ກອງປະຊຸມຄົ້ນຄ້ວາປຶກສາຫາລືແລກປ່ຽນບົດຮຽນລະຫວ່າງຫ້ອງການ-ການເງິນ ກັບ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງວຽງຄຳ ແຂວງວຽງຈັນ - Vieng Chanh News

Vieng Chanh News

ແຂວງວຽງຈັນອອນລາຍ

ກອງປະຊຸມຄົ້ນຄ້ວາປຶກສາຫາລືແລກປ່ຽນບົດຮຽນລະຫວ່າງຫ້ອງການ-ການເງິນ ກັບ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງວຽງຄຳ ແຂວງວຽງຈັນ

1 min read

ວັນທີ 28 ມິຖຸນາ 2021 ຜ່ານມານີ້ຢູ່ທີ່ຫ້ອງປະຊຸມຊັ້ນ 2 ຫ້ອງທ່ານຮອງເຈົ້າເມືອງໆວຽງຄຳ ໄດ້ເປີດກອງປະຊຸມຄົ້ນຄ້ວາປຶກສາຫາລືແລກປ່ຽນບົດຮຽນລະຫວ່າງຫ້ອງການ-ການເງິນ ກັບ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງວຽງຄຳ ແຂວງວຽງຈັນຂຶ້ນ.

ໂດຍການເປັນປະທານຂອງທ່ານ ແກ້ວໃຈ ພົມມີ ກໍາມະການພັກເມືອງ ຮອງເຈົ້າເມືອງໆວຽງຄຳ ເຂົ້າຮ່ວມມີ ທ່ານ ແສງດາວ ເຜົ່າສີຫາ ຫົວໜ້າໜ່ວຍງານສ່ວຍສາອາກອນ ຫ້ອງການ-ການເງິນເມືອງວຽງວຽງຄຳ, ມີທ່ານ ນາງແສງເພັດ ສຸວັນດີ ຫົວໜ້າຫ້ອງການ ຊັບພະຍາກອນທໍາມະຊາດ ແລະ ສິ່ງແວດລ້ອມເມືອງວຽງຄໍາ ພ້ອມດ້ວຍພະນັກງານວິຊາການທັງສອງຫ້ອງການເຂົ້າຮ່ວມທັງໝົດ 11 ທ່ານ, ຍິງ 4 ທ່ານ.


ກອງປະຊຸມຄົ້ນຄ້ວາປຶກສາຫາລືໃນຄັ້ງນີ້ທ່ານ ແກ້ວໃຈ ພົມມີໄດ້ກ່າວວ່າ: ຈຸດປະສົງຂອງກອງປະຊຸມໃນຄັ້ງນີ້ ເພື່ອຄົ້ນຄ້ວາປຶກສາຫາລືແລກປ່ຽນບົດຮຽນກ່ຽວກັບການຈັດຕັ້ງປະຕິບັດໜ້າທີ່ວຽກງານຂອງທັງສອງຫ້ອງການໃຫ້ມີຄວາມເປັນເອກະພາບ ແລະ ໃຫ້ຖືກຕ້ອງຕາມລະບຽບ ກົດໝາຍທີ່ກໍານົດໄວ້.
ກອງປະຊຸມຄັ້ງນີ້ໄດ້ມີຄວາມເປັນເອກະພາບກັນສູງໃນຫຼາຍບັນຫາດັ່ງນີ້:
1. ເພີ່ມທະວີການປະສານສົມທົບທັງສອງຫ້ອງການເພື່ອແລກປ່ຽນບົດຮຽນເຊິ່ງກັນ ແລະ ກັບເປັນແຕ່ລະໄລຍະຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ.

2. ໃຫ້ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງເກັບກໍາຂໍ້ມູນເຂົ້າສະຖິຕິສໍາມະໂນ 03 ທີ່ດິນໃຫ້ເປັນອັນລະອຽດ, ຊັດເຈນເພື່ອສົ່ງໃຫ້ສ່ວຍສາອາກອນປະຈໍາເມືອງເປັນຖານຂໍ້ມູນຈັດເກັບລາຍຮັບພາສີທີ່ດິນເຂົ້າງົບປະມານໃຫ້ຖືກຕ້ອງ ຄົບຖ້ວນ ແລະ ເປັນຂໍ້ມູນເຂົ້າໃນລະບົບການເສຍພາສີທີ່ດິນຜ່ານລະບົບທະນາຄານຕາມຄໍາແນະນໍາເພີ່ມເຕີມ ເລກທີ 3909/ກງ, ລົງວັນທີ 4 ທັນວາ 2018.

3. ການຈັດເກັບລາຍໄດ້ຈາກການຊື້-ຂາຍ, ການໂອນສິດນໍາໃຊ້ທີ່ດິນ ແລະ ສິ່ງປຸກສ້າງທັງສອງຫ້ອງການເປັນເອກະພາບກັນຈັດຕັ້ງປະຕິບັດຕາມກົດໝາຍວ່າດ້ວຍ ອາກອນລາຍໄດ້ ເລກທີ 67/ສພຊ, ລົງວັນທີ 18 ມີຖຸນາ 2019 ທີ່ກໍານົດໄວ້ໃນມາດຕາ 36ຂໍ້ 3 ແລະ ມາດຕາ39ຂໍ້ 1,2,3,5.

4. ຄ່າທໍານຽມການຈົດທະບຽນເອກະສານ ແລະ ຄ່າທໍານຽມການປ່ຽນແປງສິດນໍາໃຊ້ທີ່ດິນຕ່າງໆແມ່ນຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງເປັນຜູ້ຄິດໄລ່ແລ້ວໄປຈ່າຍຢູ່ສ່ວຍສາອາກອນປະຈໍາເມືອງ.

5. ກ່ອນຈະອອກໃບແຈ້ງ ຫຼື ໃບຕາດິນແມ່ນໃຫ້ກວດກາຄືນກ່ຽວກັບພາສີທີ່ດິນຖ້າຫາກເຫັນວ່າຕອນດິນໃດບໍ່ໄດ້ເສຍພາສີມາຫຼາຍປີ ຫຼື ບໍ່ເສຍຈັກເທື່ອແມ່ນໃຫ້ໄປແຈ້ງເສຍຢູ່ສ່ວຍສາອາກອນປະຈໍາເມືອງເສຍກ່ອນ, ບໍ່ໃຫ້ໄປເສຍຢູາບ້ານອີກ, ຫຼັງຈາກອອກເອກະສານແລ້ວຈຶ່ແຈ້ງໃຫ້ບ້ານເກັບແລ້ວທີ່ດິນໃນຂັ້ນຕໍ່ໄປ.


ໃນຕອນທ້າຍກອງປະຊຸມໄດ້ຮັບຟັງການມີຄໍາເຫັນໂອ້ລົມຈາກທ່ານແກ້ວໃຈ ພົມມີກໍາມະການພັກເມືອງ ຮອງເຈົ້າເມືອງໆວຽງຄໍາ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ທັງສອງຫ້ອງການຍາດມາໄດ້ໃນໄລຍະຜ່ານມາ.

ພ້ອມນັ້ນ, ທ່ານກໍ່ໄດ້ຊີ້ທິດເຍືອງທາງໃຫ້ທັງສອງຫ້ອງການຈົ່ງເອົາໃຈໃສ່ໃນການຈັດຕັ້ງປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີຜົນສໍເລັດເປັນກ້າວໆ.

ຂ່າວ: ທອງເວີນ ທໍາມະວົງ

Leave a Reply

Your email address will not be published.

ສະຫງວນລິຂະສິດ