ກອງປະຊຸມໃຫຍ່ ຄັ້ງທີ I ຫນ່ວຍກໍາມະບານຫ້ອງການແຮງງານແລະ ສະຫວັດດີການ-ສັງຄົມ - Vieng Chanh News

Vieng Chanh News

ແຂວງວຽງຈັນອອນລາຍ

ກອງປະຊຸມໃຫຍ່ ຄັ້ງທີ I ຫນ່ວຍກໍາມະບານຫ້ອງການແຮງງານແລະ ສະຫວັດດີການ-ສັງຄົມ

1 min read

ໃນວັນທີ 15 ພະຈິກ 2022 ນີ້, ຫນ່ວຍກໍາມະບານແຮງງານ ແລະ ສະຫວັດດີການ-ສັງຄົມ ໄດ້ເປີດກອງປະຊຸມໃຫຍ່ຄັ້ງທີ I ຂອງຕົນຂຶ້ນຢ່າງເປັນທາງການ. ຢູ່ທີ່ຫ້ອງປະຊຸມຂອງຫ້ອງວ່າການປົກຄອງເມືອງວັງວຽງ ແຂວງວຽງຈັນ. ໂດຍການເປັນປະທານຂອງທານ ພອນໄຊ ຈັນທະວົງ ປະທານຫນ່ວຍກໍາມະບານຫ້ອງການແຮງງານ ແລະ ສະຫວັດດີການ-ສັງຄົມ.

ເປັນກຽດເຂົ້າຮ່ວມ ມີທ່ານ ພອນແກ້ວ ຂຸນພົມ ຄະນະບໍລິຫານງານສະຫະພັນກໍາມະບານແຂວງວຽງຈັນ ປະທານສະຫະພັນກໍາມະບານເມືອງວັງວຽງ, ທ່ານ ອໍາພອນ ອຸໄທທິດ ກໍາມະການພັກເມືອງ ເລຂາຫນ່ວຍພັກ ຫົວຫນ້າຫ້ອງການແຮງງານ ແລະ ສະຫວັດການ-ສັງຄົມເມືອງ, ທ່ານ ນາງ ດວງດາໄລ ສິງຫາຄໍາ ປະທານຫນ່ວຍແມ່ຍິ່ງ, ທ່ານ ບຸນທະຫນອມ ຈິງບ່າວໂຮມ ເລຂາ ຫນ່ວຍຊາວຫນຸ່ມຂອງຫ້ອງການດັ່ງກ່າວ, ມີສະມາຊິກກໍາມະບານ ແລະ ແຂກຖືກເຊີນອ້ອມຂ້າງເຂົ້າຮ່ວມ ຈໍານວນ 25 ທ່ານ, ຍິງ 12 ທ່ານ.

ທ່ານ ນາງ ພອນໄຊ ຈັນທະວົງ ໄດ້ຜ່ານບົດລາຍງານການເມືອງໃນການ ຈັດຕັ້ງປະຕິບັດໃນໄລຍະ 5 ປີຜ່ານມາ ແລະ ທິດທາງແຜນການ 5 ປີໃນຕໍ່ຫນ້າວ່າ: ໜ່ວຍກຳມະບານແມ່ນປະຕິບັດຕາມແຜນນະໂຍບາຍຂອງໜ່ວຍພັກ, ຫ້ອງການ ແຮງງານ ແລະ ສະຫວັດດີການສັງຄົມ ໄດ້ຮັບການຊີ້ນຳໂດຍກົງຈາກ ເລຂາໜ່ວຍພັກຢ່າງໃກ້ສິດ ໂດຍມີໜ້າທີ່ພາລະບົດບາດເປັນເສນາທິການໃຫ້ແກ່ສະຫະພັນກຳມະບານເມືອງໃນການເຕົ້າໂຮມຄວາມສາມັກຄີ, ສຶກສາອົບຮົມການເມືອງແນວຄິດໃຫ້ແກ່ສະມາຊິກກຳມະບານ, ພະນັກງານລັດຖະກອນຢູ່ພາຍໃນໜ່ວຍຂອງຕົນໃຫ້ມີຄວາມເຂົ້າໃຈຕໍ່ແນວທາງປ່ຽນແປງໃໝ່ຂອງພັກ-ລັດ ໃຫ້ມີຄວາມສາມາດ, ເອົາໃຈໃສ່ຢ່າງຕັ້ງໜ້າໃນການປົກປັກຮັກສາ ແລະ ສ້າງສາປະເທດຊາດ. ຄະນະໜ່ວຍກຳມະບານ ປະກອບມີ 2 ສະຫາຍ, ຍິງ 1 ສະຫາຍມີສະມາຊິກທັງໝົດ 16 ສະຫາຍ, ຍິງ 8 ສະຫາຍ.

