ກອງປະຊຸມປັບປຸງແຜນພັດທະນາເສດຖະກິດ-ສັງຄົມ 5 ປີ ຂອງເມືອງວັງວຽງ - Vieng Chanh News

Vieng Chanh News

ແຂວງວຽງຈັນອອນລາຍ

ກອງປະຊຸມປັບປຸງແຜນພັດທະນາເສດຖະກິດ-ສັງຄົມ 5 ປີ ຂອງເມືອງວັງວຽງ

1 min read

ໃນວັນທີ 29 ມິຖຸນາ 2021 ນີ້, ຢູ່ທີ່ ຫ້ອງປະຊຸມ ຂອງຫ້ອງວ່າການປົກຄອງເມືອງວັງວຽງ ແຂວງວຽງຈັນ. ໄດ້ຈັດກອງປະຊຸມປັບປຸງແຜນພັດທະນາເສດຖະກິດ-ສັງຄົມ 5 ປີ ຂອງເມືອງວັງວຽງ. ໂດຍພາຍໃຕ້ການເປັນປະທານຂອງທ່ານ.

ບຸນຈັນ ມາລາວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີທ່ານ ບຸນທະສິນ ຈິດວິລະພົນ ຫົວໜ້າຂະແໜງແຜນການ, ພະແນກແຜນການ ແລະ ການລົງທຶນແຂວງວຽງຈັນ. ມີບັນດາທ່ານຄະນະປະຈຳພັກເມືອງ,ກຳມະການພັກເມືອງ, ຫົວໜ້າຂະແໜງ-ວິຊາການ ຂອງພະແນກແຜນການ ແລະ ການລົງທຶນແຂວງ ແລະ ສູນສະຖິຕິປະຈໍາແຂວງ, ຫົວໜ້າ-ຮອງຫົວໜ້າຫ້ອງການ, ວິຊາການກ່ຽວຂ້ອງທົ່ວເມືອງວັງວຽງເຂົ້າຮ່ວມ.


ໃນກອງປະຊຸມ ຍັງໄດ້ຜ່ານບັນດາເອກະສານ ນຳສະເໜີບາງຕົວຊີ້ວັດຂອງແຜນພັດທະນາເສດຖະກິດ-ສັງຄົມ 5 ປີຄັ້ງທີ VI (2021-2025) ຂອງແຂວງວຽງຈັນແລະ ແຜນການ 5 ປີ (2020-2024) ຂອງເມືອງວັງວຽງ. ພ້ອມນັ້ນຍັງໄດ້ປະກອບຄໍາຄິດຄໍາເຫັນໃສ່ຮ່າງແຜນພັດທະນາເສດຖະກິດ-ສັງຄົມຂອງເມືອງ ແຕ່ນີ້ຫາປີ 2024 ໃຫ້ມີຄວາມສອດຄ່ອງກັບວຽກງານຕົວຈິງ ຫຼື ໃກ້ຄຽງທີ່ສຸດກັບການພັດທະນາຕາມທ່າແຮງບົ່ມຊ້ອນ ແລະ ຄວາມອາດສາມາດຂອງເມືອງທີ່ສາມາດຮັບຮອງໄດ້.

ຊຶ່ງໃນຄວາມເປັນຈິງແລ້ວ ໄລຍະຜ່ານມາແຜນພັດທະນາເສດຖະກິດ-ສັງຄົມ 5 ປີ ຂອງເມືອງແມ່ນໄດ້ຄົ້ນຄວ້າຮັບຮອງຢູ່ຂັ້ນເມືອງ ແລະ ລາຍງານໃຫ້ຂັ້ນແຂວງໃນປີຜ່ານມາແລ້ວ, ແຕ່ອີງໃສ່ມີການລະບາດຂອງພະຍາດໂຄວິດ-19 ຈຶ່ງເຮັດໃຫ້ບັນດາແຜນການທີ່ໄດ້ຮັບຮອງຈຶ່ງຄາດເຄື່ອນຍ້ອນຜົນກະທົບຈາກພະຍາດດັ່ງກ່າວ ແລະ ປັດໃຈດ້ານອື່ນໆຄືກັບບັນດາເມືອງອື່ນໆ.

ຊຶ່ງລັດຖະບານ, ກະຊວງກ່ຽວຂ້ອງ ກໍ່ຄືອົງການປົກຄອງແຂວງ ໄດ້ມີນະໂຍບາຍຜ່ອນຜັນໃນຫຼາຍວຽກ-ຫຼາຍຂະແໜງການ ເພື່ອວາງກົນໄກຄຸ້ມຄອງ ແລະ ພັດທະນາເສດຖະກິດແຫ່ງຊາດ ເວົ້າລວມ, ເວົ້າສະເພາະແມ່ນຂອງທ້ອງຖິ່ນ ເພື່ອປັບປຸງຟື້ນຟູລະບົບເສດຖະກິດໃຫ້ສາມາດດໍາເນີນໄປໄດ້ໃນສະພາບບ້ານເມືອງກໍາລັງພົບກັບວິກິດຂອງພະຍາດໂຄວິດ-19 ແລະ ຜົນກະທົບຈາກສະພາບແວດລ້ອມດ້ານອື່ນໆ. ກອງປະຊຸມຍັງໄດ້ຮັບຟັງການຜ່ານເອກະສານ ການພັດທະນາເມືອງຕາມແລວເສດຖະກິດ 443.


ຄະນະປະທານໄດ້ມີຄໍາເຫັນເຈາະຈີ້ມຢ່າງກົງໄປກົງມາ ເພື່ອໃຫ້ໄດ້ການສະຫຼຸບທີ່ເປັນເອກະພາບ ເປັນພື້ນຖານການປັບປຸງບົດແຜນພັດທະນາເສດຖະກິດຂອງເມືອງໃຫ້ຮັດກຸມ, ແຕ່ໃຫ້ກວມເອົາວຽກຂອງແຕ່ລະຂະແໜງການ, ຜູ້ເຂົ້າຮ່ວມກອງປະຊຸມ ໄດ້ຜັດປ່ຽນກັນນໍາສະເໜີເອກະສານ, ລາຍງານວຽກງານທີ່ຕົນຮັບຜິດຊອບ ແລະ ສະເໜີຂໍດັດແກ້ບາງວຽກໃນຂະແໜງຂອງຕົນ.


ຕອນທ້າຍກອງປະຊຸມ ທ່ານ ບຸນຈັນ ມາລາວົງ ເຈົ້າເມືອງໆວັງວຽງ ຍັງໄດ້ໃຫ້ກຽດໂອ້ລົມຕື່ມອີກ.

ຂ່າວ: ເຈັກວັງວຽງ

Leave a Reply

Your email address will not be published.

You may have missed

ສະຫງວນລິຂະສິດ