ກອງປະຊຸມສະຫຼຸບເນື້ອໃນຂໍ້ແຂ່ງຂັນ 5 ​ເປັນເຈົ້າຂອງສະຫະພັນກໍາມະບານ ເຂື່ອນໄຟຟ້ານໍ້າງື່ມ 1 - Vieng Chanh News

Vieng Chanh News

ແຂວງວຽງຈັນອອນລາຍ

ກອງປະຊຸມສະຫຼຸບເນື້ອໃນຂໍ້ແຂ່ງຂັນ 5 ​ເປັນເຈົ້າຂອງສະຫະພັນກໍາມະບານ ເຂື່ອນໄຟຟ້ານໍ້າງື່ມ 1

1 min read

ວັນທີ 16 ກັນຍາ 2022 ສະຫະພັນກໍາມະບານ ເຂື່ອນໄຟຟ້ານໍ້າງື່ມ 1 ໄດ້ເປີດກອງປະຊຸມສະຫຼຸບ ເນື້ອໃນຂໍ້ແຂ່ງຂັນ 5 ເປັນເຈົ້າ ຂື້ນ ຢູ່ທີ່ຫ້ອງປະຊຸມຂອງເຂື່ອນໄຟຟ້າດັ່ງກ່າວ, ໂດຍເປັນປະທານຂອງທ່ານ ວິໄຊພອນ ສີສຸລາດ ຄະນະບໍລິຫານງານສະຫະພັນກໍາມະບານແຂວງ, ປະທານສະຫະພັນກໍາມະບານເຂື່ອນໄຟຟ້ານໍ້າງື່ມ 1.

ໃຫ້ກຽດເຂົ້າຮ່ວມໂດຍ ທ່ານ ສົມໃຈ ສີຈັນທະລາດ ຄະນະພັກຮາກຖານ ພະແນກພະລັງງານ ແລະ ບໍແຮ່ ແຂວງ ເລຂາໜ່ວຍພັກ, ຜູ້ອໍານວຍການເຂື່ອໄຟຟ້ານໍ້າງື່ມ 1,  ມີທ່ານ ບົວລໍາແພງ ວາງປະດິດ ຮອງປະທານຄະນະບໍລິຫານງານສະຫະພັນກໍາມະບານແຂວງ, ມີແຂກຮັບເຊີນ ແລະ ສະມາຊີກກໍາມະບານພາຍໃນ ເຂົ້າຮ່ວມ 95 ສະຫາຍ, ຍິງ 18 ສະຫາຍ.

 

ໃນກອງປະຊຸມ ທ່ານ ວິໄຊພອນ ສີສຸລາດ ໄດ້ຂື້ນຜ່ານບົດສະຫຼຸບ ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານ ເຂື່ອນໄຟຟ້ານໍ້າງື່ມ 1 ປະຈໍາປີ 2022 ແລະ ທິດທາງແຜນການ ປີ 2023. ສະຫະພັນກໍາມະບານ ເຂື່ອນໄຟຟ້ານໍ້າງື່ມ 1 ໄດ້ຮັບການສ້າງຕັ້ງຂື້ນ ໃນວັນທີ 01 / 08 / 2014 ເປັນຕົ້ນມາ, ປະຈຸບັນມີສະມາຊີກກໍາມະບານທັງໝົດ 147 ສະຫາຍ, ຍິງ 25 ສະຫາຍ, ມີຄະນະບໍລິຫານງານ 5 ສະຫາຍ, ຍິງ 1 ສະຫາຍ, ປະກອບມີ 4 ກໍາມະບານຮາກຖານຂື້ນກັບ,​ ສະມາຊີກກອງທືນຊ່ວຍເຫຼືອເຊີ່ງກັນ ແລະ ກັນ ຈໍານວນ 205 ສະຫາຍ, ຍິງ 43 ສະຫາຍ.

ໄລຍະຜ່ານມາໄດ້ຖືເອົາວຽກງານໂຄສະນາສືກສາອົບຮົມການເມືອງ-ແນວຄິດເປັນຫຼັກໂດຍນໍາເອົາແນວທາງແຜນນະໂຍບາຍຂອງພັກ, ລະບຽບ, ກົດໝາຍຂອງລັດ ແລະ ນິຕິກໍາອື່ນໆ ເຜີຍແຜ່ເຊື່ອມຊືມໃຫ້ສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ ພາຍໃນຂົງເຂດຄວາມຮັບຜິດຊອບຂອງຕົນ.