ສາມາດຈັດປະເພດຂະບວນການ 5 ເປັນເຈົ້າໄດ້ຄື: ປະເພດ 1 ມີ 15 ສະຫາຍ, ຍິງ 8 ສະຫາຍ, ຄະນະໜ່ວຍຂອງພວກເຮົາຍັງໄດ້ຮັບໃບຢັ້ງຢືນ 5 ເປັນເຈົ້າ ແລະ ຍັງໄດ້ຜ່ານບົດສໍາລວດການນໍາພາລວມ. ຈາກນນັ້ນຜູ້ແທນກອງປະຊຸມກໍ່ໄດ້ພ້ອມກັນປະກອບຄໍາຄິດຄໍາເຫັນໃສ່ບົດລາຍງານການເມືອງດັ່ງ ໃຫ້ສົມບູນແລ້ວພ້ອມກັນຮັບຮອງເອົາ. ກອງປະຊຸມກໍ່ໄດ້ມອບໃບຢັ້ງຢືນ ແລະ ໃບຍ້ອງຍໍ ໃຫ້ແກ່ສະມາຊິກກໍາມະບານດີເດັ່ນໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ5ເປັນເຈົ້າຢ່າງຄົບຖ້ວນ ຈໍານວນ 15 ທ່ານ, ຍິງ 8 ທ່ານ. ກອງປະຊຸມໄດ້ປ່ອນບັດຄັດເລືອກເອົາຄະນະຊຸດໃຫມ່ເຊິ່ງມີຜູ້ສະຫມັກ 5 ສະຫາຍ, ກອງປະ ຊຸມຄັ້ງປະຖົມມະລຶກໄດ້ເປັນເອກະພາບເລືອກເອົາທ່ານ ອານຸສອນ ມະນີວັນ ເປັນປະທານຫນ່ວຍກໍາມະບານ, ນາງ ຄໍາປານ ສໄຊຍະວົງ ເປັນຮອງປະທານຫນ່ວຍກໍາມະບານພ້ອມທັງເປັນຜູ້ກວດກາ, ທ່ານ ນາງ ມະນີສາຄອນ ມາລາວົງ ເປັນຄະນະ.


ຕອນທ້າຍ ທ່ານ ພອນແກ້ວ ຂຸນພົມ ປະທານສະຫະພັນ ກໍາມະບານ ເມືອງ ຍັງໄດ້ໃຫ້ກຽດໂອ້ລົມ: ເຊິ່ງທ່ານໄດ້ຍ້ອງຍໍຊົມເຊີຍຜົນງານຂອງຫນ່ວຍ ຮສສ ທີ່ຍາດມາໄດ້ໃນໄລຍະ 5 ປີຜ່ານມາ ແລະ ທ່ານໄດ້ເນັ້ນ ຄວາມຫມາຍ ຄວາມສໍາຄັນ ພາລະບົດບາດ, ສິດຫນ້າທີ່ຂອງກໍາມະບານລາວ, ຊຸກຍູ້ເສີມຂະຫຍາຍ ຄວາມສະມະຄີ ຕິດພັນ ກັບວຽກງານ 5 ເປັນເຈົ້າໃຫ້ສໍາເລັດຜົນ ແລະ ທັນເວລາ, ເຊື່ອມຊຶມແນວ ທາງນະໂຍບາຍຂອງພັກຕິດພັນກັບຫນ້າທີ່ວິຊາສະເພາະຂອງຕົນ ໃຫ້ສໍາເລັດຜົນທີ່ວາງໄວ້.

ຂ່າວ/ພາບ: ບຸນຕາ ທໍາມະວົງ

Leave a Reply

Your email address will not be published. Required fields are marked *

ສະຫງວນລິຂະສິດ