ພິທີປະກາດຮັບຮອງເມືອງຫີນເຫີບ ເປັນເມືອງຊາວໜຸ່ມ 4 ບຸກ ຮອບ III ປະຈໍາປີ 2022 - Vieng Chanh News

Vieng Chanh News

ແຂວງວຽງຈັນອອນລາຍ

ພິທີປະກາດຮັບຮອງເມືອງຫີນເຫີບ ເປັນເມືອງຊາວໜຸ່ມ 4 ບຸກ ຮອບ III ປະຈໍາປີ 2022

1 min read

ວັນທີ 17 ພະຈິກ 2022 ຢູ່ທີ່ສະໂມສອນເມືອງຫີນເຫີບແຂວງວຽງຈັນໄດ້ຈັດພິທີປະກາດຮັບຮອງເມືອງຫີນເຫີບ ເປັນເມືອງຊາວໜຸ່ມ 4 ບຸກ ຮອບ III ປະຈໍາປີ 2022 ໂດຍການເປັນປະທານຂອງ ສະຫາຍ ຄໍາແສນ ວິໄລ ກໍາມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງຫີນເຫີບ, ມີ ສະຫາຍ ວອນ ວໍລະສານ ກໍາມະການພັກແຂວງ ເລຂາພັກເມືອງ ເຈົ້າເມືອງຫີນເຫີບ, ສະຫາຍ ນ. ອິນມະສອນ ສຸທໍາມະວົງ ຮອງເລຂາຄະນະບໍລິຫານງານຊາວໜຸ່ມແຂວງວຽງຈັນ, ມີຄະນະບໍລິຫານງານຊາວໜຸ່ມ, ສະມາຊິກຊາວໜຸ່ມ ແລະ ນ້ອງນ້ອຍນັກຮຽນເຂົ້າຮ່ວມ.


ສະຫາຍ ຄໍາແສນ ວິໄລ ກໍາມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງຫີນເຫີບໄດ້ຂຶ້ນຜ່ານບົດປະເມີນການປະເມີນຜົນຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມເມືອງຫີນເຫີບໄລຍະ 3 ປີຜ່ານມາ
2020 – 2022 ແລະ ທິດທາງແຜນການໃນຕໍ່ໜ້າ ຄະນະບໍລິຫານງານຊາວໜຸ່ມເມືອງຫີນເຫີບແມ່ນອົງການຈັດຕັ້ງມະ ຫາຊົນໜຶ່ງເຊິ່ງຢູ່ພາຍໃຕ້ການຊີ້ນໍາ – ນໍາພາໂດຍກົງຂອງຄະນະປະຈໍາພັກເມືອງ, ຄະນະບໍລິຫານງານຊາວໜຸ່ມເມືອງຫີນເຫີບແມ່ນອົງການຈັດຕັ້ງໜຶ່ງທີ່ມີສາຍຕັ້ງຂຶ້ນກັບຄະນະບໍລິຫານງານຊາວໜຸ່ມແຂວງວຽງຈັນ.

ສາຍຂວາງຂຶ້ນກັບອົງຄະ ນະພັກເມືອງຫີນເຫີບ, ຊາວໜຸ່ມລາວເຮົາມີມູນເຊື້ອດຸໝັ່ນຂະຫຍັນພຽນຮູ້ຮັກເຊື້ອແພງຊາດ, ຮັກບ້ານເກີດເມືອງນອນມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ມີຮີດຄອງປະເພນີອັນດີງາມຂອງແຕ່ລະເຜົ່າ, ສະມາຊິກຊາວໜຸ່ມເມືອງມີຫຼາຍຊົນເຜົ່າ, ມີຫຼາຍລະດັບຄວາມຮູ້ຄວາມສາມາດ, ມີການດໍາລົງຊີວິດທີ່ແຕກຕ່າງກັນ, ມີອາຊີບສຸດຈະລິດເພື່ອສ້າງຄອບຄົວຂອງຕົນເອງໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ ປະຈຸບັນຄະນະບໍລິຫານງານຊາວໜຸ່ມເມືອງຫີນເຫີບມີ 17 ສະຫາຍ, ຍິງ 3 ສະຫາຍ, ມີ 73 ໜ່ວຍ, ມີໄວໜຸ່ມເກນອາຍຸ 15 – 35 ປີ 2.353 ສະຫາຍ, ຍິງ 1.157 ມີສະມາຊິກຊາວໜຸ່ມປະຊາຊົນປະຕິວັດລາວທັງໝົດ 1.927 ສະຫາຍ, ຍິງ 701 ສະຫາຍ, ຊາວໜຸ່ທີ່ເປັນພະນັກງານ ລັດຖະກອນ 239 ສະຫາຍ, ຍິງ 126 ສະຫາຍ.