ໃຫ້ມີຄວາມອຸ່ນອຽງທຸ່ນທ່ຽງ ເຊື້ອໝັ້ນຕໍ່ການນໍາພາຂອງພັກ-ລັດ,ມີຄຸນສົມບັດຕໍ່ສີນທໍາປະຕິວັດ, ມີຄວາມສາມັກຄີຊ່ວຍເຫຼືອເຊີ່ງກັນ ແລະ ກັນ ເວົ້າລວມ ເວົ້າສະເພາະແມ່ນໄດ້ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຕິດພັນກັບ ການສ້າງຂະບວນການຮັກຊາດ ແລະ ພັດທະນາ, ການສ້າງໜ່ວຍພັກປອດໃສ່, ເຂັມແຂງ, ໜັກແໜ້ນ ແລະ ຕິດພັນກັບການປະຕິບັດວຽກງານວິຊາສະເພາະ ຢູ່ໃນກົມກອງຂອງຕົນ.  ເຊີ່ງແຕ່ລະເນື້ອໃນຂໍ້ແຂ່ງຂັນ 5 ເປັນເຈົ້າ ສາມາດປະຕິບັດໄດ້ 95 % ຂື້ນໄປ.

ຫຼັງຈາກນັ້ນ, ພິທີໄດ້ມອບ-ຮັບໃບຍ້ອງຍໍກໍາມະບານ 5 ເປັນເຈົ້າ ຂອງປະທານຄະນະບໍລິຫານງານສະຫະພັນກໍາມະບານແຂວງ ໃຫ້ບຸກຄົນ ຈໍານວນ 147 ໃບ. ມອບ-ຮັບໃບຢັ້ງຢືນ ແລະ ໃບຍ້ອງຍໍ ກໍາມະບານ 5 ເປັນເຈົ້າ ໃຫ້ສະຫະພັນກໍາມະບານເຂື່ອນໄຟຟ້ານໍ້າງື່ມ 1 ( ກົມກອງລວມໝູ່ )ທີ່ບັນລຸຄາດໝາຍການປະເມີນຜົນເນື້ອໃນຂໍ້ແຂ່ງຂັນ 5 ເປັນເຈົ້າ ປະຈໍາປີ 2022.

ເປັນກຽດ ກ່າວມອບໂດຍ ທ່ານ ບົວລໍາແພງ ວາງປະດິດ ຮອງປະທານຄະນະບໍລິຫານງານສະຫະພັນກໍາມະບານແຂວງ ກ່າວຮັບໂດຍ ທ່ານ ວິໄຊພອນ ສີສຸລາດ ຕ່າງໜ້າໃຫ້ສະຫະພັນກໍາມະບານເຂື່ອນໄຟຟ້ານໍ້າງື່ມ 1 ແລະ ມອບ-ຮັບ ໃບຢັ້ງຢືນ ແລະ ໃບຍ້ອງຍໍຂອງທ່ານປະທານສະຫະພັນກໍາມະບານເຂື່ອນໄຟຟ້ານໍ້າງື່ມ 1 ໃຫ້ ກໍາມະບານຮາກຖານຂື້ນກັບ 4 ຮາກຖານ.

ຕອນທ້າຍພິທີໄດ້ຮັບຟັງການໂອ້ລົມ ຂອງທ່ານ ສົມໃຈ ສີຈັນທະລາດ ແລະ ທ່ານ ບົວລໍາແພງ ວາງປະດິດ ເຊີ່ງທັງ   2 ທ່ານໄດ້ເນັ້ນໃຫ້ ຄະນະຮັບຜິດຊອບກໍາມະບານຮາກຖານ ສືບຕໍ່ໂຄສະນາສືກສາອົບຮົມການເມືອງ-ແນວຄິດ ໃຫ້ສະມາຊິກກໍາມະບານ, ພະນັກງານ-ລັດຖະກອນ ພາຍໃນຮາກຖານ ມີຄວາມອຸ່ນອ່ຽງທຸ່ນທ່ຽງ, ເຊື້ອໝັ້ນຕໍ່ການນໍາພາຂອງພັກ-ລັດ, ເປັນເຈົ້າການ ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ, ຂອງສູນກາງສະຫະພັນກໍາມະບານລາວວາງອອກ, ໃຫ້ນັບມື້ ໄດ້ຮັບຜົນດີ ຂື້ນເປັນກ້າວໆ.

ຂ່າວ: ບຸນຄົງ ຈັນດາລາ 

Leave a Reply

Your email address will not be published.

You may have missed

ສະຫງວນລິຂະສິດ