍຸ້ງຍາກສັບສົນຫຼາຍດ້ານ, ມີຫຼາຍເຫດການທີ່ເກີດຂຶ້ນໂດຍສະເພາະພວກສັດຕູ ແລະ ກຸ່ມຄົນບໍ່ດີ ຍາມໃດກໍ່ບໍ່ ປະລະຄວາມພະຍາຍາມ ສ້າງຄວາມບໍ່ສະຫງົບຕ່າງໆ ຂຶ້ນຢູ່ຕາມຮາກຖານປະຊາຊົນ.

ໂດຍສືບຕໍ່ຮັກສາມູນເຊື້ອ, ຄະນະພັກ-ຄະນະນໍາກອງບັນຊາການ ປກສ ແຂວງວຽງຈັນ ກໍ່ໄດ້ສືບຕໍ່ນຳເອົາກຳລັງລົງກໍ່ສ້າງຮາກຖານປຸກລະດົມຂົນຂວາຍປະຊາຊົນໃຫ້ເຂົ້າໃຈຕໍ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ແລະ ປະກອບສ່ວນເຂົ້າໃນວຽກປ້ອງກັນຊາດປ້ອງກັນຄວາມສະຫງົບຮອບດ້ານໂດຍສະເພາະແມ່ນໄດ້ເລັ່ງໃສ່ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃນແຕ່ລະໄລຍະໃຫ້ມີຜົນສຳເລັດເປັນກ້າວໆ.

ຫຼັງຈາກນັ້ນທ່ານ ພັທ ຄໍາສະອີ ດີບົວລີ ຮອງຫົວໜ້າກອງບັນຊາການ ປກສ ເມືອງກໍ່ໄດ້ຂຶ້ນຜ່ານລັດຖະດຳລັດຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນ ສະບັບເລກທີ່ 112/ປປທ ລົງວັນທີ່ 20 ມິຖຸາ 2017 ກ່ຽວກັບການປະກາດໃຊ້ກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນ ເຊີ່ງມີທັງໝົດ IX ໝວດ ແລະ 54 ມາດຕາ, ຈາກນັ້ນທ່ານ ທ່ານ ພັທ ບຸນທ່ຽງ ສຸລິຍັນ ຮອງຫົວໜ້າກອງບັນຊາການ ປກສ ເມືອງ ກໍ່ໄດ້ຂຶ້ນຜ່ານເອກະສານການດຳລົງຊີວິດແບບປະຢັດ ແລະ ຕ້ານການຟຸມເຟືອຍທຸກຮູບແບບໃຫ້ແກ່ອ້າຍນ້ອງໃນກຳລັງປ້ອງກັນຄວາມສະຫງົບໄດ້ຮັບຮູ້ຕື່ມອີກ.

ຂ່າວ: ເມືອງກາສີ.

Leave a Reply

Your email address will not be published.

You may have missed

ສະຫງວນລິຂະສິດ