ຊາວໜຸ່ມທີ່ເປັນສະມາຊິກພັກ 267 ສະຫາຍ, ຍິງ 109 ສະຫາຍ ຊາວໜຸ່ມທີ່ເປັນສະມາຊິກສະຫະພັນກໍາມະບານລາວ 239 ສະຫາຍ, ຍິງ 126 ສະຫາຍ, ຊາວໜຸ່ມທີ່ເປັນສະມາຊິກສະຫະ ພັນແມ່ຍິງລາວ 667 ສະຫາຍ ຂະຫຍາຍສະມາຊິກຊາວໜຸ່ມໄດ້ 400 ສະຫາຍ, ຍິງ 207 ສະຫາຍ ຖ້າທຽບໃສ່ແຜນສາມາດປະຕິບັດໄດ້ 100% ຜ່ານການຈັດຕັ້ງປະຕິບັດ ແລະ ກວດກາປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມໄລຍະ 3 ປີຜ່ານມາ 2020 – 2022 ສາມາດຕີລາຄາປະເມີນໄດ້ຄື ບຸກດ້ານການເມືອງ ແນວຄິດ ປີ 2020 ສາມາດຕີລາຄາໄດ້ 86,35% ປີ 2021 ໄດ້ 87,39% ປີ 2022 ໄດ້ 85,11% ບຸກດ້ານການຝຶກຝົນຫຼໍ່ຫຼອມຮໍ່າຮຽນ ປີ 2020 ສາມາດຕີລາຄາໄດ້ 87,78% ປີ 2021 ໄດ້ 87,17% ປີ 2022 ໄດ້ 84,10% ບຸກດ້ານການຈັດຕັ້ງ ປີ 2020 ສາມາດຕີລາຄາໄດ້ 88,03% ປີ 2021 ໄດ້ 87,34% ປີ 2022 ໄດ້ 84,21% ແລະ ບຸກດ້ານວິຊາຊີບ ຊອກຫາວຽກເຮັດງານທໍາ ປີ 2020 ສາມາດຕີລາຄາໄດ້ 87% ປີ 2021 ໄດ້ 86,82% ປີ 2022 ໄດ້ 84,70%.

ດັ່ງນັ້ນຈຶ່ງເຫັນວ່າເມືອງຫີນເຫີບສາມາດປະກາດຮັບຮອງເປັນເມືອງຊາວໜຸ່ມ 4 ບຸກ ຮອບ III ປະຈໍາປີ 2022 ສໍາລັບແຜນການໃນຕໍ່ໜ້າຄະນະຊາວໜຸ່ມແຕ່ລະຂັ້ນຕ້ອງເອົາໃຈໃສ່ວຽກງານສຶກສາອົບຮົມການເມືອງ – ແນວຄິດໃນຖັນແຖວເຍົາວະຊົນໃຫ້ຍົກສູງສະຕິຕໍ່ປະເທດຊາດ, ຕໍ່ການຈັດຕັ້ງ, ເຄົາລົບລະບຽບກົດໝາຍ, ເຜີຍແຜ່ນິຕິກໍາຕ່າງໆໃຫ້ແກ່ຄະນະຊາວໜຸ່ມ ສະມາຊິກຊາວໜຸ່ມ – ໄວໜຸ່ມແຕ່ລະຂັ້ນໃຫ້ຮັບຮູ້ເຂົ້າໃຈ, ມີຄວາມຕື່ນຕົວເຂົ້າຮ່ວມຂະບວນການ 4 ບຸກຂອງຊາວໜຸ່ມ, ຕິດພັນກັບຂະບວນການຮັກຊາດ ແລະ ພັດທະນາ, ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ວຽກງານ 3 ສ້າງຂອງພັກ, ເອົາໃຈໃສ່ປັບປຸງການຈັດຕັ້ງໃຫ້ເຕີບໃຫຍ່ເຂັ້ມແຂງ.

ໂດຍສະເພາແມ່ນບໍາລຸງພາລະບົດບາດ, ສິດ ແລະ ໜ້າທີ່ໃຫ້ແກ່ຄະນະຊາວໜຸ່ມ, ສະມາຊິກຊາວໜຸ່ມແຕ່ລະຂັ້ນໃຫ້ທົ່ວເຖິງ, ຮັບປະກັນດ້ານປະລິມານ ແລະ ຄຸນນະພາບໃນການຂະຫຍາຍສະມາຊິກຊາວໜຸ່ມ – ເຍົາວະຊົນ, ຊຸກຍູ້ໜ່ວຍຮາກຖານຊາວໜຸ່ມຫ້ອງ ການອ້ອມຂ້າງເມືອງ ແລະ ໜ່ວຍຮາກຖານຊາວໜຸ່ມບ້ານໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ, 3 ດີ 4 ຮູ້ຂອງເຍົາວະຊົນທັນວາໂດຍຕິດພັນກັບຂະບວນການປະຕິບັດວຽກງານວິຊາສະເພາະ ແລະ ຂະບວນການສອນດີ ຮຽນເກັ່ງ.

ສືບຕໍ່ສ້າງເງື່ອນໄຂພັດທະນາວິຊາຊີບ – ສ້າງວຽກເຮັດງານທໍາໃຫ້ຊາວໜຸ່ມທີ່ວ່າງງານໃຫ້ຫຼາຍຂຶ້ນ, ຊຸກຍູ້ສົ່ງເສີມການສ້າງຄອບຄົວຊາວໜຸ່ມຕົວແບບໃນດ້ານຕ່າງໆ ໃນພິທີຍັງໄດ້ມີການມອບໃບຢັ້ງຢືນ 4 ບຸກ ຮອບ III ໃຫ້ຄະນະຊາວໜຸ່ມປະຊາຊົນປະຕິວັດລາວເມືອງຫີນເຫີບ, ມອບທຸງ ໄຊນໍາໜ້າຂະບວນການແຂ່ງຂັນ 4 ບຸກໃຫ້ຄະນະບໍລິຫານງານຊາວໜຸ່ມເມືອງຫີນເຫີບໃຫ້ກຽດມອບໂດຍ ສະຫາຍ ນ. ອິນມະສອນ ສຸທໍາມະວົງ ຮອງເລຂາຄະນະບໍລິຫານງານຊາວໜຸ່ມແຂວງວຽງຈັນ, ມອບໃບຢັ້ງຢືນຮັບຮອງເອົາໜ່ວຍຊາວໜຸ່ມ 73 ໜ່ວຍ ເປັນໜ່ວຍຊາວໜຸ່ມ 4 ບຸກ ຮອບ III ໃຫ້ກຽດມອບໂດຍ ສະຫາຍ ຄໍາແສນ ວິໄລ ກໍາມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງຫີນເຫີບ.

ມອບໃບຍ້ອງຍໍໃຫ້ຄະນະບໍລິຫານງານຊາວໜຸ່ມເມືອງ ຈຳນວນ 18 ໃບໃຫ້ກຽດມອບໂດຍ ສະຫາຍ ວອນ ວໍລະສານ ກໍາມະການພັກແຂວງ ເລຂາພັກເມືອງ ເຈົ້າເມືອງຫີນເຫີບ.
ສະຫາຍ ນ. ອິນມະສອນ ສຸທໍາມະວົງ ຮອງເລຂາຄະນະບໍລິຫານງານຊາວໜຸ່ມແຂວງວຽງຈັນໄດ້ໃຫ້ກຽດມີຄໍາເຫັນໂອ້ລົມຕໍ່ພິທີທ່ານໄດ້ສະແດງຄວາມຍ້ອງຍຊົມເຊີຍຕໍ່ຄະນະບໍລິຫານງານຊາວໜຸ່ມເມືອງຫີນເຫີບທີ່ໄດ້ເອົາໃຈໃສ່ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນເຮັດໃຫ້ມີຜົນສໍາເລັດຫຼາຍດ້ານຈົນສາມາດປະກາດເປັນເມືອງ 4 ບຸກ.

ທ່ານຍັງໄດ້ເນັ້ນໜັກໃຫ້ຄະນະບໍລິຫານງານຊາວໜຸ່ມເມືອງເອົາໃຈໃສ່ສຶກສາອົບຮົມສະມາຊິກຊາວໜຸ່ມເຮັດໃຫ້ເຂົາເຈົ້າໄດ້ຮັບຮູ້ເຊື່ອມຊຶມແນວທາງຂອງພັກ – ລັດ, ສືບຕໍ່ປັບປຸງຄະນະຊາວນຸ່ມຕິດພັນກັບວຽກງານວິຊາສະເພາະ ແລະ ນໍາເອົາບົດຮຽນມາເຜີຍແຜ່ໃນຖັນແຖວຊາວໜຸ່ມ – ໄວໜຸ່ມໃຫ້ເຂັ້ມແຂງດັ່ງຄໍາຂວັນທີ່ວ່າ “ ຊາວໜຸ່ມເປັນແຂນຂວາຂອງພັກ, ເປັນກະດູກສັນຫຼັງຂອງຊາດ, ເປັນຜູ້ສືບທອດພາລະກິດປະຕິວັດຂອງພັກ – ຂອງຊາດ ” ຕອນທ້າຍພິທີຍັງໄດ້ເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນພິທີປະກາດຮັບຮອງເອົາເມືອງຫີນເຫີບ ເປັນເມືອງຊາວໜຸ່ມ 4 ບຸກ ຮອບ III ປະຈໍາປີ 2022.

ຂ່າວ: ເມືອງຫີນເຫີບ

Leave a Reply

Your email address will not be published. Required fields are marked *

You may have missed

ສະຫງວນລິຂະສິດ